Mulembe wa kwenda ku bita.
20
1-2 “Kungwa mukwenda ku bita kwitana na beiti beinyu nu kumona ku farasi nu tuyanga nu iyombo lingi kumutinga, nti tamukue boba, kubuno Yehowa, Kalaga weinyu, wamutikizye ku kisi kya Misri eli gamozi n'inyu. Gamwabase ku bita nti sankoga asambalile bantu, 3 ababule bunee: ‘BaIsraeli, ungwililazi. Mukwenda lelo ku bita kwitana na beiti beinyu. Mitima zeinyu tazitambe; tamukue boba; tamugilimine. Ee, tamukue boba aba kakeke, 4 kubuno Yehowa, Kalaga weinyu, akwenda n'inyu kumulwanina, nu akumukasia kukinda.’ 5 Basondelezia ba mayombo babule bakoloboyo bunee: ‘Nazi wobakile numba nto nu ntiyombekile muzo? Asubye ku numba zage nu kuzikasana anakivwa kukua. 6 Nazi wayikile isoa lya mizabibu nu ntibogeziebogezie na biguma? Asubye ku numba zage anakua ku bita nu ungo muntu anabogaboga nabyo. 7 Nazi wandile mukikulu nu ntemusonga? Asubye ku numba zage anakua ku bita, buno ungo wamulume ntamusonge.’ 8 Nu basondelezia batalike kutenda bunee: ‘Nazi ukukua boba nu uli na mutima watamba? Asubye ku numba zage buno mitima za mibuto zage tazitambe anga mutima wage.’ 9 Gasile basondelezia kutenda ku bantu, basombole bakota ba mayombo.
10 Gamwabase bwigi na mwino kwitana nago, sambalazi ku bantu bago bubobelelo. 11 Ndi bamwakula na bubobelelo nu kwigula nibi, nti bantu basangwe mugo bamukitile mulimo nu babe bakiti beinyu. 12 Tondo ndi tabatunda bubobelelo n'inyu, tondo batunda kwitana bita n'inyu, nti mugutimbe nu kwitana nabo. 13 Ndi Yehowa, Kalaga weinyu, amukasa go, nti mwite bamulume bansania na mwene wa nganda, 14 tondo bakikulu nu bana nu bituganwa nu binsania bili mu mwino, nti bili ntiko zeinyu. 15 Bubo u bumwakite ku miino zili bulazi n'inyu, ziteli miino za bilongo bibino bili bwigi n'inyu.
16 Tondo miino za bilongo bibino byamukasa Yehowa, Kalaga weinyu, kuba bwiyani bweinyu, tamusige wampa ukwiza, 17 tondo mubazikye nunsania, u baHiti nu baAmori nu baKanana nu baPerizi nu baHivi nu baYebusi, anga bwamukakizizie Yehowa, Kalaga weinyu. 18 Ndi tamwakita bubo, nti bamwigisie kukita lukita lubakitile tulaga twabo, nu mwagile Yehowa, Kalaga weinyu.
19 Kungwa mukutimba mwino umozi bindi byingi buno mwitane nago kugukinda, tamusinde miti zago kuzisesa nu kukita nazo mu bita, kubuno munalia biguma byazo, kubuno miti zikukolama biguma bili idia lya bantu. 20 Miti zimwizi buno tazili miti za biguma munazisinda nu kobaka nazo byindo ku mwino u mukwitana nago aaba nu mwagukinda.”