22
1 Nu atendile lingo bunee: “Ndi wamona ngombe aba mukoko wa mubuto wobe wazimina, ntugubise, watunganana kugusubya ku mubuto wobe. 2 Nu ndi mubuto wobe nteli bwigi nobe, aba ndi ntumwizi, nti wenda na kituganwa kyage kyazimina ku numba zobe nu kukilanga aaba nu akilonde. Ububo wamusubizie kyo. 3 Kitazi bubo na mpunda aba nsulu aba kinsania kyamuzimina. Ndi wakimona, nti ntukibise. 4 Ndi wamona ku ngombe aba mpunda za mubuto wobe zagoa mu nzila, nti ntwibise, watunganana kuzizanzula lingo.
5 Mukikulu ntavwale nsulu za wamulume, nu wamulume ntavwale nsulu za mukikulu, kubuno wozo ukukita bubo asombwa na Yehowa, Kalaga weinyu.
6 Ndi kizumba kya kazoni kili mu nzila mu muti aba gansina muti, nu kili na mongu aba byana nu nina akumbatila byana, nti ntutikye nina nu byana. 7 Siga nina kwenda nu tola byana, buno bwabe busoga kumuli nu mwalame bindi byingi.
8 Kungwa wobaka numba nto, bika mukolo kuzo buno ntube na katati ka mikila kungwa muntu akoloka gazo.
9 Tamuyike nkita ibili za mbuto mu isoa lya mizabibu. Ndi mwakita bubo, nti matubulo ma mbuto nu biguma bya mizabibu, binsania nti byasililila ku Yehowa.a
10 Tamukite mulimo wa kutimuna bilongo na mpunda nu ngombe mu kisanga kimozi.
11 Tamuvwale nsulu zalukwa na misinge za myoza nu za kitani.
12 Kitazi miimbo ku ndenge inazi za nsulu zeinyu zimukwikukila.
13 Muntu unsania ndi asonga mukikulu, nu kumbusa kwa kwiyombeka nage amusomba 14 nu amusongela nu kumwitia na nsoni gaakutenda bunee: ‘Nasongile mukikulu wono, nu ganamukundile nsyamonine buno eli kikumi.b 15 Ububo isi wa mukinga nu nina bavwe ku bakulu ba mwino ga lusu lwabo na kalolesio ka bukumi bwage, 16 nu isi wa mukinga atende ku bakulu bunee: ‘Nakasile wamulume wono kusonga mukinga wane nu es'amusomba. 17 Nu kano kaluma amusongela ku kitondo kya nsoni. Akutenda bunee: “Nsyamonine buno mukinga wobe eli kikumi.c ” Tondo kakano keli kalolesio ka bukumi bwage,’ nu babike lwabusio lwa bakulu ba mwino zezo nsulu zili kalolesio. 18 Nu bakulu ba wozo mwino batole wozo wamulume nu kumususula. 19 Lingo bamuligie byindi lukama bya feza nu kubikasa ku isi wa mukinga, kubuno eitizie mukinga wa baIsraeli nsoni. Wozo mukinga asigale mukikulu wage; nteli na bwangato bwa kumutikya ku kalamo kage kansania.
20 Tondo ndi musagu guli bulili, nu kalolesio ka bukumi bwage takamoneka ku mukinga, 21 nti balusie mukinga ku lwibi lwa numba z'isi, nu bamulume ba mwino wage bamwite na makozi, kubuno akita kitondo kya nsoni nkali munkatini mwa baIsraeli. Ububo mwatikye bubi munkatini mweinyu.
22 Muntu unsania wasangwa eiyombeka na mukikulu wasongwa, nti babo babili bakue, wozo wamulume nu wozo mukikulu. Ububo mwatikye bubi munkatini mwa baIsraeli.
23 Ndi kikumi kyandoa na wamulume, nu ungo wamulume amusanga mu mwino nu kwiyombeka nage, 24 nti balusibwe babo babili ku mwingilo wa mwino nu balibulwe na makozi aaba nu bakue, mukinga kubuno ntalalukile kumana mubila nu eli mu mwino, nu wamulume kubuno abotezie mukikulu wa munyage. Ububo mwatikye bubi munkatini mweinyu.
25 Tondo ndi wozo wamulume asanga kikumi mu isoa aba mu lubanda nu kwitalikila kweli, wozo wamulume tugu nti akue, 26 tondo tamukite kampa ku mukinga. Ntakitile mibi zatunganana lukuo. Mulondo wono guli anga muntu wasoloboka nu kwita munyage, 27 kubuno amusangile mu isoa, nu mukinga wandoa alalukile, tondo ntamonine wampa kumukasia.
28 Wamulume ndi amona ku mukinga utandoa nu kwiyombeka nage nu bamoneka, 29 nti wozo wamulume wiyombeka na mukinga akase isi wa mukinga byindi makumi matano bya feza, nu wozo mukinga abe mukazi wage, kubuno amubotezie, nu nteli na bwangato kumutikya bindi binsania.
30 Muntu ntasonge mukikulu w'isi, aba ntatikye nsulu za mukikulu w'isi.”