Kisagulo ky'Isuluko.
16
1 Nu atendile lingo bunee: “Ku mwezi wa Abibu, u mwezi mutangi, mukite kisagulo ku Yehowa, Kalaga weinyu, kubuno ku wozo mwezi wa Abibu Yehowa, Kalaga weinyu, amutikizye mu kisi kya Misri mu kindi. 2 Mukase Yehowa, Kalaga weinyu, kayulo ky'Isuluko ka bituganwa bya mikoko aba bya ngombe. Kitazi bubo mu kiziki kyasombole Yehowa kubika izina lyage gago. 3 Tamulie kampampa kagaga gamozi nako. Mulie kampampa katagaga bindi mutubakamo. Mwinike kako kampampa bunee: ‘Kampampa ka mbabazio.’ Mwakalide gamwatukile lubilo mu kisi kya Misri. Kengelazi bindi binsania bya kalamo keinyu kindi kikyo kimwatukile mu Misri. 4 Mugago tagumonekeko mu kisi kyeinyu kinsania bindi mutubakamo, nu mulie nyama insania zimwakasa ku Yehowa mwigolo lya busi butangi, buno tazibe milanga. 5 Tamukase kayulo k'Isuluko mu miino zeinyu insania zamukasa Yehowa, Kalaga weinyu, 6 tondo mukasane kayulo k'Isuluko tugu mu kiziki kyasombole Yehowa, Kalaga weinyu, kubika izina lyage gago. 7 Okyazi nyama, geteli mazi, nu kuzilia mu kiziki kyasombole Yehowa, Kalaga weinyu, nu nindunindu subyazi ku numba zeinyu za hema. 8 Ku bindi mutuba mulie kampampa katagaga tugu, nu busi bwa mutubakamo kwabe musanganano wasililila ku Yehowa, Kalaga weinyu, nu tamukite mulimo wampa bubo busi.
Kisagulo kya Mazinga mutubakamo.
9 Muganze mazinga mutubakamo kutukila nkungu zimwalinge kukala ngano. 10 Mukitile Yehowa, Kalaga weinyu, Kisagulo kya Mazinga nu kumukasa kayulo ka lutundo lwa mutima, u lukaso lwakuka kukasana ku Yehowa, Kalaga weinyu, u anga bwamukitide mponga. 11 Bogazibogazi mu kiziki kyasombole Yehowa, Kalaga weinyu, muntu wamulume gamozi na bana bage bamulume nu bakinga nu bakiti bage, nu muLawi uli ku mwino wage nu bageni nu nkubi nu misigala zili munkatini mweinyu. Yehowa, Kalaga weinyu, asombole kiziki kimozi buno abike izina lyage gago. 12 Tamwibilile buno mwabezaga bakobe mu kisi kya Misri, nu idangazi buno mwanze makakizio mamano mansania.
Kisagulo kya Nusu.
13 Mukite Kisagulo kya Nusu bindi mutubakamo gamwasile kukala nu kususula matubulo meinyu nu kukamata biguma kukata mazi ma biguma, 14 nu mwabogeboge mu kikyo kisagulo gamozi na bana beinyu basikila nu bakinga nu bakiti bamulume nu bakikulu nu muLawi nu bageni nu nkubi nu misigala zili mu miino zeinyu. 15 Mukite kikyo kisagulo bindi mutubakamo ku kiziki kyasombole Yehowa, Kalaga weinyu, kubuno Yehowa, Kalaga weinyu, amukasage mponga mu matubulo meinyu mansania nu mu mulimo weinyu unsania, buno mwabogeboge nunse.
16 Bamulume beinyu bansania babase ku kiziki kyasombole Yehowa, Kalaga weinyu, mambizi masatu na mwaka na mwaka, ku Kisagulo kya Kampampa Katagaga, nu ku Kisagulo kya Mazinga, nu ku Kisagulo kya Nusu. Nu tababase lwabusio lwa Yehowa geteli kena ka kumukasa. 17 Na muntu na muntu akase anga bwavwama ku bibyo byamukasile Yehowa, Kalaga weinyu, mponga.
Milembe za ngatu nu mitonge.
18 Sombolazi ngatu nu mitonge mu mwino na mwino gumwakaswa na Yehowa, Kalaga weinyu, anga buli bikanga byeinyu. Basungie bantu mu bulili nu kwisanana. 19 Tamulubikanie bwisanana; tamugalukye milembe ku kabamba ka kutunda munyobe; tamwitabizie nkaso za bwengelezi kubuno nkaso zikuziba meiso ma beiya menge nu kugalukya bwisanana. 20 Kitazi bwisanana nunse, buno mwiyane kisi kikumukasa Yehowa, Kalaga weinyu, nu kulama mukyo.