Miduko za Ebali nu Gerizimu.
27
1 Musa nu bakulu ba baIsraeli batendile bantu bunee: “Langazi makakizio manamukakizia lelo. 2 Nu ku busi bumwasoke Yordani kwingila mu kisi kyamukasa Yehowa, Kalaga weinyu, mwimike makozi manene nu kumabongia makese, 3 nu kusanza kumo milembe zeno, kungwa mwasila kusoka luuzi nu kwingila mu kisi kyamukasa Yehowa, Kalaga wa basoinyuwe, anga bwamulagile, u kisi kiyala na mabele nu buuki. 4 Ukinsa gamwasile kusoka Yordani, nti mwakome makozi mamo manene ga mwiduko wa Ebali nu kumabongia makese, anga bunamukakizia lelo. 5 Gago kitazi kasenga ka kayulo ku Yehowa, Kalaga weinyu, na makozi. Tamukite mulimo na kyuma, 6 tondo mwakite kasenga kako na makozi matabazwa, tondo kita namo anga bumeli gansi gamwamasanga. Gamwasile kukakita, kasazi Yehowa, Kalaga weinyu, tuyulo twa kugisibwa gako. 7 Gago mwakase tuyulo twa bubobelelo, nu mwatulie nu kubogaboga lwabusio lwa Yehowa, Kalaga weinyu. 8 Nu mwasanze ga makozi mamwakomine milembe zeno bwasibwasi.” 9 Nkungu zezo Musa gamozi na basankoga u baLawi, babwide baIsraeli bansania bunee: “Mwikale kibibi nu kungwilila, lelo mwabede bantu ba Yehowa, Kalaga weinyu. 10 Ukinsa anzazi iyuki lya Yehowa, Kalaga weinyu, nu kukita makakizio nu milembe zinamukakizia lelo.”
11 Nu busi bubo Musa akakizizie bantu bunee: 12 “Kungwa mwasoka Yordani, nti bikanga bibino byemane ga mwiduko wa Gerizimu kukasa bantu mponga, u baSimeoni, nu baLawi, nu baYuda, nu baIsakari, nu baYosefu, nu baBenjamina. 13 Nu bikanga bibino byemane ga mwiduko wa Ebali kuswilila bantu, u baRubeni, nu baGadi, nu baAseri, nu baZebuluni, nu baDani, nu baNafutali. 14 BaLawi batende ku baIsraeli bansania n'iyuki inene bunee:
15 ‘Aswililwe wozo muntu wabaza nkisi aba kukita nkisi za kyuma, bukusombwa na Yehowa, mulimo wa mukulumizi, aba kuzibika kima ku kakungu.’
Nu bantu bansania bakule bunee: ‘Buligo.’
16 ‘Aswililwe wozo ukubenga isi nu nina.’
Nu bantu bansania bakule bunee: ‘Buligo.’
17 ‘Aswililwe wozo ukutikya kalolesio ka mwaga wa munyage.’
Nu bantu bansania bakule bunee: ‘Buligo.’
18 ‘Aswililwe wozo ukusondelezia kyuku mu nzila mbi.’
Nu bantu bansania bakule bunee: ‘Buligo.’
19 ‘Aswililwe wozo ukugalukya bwisanana bwa mugeni, aba nkubi aba musigala.’
Nu bantu bansania bakule bunee: ‘Buligo.’
20 ‘Aswililwe wozo ukwiyombeka na mukikulu w'isi, kubuno amona mundulu w'isi.’
Nu bantu bansania bakule bunee: ‘Buligo.’
21 ‘Aswililwe wozo ukwiyombeka na lukita lunsania lwa bituganwa.’
Nu bantu bansania bakule bunee: ‘Buligo.’
22 ‘Aswililwe wozo ukwiyombeka na mubitu, u mukinga w'isi aba wa nina.’
Nu bantu bansania bakule bunee: ‘Buligo.’
23 ‘Aswililwe wozo ukwiyombeka na ninabyala.’
Nu bantu bansania bakule bunee: ‘Buligo.’
24 ‘Aswililwe wozo ukwita munyage ku lumbisombiso.’
Nu bantu bansania bakule bunee: ‘Buligo.’
25 ‘Aswililwe wozo ukukata bikulo biteisanana buno eite muntu uteli na katati.’
Nu bantu bansania bakule bunee: ‘Buligo.’
26 ‘Aswililwe wozo utakwanza moki mansania ma milembe zeno nu kumakita.’
Nu bantu bansania bakule bunee: ‘Buligo.’”