Malo ma baIsraeli.
33
1 Zeno zili ngendo za baIsraeli batukile mu kisi kya Misri mu mayombo mabo kusondelezibwa na Musa nu Haruni. 2 Musa asanzile meina ma malo ma ngendo zabo anga bwakakizizibwe na Yehowa. Zeno u ngendo zabo anga bwabezaga malo mabo: 3 Batukile ku Ramesesi ku kindi ky'ikumi nu bitano kya mwezi mutangi, u busi buli kumbusa kw'Isuluko, u bubo busi batukile na bupuka lwabusio lwa baMisri bansania. 4 BaMisri babezaga bakuyika nkula zabo insania zalibwide Yehowa munkatini mwabo. Yehowa asungizie tulaga twabo gamozi na nkula. 5 BaIsraeli batukile ku Ramesesi, nu beiyombekile mu Sukoti. 6 Batukile ku Sukoti, nu beiyombekile mu Etamu guli ku mwaga wa kalula. 7 Batukile ku Etamu nu babasile ku Pi-Hahiroti guli ku lulenge lwa kukutukaga kisongo kya busi ku Bali-Zefoni. Beiyombekile bwigi na Migidoli. 8 Batukile ku kiziki kyabezaga bwigi na Pi-Hahiroti nu batingile munkatini mwa kitatenge nu kwingila mu kalula. Bendile lugendo lwa bindi bisatu mu Kalula ka Etamu; beiyombekile mu Mara. 9 Batukile ku Mara, nu bavule ku Elimu. Ku Elimu kwabezaga tunuabalongo ikumi nu tubili nu bibila makumi mutubakamo. Beiyombekile gago. 10 Batukile ku Elimu, nu babezaga n'ido ku ntungo za Kitatenge Kyakisimana. 11 Batukile ku Kitatenge Kyakisimana, nu beiyombekile mu Kalula ka Sini. 12 Batukile ku Kalula ka Sini, nu beiyombekile mu Dofuka. 13 Batukile ku Dofuka, nu beiyombekile mu Alusi. 14 Batukile ku Alusi, nu beiyombekile mu Refidimu; gago tagabezaga mazi ma kunua. 15 Batukile ku Refidimu, nu beiyombekile mu Kalula ka Sinai. 16 Batukile ku Kalula ka Sinai, nu beiyombekile mu Kiburoti-Hatava. 17 Batukile ku Kiburoti-Hatava, nu beiyombekile mu Hazeroti. 18 Batukile ku Hazeroti, nu beiyombekile mu Ritima. 19 Batukile ku Ritima, nu beiyombekile mu Rimoni-Perezi. 20 Batukile ku Rimoni-Perezi, nu beiyombekile mu Libuna. 21 Batukile ku Libuna, nu beiyombekile mu Risa. 22 Batukile ku Risa, nu beiyombekile mu Kehelata. 23 Batukile ku Kehelata, nu beiyombekile ku mwiduko wa Seferi. 24 Batukile ku mwiduko wa Seferi, nu beiyombekile mu Harada. 25 Batukile ku Harada, nu beiyombekile mu Makeloti. 26 Batukile ku Makeloti, nu beiyombekile mu Tahati. 27 Batukile ku Tahati, nu beiyombekile mu Tera. 28 Batukile ku Tera, nu beiyombekile mu Mitika. 29 Batukile ku Mitika, nu beiyombekile mu Hasimona. 30 Batukile ku Hasimona, nu beiyombekile mu Moseroti. 31 Batukile ku Moseroti, nu beiyombekile mu Beneyakani. 32 Batukile ku Beneyakani, nu beiyombekile mu Hori-Hagidigadi. 33 Batukile ku Hori-Hagidigadi, nu beiyombekile mu Yotibata. 34 Batukile ku Yotibata, nu beiyombekile mu Abarona. 35 Batukile ku Abarona, nu beiyombekile mu Ezioni-Geberi. 36 Batukile ku Ezioni-Geberi, nu beiyombekile mu Kalula ka Zini, u mu mwino wa Kadesi. 37 Batukile ku Kadesi, nu beiyombekile ku Mwiduko wa Hori, u mwaga wa kisi kya Edomu. 38 Nu Haruni sankoga abakamine Mwiduko wa Hori ku ikakizio lya Yehowa, nu akule gago mu mwaka wa makumi manazi kumbusa kwa kutuka kwa baIsraeli mu kisi kya Misri. Mu kindi kitangi kya mwezi w'itano wa wozo mwaka Haruni akule. 39 Abezaga eseli na myaka lukama makumi mabili nu isatu mu nkungu zakule ga Mwiduko wa Hori. 40 Nu mukota wa Aradi, u muKanana wikalaga mu Negevi, kyindi kya kisi kya Kanana, wozo mukota ungule buno baIsraeli besavwa. 41 Batukile ku Mwiduko wa Hori, nu beiyombekile mu Zalmona. 42 Batukile ku Zalmona, nu beiyombekile mu Punoni. 43 Batukile ku Punoni, nu beiyombekile mu Oboti. 44 Batukile ku Oboti, nu beiyombekile mu Iye-Abarimu, u mwaga wa kisi kya baMoabu. 45 Batukile ku Iye-Abarimu, nu beiyombekile mu Diboni-Gadi. 46 Batukile ku Diboni-Gadi, nu beiyombekile mu Almoni-Diblataimu. 47 Batukile ku Almoni-Diblataimu, nu beiyombekile ku Miduko za Abarimu, lwabusio lwa Mwiduko wa Nebo. 48 Batukile ku Miduko za Abarimu, nu beiyombekile mu kibitabita kya baMoabu bwigi na luuzi lwa Yordani kulolana na Yeriko. 49 Ido lyabo bwigi na luuzi lwa Yordani lyabezaga kutuka ku Beti-Yesimoti aaba nu ku Abeli-Sitimu mu Kibitabita kya Moabu.
Makakizio ma kukinda kisi kya Kanana.
50 Mu Kibitabita kya Moabu, bwigi na Yordani kulolana na Yeriko, Yehowa abwide Musa bunee: 51 “Tenda ku baIsraeli nu kubabula bunee: ‘Kungwa mwasoka Yordani nu kwingila mu kisi kya Kanana, 52 nti mwapumbia bantu bakwikala mu kikyo kisi, nu kuzikya nunsania makozi mabo mabazwa kuba nkisi, kuzikya nkisi zabo insania za kunyengula, nu kuzikya biziki binsania byabo bya gantata ga miduko. 53 Mwiyane kisi kinsania nu kwikala mukyo, kubuno namukasile kyo buno mwakiyane. 54 Nu mwabeganie kisi na kwesa mbale kukiyana munkatini mwa bikanga byeinyu. Ku kikanga kinene mwakase bwiyani bunene, nu ku kikanga kikeke mwakase bwiyani bukeke. Bwiyani bwa kikanga na kikanga bwabe mu kwesa mbale. Mwiyane, na muntu na muntu anga bwabede mu kikanga ky'isi. 55 Tondo ndi tamwapumbia bantu bakwikalaga mu kisi, nti babo basigala babe anga nsinge ku meiso meinyu nu mikele mu mpege zeinyu, nu bamwitie na kabebe mu kisi mumwikalage. 56 Lingo kwabe buno anga bunakengelaga kubakitila, u bunamukitile nu inyuwe.’”