Nazi utanavwama kwingila mu musanganano.
23
1 Nu atendile lingo bunee: “Ndi muntu abalulwa mikila za mabolo aba kuseswa ntonga, nti nteingile mu musanganano wa Yehowa. 2 Mwana wa butazi nteingile mu musanganano wa Yehowa aaba nu ku kibuti ky'ikumi ky'ibuta lyage takyaganzwe mu musanganano wa Yehowa.
3 MuAmoni aba muMoabu wampa nteingile mu musanganano wa Yehowa aaba nu ku kibuti ky'ikumi ky'ibuta lyage, tabaganzwe ku bantu ba Yehowa ku milyalya, 4 kubuno tabamukasile idia gamwabezaga mu nzila gamwatukile mu Misri, nu bamanine Balama u mwana wa Beori wa ku Petori wa Mesopotamia buno amuswilile. 5 Tondo Yehowa, Kalaga weinyu, ntongwilide Balama nu agalukizye kiswililo kyage kuba mponga kumuli, kubuno Yehowa, Kalaga weinyu, amutundile. 6 Tamulonde bubobelelo bwabo aba busoga bwabo mu kalamo keinyu aaba nu ku milyalya.
7 Tamusombe baEdomu, kubuno beli mibuto zeinyu; tamusombe baMisri, kubuno mwabezaga bageni mu kisi kyabo. 8 Bana babutwa kubeli mu kibuti kya bisatu beingile mu musanganano wa Yehowa.
Kwenga kw'ido mu bita.
9 Gamukwenda kwitana na beiti nu kwiyombeka mu ido, idangazi na binsania bili bibi.
10 Ndi kuli wamulume unsania wa munkatini mweinyu uli nsese ku kabamba ka bulume bwabasile kweli mu kindi atuke mu ido nu nteingile lingo mulyo, 11 tondo nkungu za mwigolo nti oge mazi, nu mu kwida kwa busi eingile mu ido.
12 Lingo mube na kiziki kumbuga kw'ido, u kiziki kya kuyika tubi. 13 Mube n'iyembe ikeke aba lupagu lukeke, nu nkungu za kunyena, nti mumbe kakeke nu kukukila tubi tweinyu. 14 Kubuno Yehowa, Kalaga weinyu, akutabanga mu ido lyeinyu, buno amwonie nu kumukasa beiti beinyu. Ububo ido lyeinyu lisililile buno ntamone ku nsese munkatini mweinyu nu kugaluka nu kumusiga.
Milembe za bingo bitondo.
15 Ndi mukobe atina kumuli kutuka ku mukota wage, nti tamumusubye ku mukota wage. 16 Eikale gamozi n'inyu ku kiziki kyasombole ku mwino ukumutananizia. Tamumubabazie.
17 Takube kitazi munkatini mwa bakinga ba baIsraeli, aba wamulume wa butazi bwa baSodoma ntabe munkatini mwa bamulume ba baIsraeli. 18 Tamuvwe na bikulo bya kitazi aba bikulo bya wamulume wa butazi ku numba za Yehowa, Kalaga weinyu, buno mwalige bilumbilo binsania, kubuno Yehowa, Kalaga weinyu, akubisomba nunse.
19 Tamwambye mubuto weinyu ku mutali aba feza aba idia aba kintu kinsania kikwambibwa ku mutali. 20 Munavwama kwambya mugeni ku mutali, tondo ku mubuto weinyu tamumwambye ku mutali, buno Yehowa, Kalaga weinyu, amukase mponga mu binsania bimukukita mu kisi kimukwingila kwiyana.
21 Kungwa muntu alumbila ku Yehowa, Kalaga weinyu, nti asasie kukizindilizia kubuno Yehowa, Kalaga weinyu, akakibuzia lebelebe, nukyo kyabe mibi ku wozo utazindilizia kilumbilo lyage. 22 Tondo ndi muntu ntaziga kulumbila, nti takwabe bwagi kweli. 23 Kitazi kikyo kyatuka mu tunua tweinyu, kubuno mwalumbide Yehowa, Kalaga weinyu, na mutima mu moki ma kanua.