25
1 Nu atendile lingo bunee: “Ndi kuli nsake gasamba bantu, bende ku ngatu kubatula, nu ngatu zatule gabasamba, kubingia wozo uteli na katati nu kusungia wozo uli na katati. 2 Ndi mwagi atunganana kususulwa, asusulwe lwabusio lwa ngatu; akukumanibwe gansi nu kususulwa, anga geigezye bwagi bwage. 3 Anavwama kukata tususula makumi manazi tugu; tatutinge bubo, kubuno ndi twatinga, nti mubuto weinyu abengwa. 4 Tamukande kanua ka ngombe kungwa akunyanta ngano.
5 Kungwa mibuto zikwikala gamozi, nu umozi akua geteli kubuta musikila, nti wozo musigala wa wozo wakule ntasongwe na mugeni. Muto w'iba wage amutole nu kumusonga, nu amukitile bubo bwatunganana. 6 Nkula za musikila zabutwe zinikwe izina ly'iba wakule, buno izina lyage talyazimine munkatini mwa baIsraeli. 7 Tondo ndi wozo muto ntaziga kusonga mukikulu wasigile mubuto wage, nti mukikulu wozo ende ga lusu lwa bakulu nu kubatenda bunee: ‘Muto w'iba wane ntakutunda izina lya mubuto wage kusigala munkatini mwa baIsraeli. Ntakutunda kunkitila bwatunganana kunkitila.’ 8 Bakulu ba mwino wage bamumane nu kumwigisia. Ndi ntaziga kugaluka mu kutenda bunee: ‘Nsikumusonga,’ 9 nti mukikulu wa mubuto wage abase nage ku bakulu nu atikye kisalapata ku kugulu kwage nu amuswile matazi ku malanga nu akule bunee: ‘Bubo u bukitwa wozo utakutunda kobaka numba za mubuto wage.’ 10 Nu izina lyage limanwe munkatini mwa baIsraeli bunee: ‘Numba za wozo watikizibwa kisalapata.’
11 Kungwa bamulume babili bakusaka bwabobwabo, nu mukikulu w'umozi akunda kukasia iba wage nu alambya kuboko kwage ku kizwalilwa kya wozo ukusaka n'iba, 12 nti mwamusesa kuboko kwage; tamumukue kyombo.
13 Tamube na byakulindika bibili byengukana, kikeke nu kinene,a mu nsago zeinyu. 14 Tamube na byakulindika bibili mu numba zeinyu, kikeke nu kinene. 15 Mube na byakulindika byaswaga nu byili bulingilingi, buno mwalame bindi byingi mu kisi kyamukasa Yehowa, Kalaga weinyu. 16 Kubuno Yehowa, Kalaga weinyu, akusomba nunsania babo bakukitaga bitondo bibino, u babo bakukitaga na bwengelezi.
17 Kengelazi buni bwamukitide baAmaleki mu nzila gamwatukaga mu Misri, 18 buni bubeitenne na babo babezaga kumbusa gamwakutilwe bubibu, nu beitile babo babezaga kumbusa. Tabakule Kalaga boba. 19 Kungwa Yehowa, Kalaga weinyu, amumuzia ku beiti beinyu ba ndenge insania mu kisi kyamukasa Yehowa, kuba bwiyani bweinyu, nti muzikye baAmaleki bansania nu kutikya kubakengela ku kisi kinsania kili kunsi kw'igulu. Tamwibilile kukita bubo.”