17
1 Nu atendile lingo bunee: “Tamukase ku Yehowa, Kalaga weinyu, ngombe, aba mukoko guli na kabalibango aba kinsania kibi, kubuno nkaso za lulo lukita zasombwa na Yehowa, Kalaga weinyu. 2 Mu miino zamukasa Yehowa, Kalaga weinyu, ndi kuli muntu umozi wamulume aba mukikulu, wakita bubi mu kutatananizia Yehowa, Kalaga weinyu, mu kwita mulembe unsania w'idagano lyage, 3 nu kukitila tungo tulaga nu kutukumbamina, aba kisongo kya busi aba mwezi aba kimozi kya mayombo ma kwigulu, kinamukakizia buno tamubikumbamine, 4 nu ndi mukungwa kitondo kikino, nti mwakilondozia nunse. Nu ndi buligo, nu kitondo kili bulili buno kikyo kyasomba Yehowa kyakitilwe munkatini mwa baIsraeli, 5 nti mwatole wozo wamulume aba wozo mukikulu wakitile bubo bubi nu kumwenzia ku isula lya mwino, nu kumwita na makozi. 6 Muntu anitwa ku bulongeki bwa bantu babili aba basatu, tondo ntakue ku bulongeki bwa muntu umozi. 7 Maboko ma balongeki malinge kumwita, nu kumbusa bango bantu bansania. Ububo bumwatikye bubi munkatini mweinyu.
8 Ndi mulondo mubibu wabasa kumuli, anga kwita muntu, aba myango gasamba bantu babili, aba kulibulana aba lungo lukita lwa mulondo guli mubibu ku ngatu za mwino, nti mwenda nago ku kiziki kyasombole Yehowa, Kalaga weinyu, 9 ku basankoga nu baLawi beli ko mu bindi bibyo, nu kubika mulondo wozo kubeli, nu basese mulondo. 10 Mwatunganana kukita anga bubamusesela mulondo nu kutaakania kimozi ku bibyo bibamukakizia. 11 Kitazi anga bubamutenda nu lusungio lubamubula. Tamugalukye lusungio lubamulolesie, tondo mukite bwisa. 12 Unsania wanana sankoga wa Yehowa, Kalaga weinyu aba ngatu nu ntaziga kubongwilila, nti akue. Ububo mwatikye muntu mubi munkatini mwa baIsraeli. 13 Ububo bantu bansania bongwe nu kukua boba nu kutabenga lingo.
Mulembe wa bakota.
14 Gamwingile nu kwikala nu kwiyana kisi kyamukasa Yehowa, Kalaga weinyu, nu mwatende bunee: ‘Tube na mukota wa kutwangata, anga bukukita bingo bilongo binsania byatutimba,’ 15 nti mwabike mukota wozo wasombolwe na Yehowa, Kalaga weinyu. Atunganana kuba umozi wa kilongo kyeinyu; tamubike mugeni uteli muIsraeli, wozo uteli mubuto weinyu. 16 Wozo mukota ntabe na farasi ningi wenyene, nu ntasubye bantu ku Misri buno bazitalikile, kubuno Yehowa amubwide bunee: ‘Tamukasubya lingo mu nzila zezo.’ 17 Wozo uli mukota ntabe na bakikulu beingi, aba azangezange mu mutima wage. Ntabe na feza aba olo ningi.
18 Geikale ga kisumbi kyage kya bukota, asanze mu kigondi kya mukanda wono mulembe unsania. Agutole ku basankoga beli baLawi, nu kugusanza wenyenenyene. 19 Asigale na mukanda waasanza, nu asomage mugo busi na busi bindi binsania bya kalamo kage, buno eiyigisie kukua Yehowa, Kalaga wage, boba nu kwidanga kukita milembe zeno insania nu makakizio mamano. 20 Ububo ntabe na lwikotio kutinga mibuto zage aba kugalukya ku seidume aba ku seikazi ku milembe zeno. Ndi akita anga bwasanzilwe, nti we nu bana bage bangate busoga bindi byingi mu bukota bwa baIsraeli.”