Miino za baLawi.
35
1 Mu Kibitabita kya Moabu bwigi na Yordani kulolana na Yeriko, Yehowa abwide Musa bunee: 2 “Kakizia baIsraeli buno bakase ku baLawi miino za kwikala muzo buno zibe bwiyani bwabo. Lingo mwabakase biziki bya masoa bwigi na miino zabo. 3 Bakaba na miino za kwikala muzo, nu masoa mabo mabe ku bituganwa byabo binsania. 4 Masoa mamwakase ku baLawi mabe bwigi na miino zabo, ku ndenge insania mabe ku bulazi bwa mabusu kanunu kamozi (1.000) kulinga kuganza ku mukolo wa mwino. 5 Nu mwalindike mwaga wa masoa ma lulenge lwa kukutukaga kisongo kya busi wabe bulazi bwa mabusu tununu tubili (2.000), nu bungulu bwa mwaga wa ku lulenge lwa kwidume bwabe mabusu tununu tubili (2.000), nu bulazi bwa mwaga wa lulenge lwa kukwendaga kisongo kya busi bwabe mabusu tununu tubili (2.000), nu bulazi bwa mwaga wa ku lulenge lwa kwikazi bwabe mabusu tununu tubili (2.000), nu mwino munkatini. Masoa mabo mabe kubeli biziki bya kulisia bituganwa byabo. 6 Munkatini mwa miino zimwakase baLawi, mwasombole miino mutuba buno zibe miino za kutinina buno wozo wite ungo muntu atine kuko. Lingo mwabakase ingo miino makumi manazi nu ibili. 7 Ububo miino zimwakase baLawi zabe makumi manazi nu kinana. Mwabakase zo gamozi na masoa mabo. 8 Ku zeinyu zimwakaswe kuba bwiyani bweinyu, mwakase baLawi miino zabo. Kikanga kili kinene kyakase miino mingi, nu kikanga kili kikeke kyakase miino mikeke, tondo kikanga na kikanga kikase miino zimozi, bulingilingi na bwiyani bwakyo.” Miino z'itinino.
9 Nu Yehowa atendile ku Musa bunee: 10 “Tenda na baIsraeli nu kubabula bunee: ‘Kungwa mwasoka Yordani nu kwingila mu kisi kya Kanana, 11 nti mwasombola miino zabe miino za kutinina ko ku kabamba keinyu, buno muntu unsania wita ungo geteli kabamba atinine kuko. 12 Nu zezo miino zabe miino za kulanga ku wozo wa kusuba, buno wozo muntu wite ungo geteli kukengela kukita bubo ntakue aaba nu akwenda lwabusio lwa musanganano, kusungibwa nago, 13 nu munkatini mwa miino zezo zimwakase baLawi, miino mutuba zabe miino z'itinino kumuli. 14 Mwasombole miino isatu ku lulenge luluno lwa luuzi lwa Yordani, nu ingo miino isatu ku lisilya lya Yordani mu kisi kya Kanana. Zezo miino mutuba zabe miino z'itinino. 15 Zeno miino mutuba zabe miino za kutinina ko ku baIsraeli nu ku mugeni nu ku mutingi uli munkatini mweinyu, buno unsania ukwita ungo geteli kulongeka kumwita tanga, atinine ko. 16 Tondo ndi amulibula na kyuma buno akue, nti eli mwiti. Lebelebe akue. 17 Aba ndi amulibula n'ikozi ku kuboko kwage, nu ikozi linita muntu, nu we akua, nti eli mwiti. Lebelebe mwiti akue. 18 Kungwa amulibula na muti ku kuboko kwage, u muti wa kwita muntu, nu we akua, nti eli mwiti. Lebelebe mwiti akue. 19 Mwiya kusuba musubo wa mikila eite mwiti we wenyene. Nkungu za kukulumana nage nti amwite.
20 Ndi amusindika na lusombo, aba kumwisa kintu kya kumwita, nu we akua, 21 aba ndi mu bwiti amulibula na kuboko kwage buno akue, lebelebe wozo wamulibwide akue, kubuno eli mwiti. Wozo ukusuba musubo wa mikila eite mwiti nkungu za kukulumana nage.
22 Tondo kungwa amusindika kitangalabesi geteli bwiti, aba geteli kubisama, 23 aba ikozi linavwama kwita muntu, ndi akwisa lyo geteli kumumonako, nu we akua nu ntabezaga mwiti wage aba ntalondaga kumusumita, 24 nti musanganano watitike gasamba mwiti nu mwiya kusuba musubo wa mikila anga buli nsungio zeno. 25 Ububo musanganano watikye wozo ukwita ungo geteli bwiti ku kuboko kwa musubi, nu musanganano wamusubye ku mwino wage wa kutinina, ku wozo waatinininne ko, nu eikale ko aaba nu ku lukuo lwa sankoga munene wabongezibwe mwambo wasililila. 26 Tondo ndi wozo witile ungo geteli bwiti atinge isula lya mwino wage w'itinino ku nkungu insania, 27 nu wozo musubi wa mikila amusanga kumbuga kw'isula lya mwino, wozo musubi nti amwite nu ntabe na katati ka kumwita, 28 kubuno atunganana kwikala mu mwino wage w'itinino aaba nu ku lukuo lwa sankoga munene. Kumbusa kwa lukuo lwa sankoga munene wozo witile ungo geteli bwiti asubye ku kisi kyage kya bwiyani. 29 Makakizio mamano mabe nsungio zeinyu mu bibuti byeinu binsania nu mu biziki byeinu binsania.
30 Muntu unsania wita ungo akue ku bulongeki bwa balongeki, tondo kanua ka mulongeki umozi takanakuka kulongeka lukuo lwa muntu. 31 Lingo, tamukate bukuluzi bwa kalamo ka mwiti wa lebelebe, tondo ndi eli na katati ka lukuo lwa ungo, nti eitwe. 32 Lingo, tamukate bukuluzi bwa wozo witininne ku mwino w'itinino, buno ku kabamba kabo asubye kwage nu kwikala ko lwabusio lwa lukuo lwa sankoga munene. 33 Bubo tamwabigie kisi kimuli mukyo, kubuno mikila zikubigia kisi, nu takuli kisansa kinengia kisi ku mikila, ndi ta mikila za wozo wazibasizie. 34 Tamubigie kisi, aba kwisa nsese mu kisi kimuli mukyo, mu nkwikalaga nu Nne, kubuno Nne Yehowa, nkwikalaga munkatini mwa baIsraeli.’”