21
1 Nu atendile lingo bunee: “Mu kisi kyamukasa Yehowa, Kalaga weinyu, kukiyana, ndi mwasanga muntu wakule nu tamwamenya nazi wamwitile, 2 nti bakulu nu ngatu zeinyu bamenye ku myaga za miino zamutimba. 3 Bakulu ba wozo mwino guli bwigi na wozo wakule kutinga ingo miino batole kyana ky'ibuti kya ngombe kitekitaga mulimo nu takibuluta byakomba. 4 Nu bakulu ba wozo mwino beeke kikyo kyana kya ngombe ku mpinga zitalimwa aba kuyikwa nu zili na mazi makugela, nu babelekie ikosi lya kikyo kyana kya ngombe mu zezo mpinga. 5 BaLawi beli basankoga bakundamane ku mubili wa kyana kyitilwe. Yehowa, Kalaga weinyu, abasombwede kumukitila buno basese milondo. 6 Nu bakulu ba wozo mwino guli bwigi na kitumba kya wozo wakule, boge ku maboko mu kibungulu kili gantata ga mubili wa kikyo kyana kya ngombe kyabelilwe ikosi mu mpinga, 7 nu batende bunee: ‘Maboko meitu tamabasizie mikila zeno, nu tatwazimonine. 8 Ee Yehowa, sigilila bantu bobe u baIsraeli bawakulwide. Ntusige katati ka mikila zituteizi buni buzabasizibwe.’ Nu bantu basigililwe ku lukuo lutamenyinwe mwiti. 9 Bubo u bumwatikye kumuli katati ka kubasia mikila nu tamwamenya muntu wamwitile, nu mwakite bwisanana ku Yehowa.
Mulembe wa bakikulu bakatwa mu bita.
10 Gamukwenda kwitana na beiti beinyu, nu Yehowa, Kalaga weinyu, abakasa kumuli nu mwaba na bakandwa, 11 ndi muntu umozi weinyu amona munkatini mwa bakandwa, mukikulu mbangilwa nu atunda kumusonga, 12 nti amutole ku numba zage, nu we mukikulu nti eibega nzwili zage nu kusesa nyana zage, 13 nu atikye nsulu zage za bukandwa, nu eikale mu numba za wozo muntu kulilila isi nu nina mwezi umozi. Kumbusa kwago anavwama kumukunda nu abe mukazi wage. 14 Kungwa ntakubogaboga nage, nti azige mukikulu ende anga bwatunda, ntamukunzie ku bikulo, ntamukitile anga mukobe, kubuno amwitizie na nsoni.
Mulembe wa nkula.
15 Kungwa muntu eli na bakikulu babili, umozi kilanga nu ungo kigilwa, nu bamubutila bana, wozo kilanga nu wozo kigilwa, nu nkula zili za wozo kigilwa, 16 gaakubegania bwiyani bwage, nteli na bwangato kubika mwana wa kilanga nkula, ndi nkula za lebelebe zili mwana wa kigilwa. 17 Tondo eitabizie nkula za kigilwa buno zili nkula za bulili nu kumukasa byindi bibili ku bibyo byeli nabyo, kubuno wozo eli kulinga kwa magala mage, nu atunganana kukata byakuka.
Mulembe wa mwana wa ngini.
18 Kungwa muntu eli na mwana wa ngini nu mubengi utakwanza iyuki ly'isi nu nina, nu bamususula tondo ntabongwa, 19 nti isi nu nina bamweke ku bakulu ba mwino wabo, ga lusu lwabo, 20 nu babule bakulu ba wozo mwino bunee: ‘Wono mwana weitu eli na ngini nu kabenga. Ntakuziga kutwanza, eli kiliagundu nu mulebi.’ 21 Nu bamulume bansania ba wozo mwino bamulibule makozi aaba nu akua. Bubo ububo mwatikye bubi ku baIsraeli, nu baIsraeli bansania bongwe musagu nu bakue boba.
Milembe za bitondo byingi.