Milembe za matubulo matangi nu kyindi ky'ikumi.
26
1 Nu atendile lingo bunee: “Gamukwingila mu kisi kyamukasa Yehowa, Kalaga weinyu, kukiyana, nu gamukwikala mukyo, 2 nti mwatole biguma bitangi bya bibyo bimwakole mu kikyo kisi kyamukasa Yehowa, Kalaga weinyu, nu mwabibike mu luzi nu kwenda nabyo ku kiziki kyasombole Yehowa, Kalaga weinyu, buno eikalage mukyo n'izina lyage, 3 nu kubula sankoga uliko mu bindi bibyo bunee: ‘Nkusambalila lelo Yehowa, Kalaga wobe, buno ningide mu kisi kyalagile Yehowa ku batateiswe kutukasa kyo.’ 4 Nu sankoga akate luzi ku kuboko kwobe nu kulubika lwabusio lwa kasenga ka kisansa kya Yehowa, Kalaga wobe. 5 Nu muntu atende lwabusio lwa Yehowa, Kalaga wage, kubula bunee: ‘Tatane abezaga muAramu watimbagatimbaga, nu agelile ku Misri na kikanga kikeke, nu eikalile kuko nu babede kilongo kinene nu kya magala na bantu beingi. 6 Nu baMisri batukitilaga bubi, batubabazizie nu kutukitia bukobe bukali. 7 Twalilile ku Yehowa, Kalaga wa batateiswe, nu Yehowa ongule ku iyuki lyeitu. 8 Yehowa atutikizye ku Misri na kuboko kwalambibwa na magala nu na boba bunene nu tukengelezio nu miganogano. 9 Atwekile ku kisi kikino, u kisi kiyala na mabele nu buuki. 10 Nu kano kaluma, ee Yehowa, ntukumona navwa na matubulo matangi ma biyikanwa bya kisi kiwankasile.’ Kumbusa kwa kutenda bubo wabike gansi lwabusio lwa Yehowa, Kalaga wobe, luzi lulo luli na matubulo matangi, nu wakumbamine Yehowa, Kalaga wobe. 11 Na muntu na muntu nu baLawi nu bageni beli munkatini mweinyu, inyuwe bansania bogazibogazi na busoga bwamukasile Yehowa, Kalaga weinyu. 12 Kungwa mwasila kukundamania kyindi ky'ikumi kya matubulo meinyu mu mwaka w'isatu, guli mwaka wa kukasa mitebe, kasazi kyo ku baLawi, nu bageni, nu misigala, nu nkubi, buno balie mu miino zeinyu nu kwembuka. 13 Gamwakite bubo tendazi ku Yehowa, Kalaga weinyu, bunee: ‘Natikizye kyindi ky'ikumi kyasililila mu numba zane, nu nakikasile ku baLawi nu bageni nu misigala nu nkubi, anga buli makakizio mobe. Nsyagalukile ku makakizio mobe, aba nsibilide limozi kumo. 14 Nsyalide kena mu kulila kwane, aba nsyakitikizye nkungu zinabezaga nsese, aba nsyakikasile ku bakuzi. Nanzile Yehowa, Kalaga wane; nakitile binsania biwankakizizie. 15 Kutukila kiziki kyobe kyasililila, ee, kutuka kwigulu, tulole nu kukasa mponga kutuli, u bantu bobe baIsraeli, nu ku kisi kiwatukasile anga buwalagile batateiswe, u kisi kiyala na mabele nu buuki.’
Bantu ba Mukota Kalaga.
16 Lelo Yehowa, Kalaga weinyu, akumukakizia kukita makakizio mamano nu milembe zeno. Idangazi nunse buno mwazikite na mutima unsania nu bumenyinino bunsania. 17 Mwasambala lelo buno Yehowa eli Kalaga weinyu, nu mwende mu nzila zage, nu kulanga milembe zage, nu makakizio mage, nu nsungio zage, nu kumwanza nunsania. 18 Nu lelo Yehowa asambala buno muli kilongo kyage, u bantu ba lutundo lwage anga bwamulagile, nu buno mwatunganana kulanga makakizio mage. 19 Akusambala buno amusakike ku bilongo binsania byakitile, kubitinga ku lukumu nu luganuno nu lwanzo, buno mube kilongo kyasililila ku Yehowa, Kalaga weinyu, anga bwalagile.”