Miino z'itinino.
19
1 Nu atendile lingo bunee: “Kungwa Yehowa, Kalaga weinyu, azikya bibyo bilongo nu kumukasa kisi kyabyo, nu kungwa mwasila kubipumbia nu kwikala mu miino zabyo nu mu numba zabyo, 2 nti mulongeke miino isatu mu kisi kyeinyu kyamukasile Yehowa, Kalaga weinyu, kukiyana. 3 Beganiazi kisi kikyo ku byindi bisatu, nu longekazi nzila mubyo ku zezo miino isatu, buno mwiti unsania atinine ku umozi wazo. 4 Bubuno buli bulongeki bwa mwiti watinine kuko nu kulama: muntu unsania wita munyage kuteli kabamba nu ntamusombaga lwabusio, ndi atinina ku mwino umozi wa zezo isatu, nti alame. 5 Ndi muntu enda na munyage mu lubanda nu kusinda miti, nu gaakusinda muti, nu isaga lyatuka mu mwini nu kukolokela munyage buno akue, nti wozo muntu atinine ku umozi wa zezo miino buno alame. 6 Musubi anamuyanga kungwa eikili na bongoa nu ndi nzila zili ndazi, anamusanga nu kumulibula nu kumwita, tondo mwiti ntatunganana kukua kubuno ntasombile munyage lwabusio. 7 Ububo namukakizia mwisombolele miino isatu.
8 Nu kungwa Yehowa, Kalaga weinyu, atalikila myaga zeinyu anga bwalagile ku basoinyuwe, nu kumukasa kisi kinsania kyalagile kukasa ku basoinyuwe, 9 nti mwasombole ingo miino isatu, zibe miino z'itinino. Yehowa, Kalaga weinyu, anamukitila bubo ndi mwidange kwanza makakizio mamano mansania manamukakizia lelo, nu kutunda Yehowa, Kalaga weinyu, nu kwenda mu nzila zage. 10 Mwakite bubo buno muntu uteli na katati nteitwe mu kisi kyeinyu kyamukasa Yehowa, Kalaga weinyu, buno mukiyane. Ububo katati ka mikila takabase ku kisi kyeinyu.
11 Tondo muntu unsania wasombaga mubuto wage nu kumubisamina nu kumusolobokela nu kumulibula buno akue, ndi atinina ku mwino umozi wa zezo, 12 nti bakulu ba wozo mwino bamutole nu kumukasa ku musubi buno akue. 13 Tamumukwile kyombo. Tikyazi katati ka kubasia mikila ku baIsraeli, nu bwabe busoga kumuli.
14 Mu kisi kimwiyane kyamukasa Yehowa, Kalaga weinyu, tamutikye aba kusindika kakengelezio ka mwaga wa mubuto weinyu, wabikile basoinyuwe.
15 Mulongeki umozi ntalongekele bubi bwakitile muntu, tondo mukwiyanina bulongeki bwa bantu babili aba basatu kukinda mulondo unsania. 16 Ndi mulongeki mubi azanzuka kulongekela muntu nu kumusongela, 17 nti babo babili beli mu mulondo bemane lwabusio lwa Yehowa nu lwabusio lwa basankoga nu ngatu zikala ku busi bubo, 18 nu ngatu zilonde bubibu nu kumenya ndi mulongeki alongekela buza ku mubuto wage. 19 Ndi buligo nti mukitilazi anga bwakitide mubuto wage. Mu kukita bubo mwatikye bubi munkatini mweinyu, 20 kubuno bango bantu bongwe musagu wozo nu bakue boba nu kutakita lingo bubi bubo munkatini mweinyu. 21 Tamukwile kyombo ku muntu wakitile ungo bubi, tondo kumusuba: kalamo ku kalamo, liso ku liso, kuboko ku kuboko, kugulu ku kugulu.”