Ikakizio lya bakikulu bakwiyana.
36
1 Bakulu ba kikanga kya Gileadi mwana wa Makiri, u mwana wa Manase, u babo ba bikanga bya Yosefu, bavule ku Musa, nu batendile lwabusio lwa Musa nu lwa bakulu ba baIsraeli bunee: 2 “Yehowa akakizizie mukota weitu Musa kutukasa bwiyani ku kwesa mbale ku baIsraeli bansania, nu mukota weitu akakizizibwe na Yehowa kukasa bwiyani bwa mubuto weitu, Zelofehadi, ku bakinga bage. 3 Nu bo, ndi basongwa na bamulume ba kingo kikanga kya baIsraeli, nti bwiyani bwabo bwatukibwa mu bwiyani bwa batateiswe nu kutalikilwa ku bwiyani bwa kikanga kibasongwa mukyo, nu bubo bwatukibwe mu bwiyani bwakaswa kutuli mu kwesa mbale. 4 Nu gakuvwa Mwaka wa Mbogimbogi wa baIsraeli, nti bwiyani bwabo bwatalikilwe ku bwiyani bwa kikanga kibeli mukyo. Bubo u bubo bwiyani bwabo bwatukibwe ku bwiyani bwa kikanga kya batateiswe.” 5 Nu Musa akakizizie baIsraeli anga bwatendaga Yehowa bunee: “Kitondo kyatendile babo ba kikanga kya Yosefu kisanana. 6 Ukinsa Yehowa akakizizie bakinga ba Zelofehadi buno basongwe na bamulume bakubatunda, tondo basongwe mu kikanga ky'isibo tugu. 7 Bubo bwiyani bwa baIsraeli tabutuke mu kikanga kikino kwenda ku kingo, kubuno muntu na muntu wa baIsraeli alange bwiyani bwa kikanga ky'isi. 8 Mukinga na mukinga uli na bwiyani mu kikanga kinsania abe mukikulu wa wamulume umozi wa kikanga ky'isi, buno baIsraeli beiyane bwiyani bwa beisibo. 9 Bubo bwiyani tabutuke mu kikanga kimozi kwenda ku kingo kikanga, tondo kikanga na kikanga kilange bwiyani bwakyo.”
10 Bakinga ba Zelofehadi bakitile anga bwakakizizie Yehowa ku Musa, 11 kubuno Mala nu Tirza nu Hogla nu Milka nu Noa, u bakinga ba Zelofehadi basongilwe na bamulume babutilwe na mibuto z'isibo. 12 Basongilwe mu kikanga kya baManase mwana wa Yosefu, nu bwiyani bwabo bwasigede mu kikanga ky'isibo.
13 Mamano meli makakizio nu nsungio zakakizizie Yehowa ku Musa nu ku baIsraeli mu kibitabita kya Moabu bwigi na Yordani kulolana na Yeriko.