24
1 Nu atendile lingo bunee: “Kungwa wamulume atola mukikulu kumusonga, nu kumbusa amona buno ntamutananizia kubuno amona kimozi kya nsoni kweli, nti amusanzila mukanda wa kulekanuka nage nu kugukasa ku maboko mage, nu kumutikya ku numba zage. 2 Kungwa atuka mu numba, nti eli na bwangato kusongwa n'ungo wamulume. 3 Ndi wamulume wage wa babili amusomba nu kumusanzila mukanda wa kulekanuka nu kumukasa go mu maboko mage nu kumutikya mu numba zage, aba ndi wozo wamulume wa babili akua, 4 nti wozo wamusongile mu kulinga ntamusonge lingo, kubuno eseli nsese, kubuno kikyo kitondo kikusombwa na Yehowa. Tamubigie kisi kyamukasa Yehowa, Kalaga weinyu, kukiyana na bwagi. 5 Kungwa muntu asonga mukikulu muto, nti ntasingwe ku bita na mayombo, aba ntakaswe mulimo unsania, tondo akandulwe kugo buno asigale ku numba zage mwaka umozi kubogiabogia mukikulu muto waasongile.
6 Tamutole mututi aba ngogo kibe mwima wa nsombi, kubuno kukita bubo kuli kutola kalamo.
7 Ndi kwamoneka muntu umozi buno akwiba umozi wa mibuto zage wa baIsraeli nu kumukitila anga mukobe aba kumukunzia, nti mwibi wozo akue. Ububo mwatikye bubi munkatini mweinyu.
8 Idangazi na bibali, nu kukita binsania byamwigisie basankoga, u baLawi. Anga bunabakakizizie, bubo u bumukita. 9 Kengelazi bwakitide Yehowa, Kalaga weinyu, Miriamu mu nzila gamwatukile mu Misri.
10 Kungwa muntu akwambya mubuto kintu kimozi, nteingile mu numba zage kutola mwima. 11 Emane kumbuga, nu muntu ukwamba amulusizie mwima kumbuga. 12 Ndi eli muzambi ntwiyombeke na mwima wage. 13 Bwatunganana kumusubizia mwima wage busi tabwida, buno avwame kwiyombeka na nsulu zage nu kukukasa mponga, nu Yehowa, Kalaga weinyu, akuganze bwisanana.
14 Ntubabazie mukiti wobe ukukukitila, uli muzambi nu mwiyanizi wa mibuto aba wa mugeni mu kisi kyeinyu. 15 Mukase lukalilo lwage ku busi bwage, ndi busi tabwida, kubuno eli muzambi nu abikile mutima wage kulo, anakivwa kulila ku Yehowa nu nti buse bwagi kuguli.
16 Babuti tabeitwe ku kabamba ka bana babo, nu bana tabeitwe ku kabamba ka beisibo. Muntu na muntu akue ku kabamba ka bwagi bwakita wenyene.
17 Tamugalukye bwisanana bwa mugeni aba nkubi, nu tamutole nsulu za misigala kuba mwima. 18 Kengelazi buni bumwabezaga bakobe mu Misri, nu Yehowa, Kalaga weinyu, amukulwide kutuka ko. Ububo namukakizia kukita kitondo kikino.
19 Nkungu zimukutubula masoa meinyu, ndi mwibilila mukanda umozi mu isoa, tamwende lingo kugutola. Wabe ku mugeni, aba nkubi, aba musigala, buno Yehowa, Kalaga weinyu, amukase mponga ku milimo insania zimukukitaga. 20 Nkungu zimukulibula miti za mizeituni kukola biguma byazo, tamuzilibule limbizi lya mabili. Mizeituni zasigala zibe ku mugeni nu nkubi nu misigala. 21 Nkungu zimukukola biguma bya mizabibu, tamusongye limbizi lya mabili. Bibyo byasigala bibe ku mugeni nu nkubi nu musigala. 22 Kengelazi buno mwabezaga bakobe mu kisi kya Misri. Ukinsa namukakizia kukita bubuno.”