Myaga za kisi kya Kanana.
34
1 Nu Yehowa abwide Musa bunee: 2 “Kakizia baIsraeli bunee: ‘Nkungu zimwingile mu kisi kya Kanana, nti myaga za kisi zibe anga bubuno: Kisi kinsania kibe bwiyani bweinyu aaba nu ku myaga insania zakyo. 3 Mwaga weinyu wa ku lulenge lwa kwidume wabe kutukila Kalula ka Zini kuyanga mwaga wa Moabu nu kwendelela ku kuzinda kwa kitatenge kya Munkange; 4 mwagalukye mwaga wa ku lulenge lwa kwidume lwa kubakama kwa Akarabimu nu kwendelela ku Zini, nu ku lulenge lwa kwidume kwa Kadesi-Barnea, nu kwendelela ku Hazari-Adari, nu kutinga ku Azimoni. 5 Kumbusa kwa Azimoni mwaga wagaluke kwenda ku luuzi lwa Misri, nu kuyanga lulo luuzi aaba nu ku Kitatenge Kinene. 6 Mwaga weinyu wa lulenge lwa ku kwendaga musi wabe Kitatenge Kinene. Kikyo kitatenge kyabe mwaga weinyu wa lulenge lwa ku kwendaga kisongo kya busi.
7 Mwaga weinyu wa ku lulenge lwa kwikazi wabe kutukila Kitatenge Kinene, wayange mulindi wa mwaga wa ku Mwiduko wa Hori, 8 nu kutinga Mwiduko wa Hori wende ku Mwingilo wa Hamati. Mabasilo ma mwaga mabe ku Zedada, 9 nu ku Zifuroni, nu kuzinda kwago kwabe ku Hazari-Enani. Wono wabe mwaga weinyu wa ku lulenge lwa kwikazi.
10 Nu mwaga weinyu wa lulenge lwa kukutukaga kisongo kya busi wabe kutukila Hazari-Enani kwenda ku Sefamu, 11 nu kugela kutukila Sefamu ku Ribla aaba ku lulenge lwa kukutukaga kisongo kya busi lwa Aini aaba nu ku ntungo za kitatenge kyamanwa Kinereti, ku lulenge lwa kukutukaga kisongo kya busi, 12 nu kuyanga luuzi lwa Yordani aaba nu ku Kitatenge kya Munkange, nu kuzindila kuko. Zeno zibe myaga za kisi kyeinyu zikutimba kisi kinsania.’”
13 Ububo Musa akakizizie baIsraeli bunee: “Kikino kili kisi kimukeiyana ku kwesa mbale. Yehowa akakizizie kukikasa ku bikanga mubula nu kyindi, 14 kubuno bikanga bya baRubeni nu baGadi nu kyindi kya baManase byakatile bwiyani bwabo. 15 Bibyo bikanga bibili nu kyindi byakatile bwiyani bwabo ku lulenge luluno lwa Yordani, ku lisilya lya luuzi ku Yeriko, ku lulenge lwa kukutukaga kisongo kya busi.”
Basondelesza basombolwa kubegania kisi.
16 Kumbusa Yehowa abwide Musa bunee: 17 “Mamano meli meina ma bantu bamubeganizie kisi buno kibe bwiyani bweinyu: sankoga Eleazari nu Yosua mwana wa Nuni. 18 Nu mwatole musondelezia umozi ku kikanga na kikanga buno babeganie kisi kibe bwiyani bweinyu. 19 Mamo u meina ma bantu babo: Mu kikanga kya baYuda, Kalebu mwana wa Yefune. 20 Mu kikanga kya baSimeoni, Semweli mwana wa Amihudi. 21 Mu kikanga kya baBenjamina, Elidadi mwana wa Kisiloni. 22 Mu kikanga kya baDani, musondelezia wabo u Buki mwana wa Yogili. 23 Mu kikanga kya baYosefu, musondelezia wa kikanga kya baManase, Hanieli mwana wa Efodi. 24 Wozo musondelezia wa kikanga kya baEfuraimu, Kemueli mwana wa Sifutani. 25 Mu kikanga kya baZebuluni, musondelezia u Elizafani mwana wa Paranaki. 26 Musondelezia wa kikanga kya baIsakari, Paltieli mwana wa Azani. 27 Mu kikanga kya baAseri, musondelezia eli Ahihudi mwana wa Selomi. 28 Nu musondelezia wa kikanga kya baNafutali eli Pedeheli mwana wa Amihudi.”
29 Babano bantu beli babo bakakizizie Yehowa kubegania bwiyani bwa kisi kya Kanana ku baIsraeli.