Kyindi kya basankoga.
18
1 Nu atendile lingo bunee: “BaLawi beli basankoga, ee baLawi bansania, tabeiyane ntiko aba kiziki kili munkatini mwa baIsraeli. Balame nu kulia ku mitebe nu migelo zakaswa ku Yehowa buno zibe kayulo kage, kubuno zili bwiyani bwabo. 2 Tababe na bwiyani munkatini mwa mibuto zabo; Yehowa eli bwiyani bwabo, anga bwabalagile. 3 Ku bituganwa byakaswa ku Yehowa buno bibe bisansa, ndi ngombe aba mukoko, byindi bya basankoga bibe bibino: kituli nu matama mabili nu lugili. 4 Mubakase matubulo matangi meinyu ma mbuto nu ma mazi ma biguma nu ma makiti, nu myoza mitangi zaseswa ku mikoko zeinyu, 5 kubuno Yehowa, Kalaga weinyu, abasombwede, bo nu bana babo, munkatini mwa bikanga byeinyu binsania, buno bemane lwabusio lwa Yehowa, nu kumukitila bindi binsania.
6 Ndi muLawi atuka mu mwino wage guli munkatini mwa baIsraeli nu avwa ku kiziki kyasombole Yehowa, 7 nti anakita mu izina lya Yehowa, Kalaga wage, anga bukukita bango baLawi, bakukitaga lwabusio lwa Yehowa. 8 Anakata nkindi z'idia bumozi anga bango baLawi, nu asigale na feza za kukunzia bintu nu numba zage.
Misako mibi nunse.
9 Gamwingile mu kisi kyamukasa Yehowa, Kalaga weinyu, tamukite ikumbamino ibi anga bukukitaga bibyo bilongo. 10 Munkatini mweinyu tamube muntu ukubika mwana wage mu keiya, ta umozi ukulagula, aba ukulagula mu nkeninkeni aba ukukita bugila aba buganga. 11 Takube mulogi aba muntu ukutenda na basumbu aba na babo bakule. 12 Kubuno unsania ukukita misako zezo asombwa na Yehowa, nu ku kabamba ka zezo misako Yehowa, Kalaga weinyu, apumbia bibyo bilongo lwabusio lweinyu. 13 Nu inyuwe tondo, mwatunganana kukitila Yehowa, Kalaga weinyu, na mutima umozi.
Mulengania wa Mukota Kalaga.
14 Kubuno bilongo bimwiyane bikungwilila balaguzi nu balogi, tondo Yehowa, Kalaga weinyu, ntakuziga mwakita bubo, 15 Yehowa, Kalaga weinyu, wenyene akamusakikila mulengania anga nne, nu wa munkatini mwa mibuto zeinyu. Mukamungwilila nu kumwanza nunsania, 16 anga bumwasegile ku Yehowa, Kalaga weinyu, ku busi bwa musanganano ku Horebu, gamwatendile bunee: ‘Tukukua boba kungwilila iyuki lya Yehowa, Kalaga weitu, aba kumona lingo ku keiya kakano kanene tunakua.’
17 Nu Yehowa ambwide bunee: ‘Bubo bubatendile buli busoga. 18 Nabazanzulile mulengania anga uwe, watuke munkatini mwa mibuto zabo, nu nabike moki mane mu kanua kage, nu we ababule bunsania bunamukakizie. 19 Nu unsania utazige kungwilila moki mane matende wozo mulengania mu izina lyane, nti eli na katati kundi. 20 Tondo mulengania unsania watende kitondo kinsyamukakizizie kutenda, aba ukutenda mu izina lya tungo tulaga, nti akue.’ 21 Muneibuzia mu mitima zeinyu bunee: ‘Buni butunamenya ndi mulengania atenda moki ma Yehowa?’ 22 Kungwa mulengania atenda mu izina lya Yehowa nu kitondo kikyo takyaba aba kutamonekako, nti Yehowa ntatendile bubo; wozo mulengania abutendile na lwikotio, nu tamukue wozo mulengania boba.”