Bikanga bya lisilya lya luuzi lwa Yordani.
32
1 Bantu ba kikanga kya baRubeni nu ba kikanga kya baGadi babezaga na bituganwa bingi nunse, nu nkungu zibamonine ku kisi kya Yazeri nu ku kisi kya Gileadi buno byabezaga bisoga bya kulanga bituganwa, 2 baGadi nu baRubeni bavule ku Musa nu bamubwide bunee: 3 “Ataroti nu Diboni nu Yazeri nu Nimura nu Hesiboni nu Eleale nu Sebamu nu Nebo nu Beoni, 4 mu kisi kikino kyakindide Yehowa ku baIsraeli, zili miino misoga mu kisi kisoga kya kulanga bituganwa, nu tuli na bituganwa bingi nunse. 5 Ukinsa tukase kyo kuba bwiyani bweitu, ndi bwatunganana, nu ntutusokie luluno luuzi lwa Yordani.” 6 Musa akwide baGadi nu baRubeni bunee: “Ndi mibuto zeinyu zende ku bita kungwa mwasigala gano? 7 Kubuni mukutambia mitima za mibuto zeinyu buno tabasoke luuzi nu kwingila mu kisi kyabakasile Yehowa? 8 Basoinyuwe bakitile bubo nkungu zinabasingile kutuka mu Kadesi-Barnea nu kutambula kisi. 9 Kubuno gabendile ku kibitabita kya Eskoli nu bamonine kisi, bakutizie mitima za baIsraeli, nu ku kabamba kako tabeingide mu kisi kyabakasile Yehowa. 10 Ukinsa bongoa bwa Yehowa bwabede bukali busi bubo, nu alagile idagano gaatendile bunee: 11 ‘Lebelebe takuli muntu umozi wa babo bantu batukile mu kisi kya Misri kutukila myaka makumi mabili nu kutinga wamone ku kisi kinalagile kukasa ku Abrahamu nu Isaka nu Yakobo, kubuno tabanyangile nunse, 12 tugu Kalebu, u mwana wa Yefune muKenizi, nu Yosua, u mwana wa Nuni, bakakimona kubuno bayangile Yehowa nunsania.’ 13 Bongoa bwa Yehowa bwabede bukali nunse ku baIsraeli, nu abenzizie na ko na ko mu kalula myaka makumi manazi aaba nu kibuti kikyo kinsania kyakitile bubi ku Yehowa kyazikile. 14 Tamukumona buno mwemanukile ku kiziki kya basoinyuwe? Muli kibombo kya beiya bwagi, nu mwatalika lingo bongoa bwa Yehowa buno bwitile nunse ku baIsraeli. 15 Ndi mwagaluka bulazi buno tamukuyanga Yehowa, nti abasige lingo mu kalula, nu inyuwe nti mwabe na katati ka kwita bantu babano bansania.”
16 Nu bamukundile nu kumwakula bunee: “Tobake mikumba za bituganwa byeitu nu miino buno bana beitu beikale muzo, 17 tondo iswe tubenyene twabe kayikayika na ngabo zeitu kutanga lwabusio lwa bango baIsraeli aaba nu twabeikye ku biziki byabo. Bana beitu beikale mu miino zili na mikolo ku kabamba ka beiya kisi. 18 Tatwasubye ku numba zeitu aaba nu baIsraeli bansania bakeiyana bwiyani bwabo, na muntu na muntu bwage. 19 Kubuno tatwiyane gamozi nabo kisi kili lisilya lya Yordani, kubuno bwiyani bweitu buli ku ntungo zeno za Yordani za kukutukaga kisongo kya busi.”
20 Musa abakwide bunee: “Ndi mwakita kitondo kikino, ee, ndi mwakate ngabo buno mwende ku bita lwabusio lwa Yehowa, 21 nu muntu na muntu wa munkatini mweinyu uli na ngabo asoke Yordani lwabusio lwa Yehowa, nu gabe asila kupumbia beiti bage lwabusio lweinyu, 22 nu kisi kinsania kyakindwa lwabusio lwa Yehowa, nti mwasubye kweinyu nu tamwabe na katati ka bwagi lwabusio lwa Yehowa, nu nti kisi kikino kyabe bwiyani bweinyu lwabusio lwa Yehowa, 23 tondo ndi tamwakita bubo, nti mwagile Yehowa, nu menyazi buno bwagi bweinyu bwamusubanizie. 24 Obakazi miino za bana beinyu, nu obakazi mikumba za mikoko zeinyu. Kitazi anga bumwatendile na kanua keinyu.”
25 Nu baGadi nu baRubeni balagile Musa bunee: “Bakiti bobe bakite anga bwakakizizie mukota weitu. 26 Bakikulu beitu nu bana beitu babe mu miino za Gileadi gamozi na bituganwa byeitu, 27 tondo bakiti bobe basoke luuzi lwabusio lwa Yehowa ku bita, na muntu na muntu na ngabo zage, anga bwatenda mukota weitu.”
28 Kumbusa Musa akakizizie Eleazari sankoga nu Yosua, mwana wa Nuni, nu bakulu ba bikanga bya baIsraeli. 29 Musa ababwide bunee: “BaGadi nu baRubeni, ndi basoka Yordani gamozi n'inyu, muntu na muntu na ngabo zage, lwabusio lwa Yehowa, nu kisi kyakindwa lwabusio lweinyu, nti mwabakase kisi kya Gileadi buno kibe bwiyani bwabo. 30 Tondo ndi tabasoka gamozi n'inyu na ngabo zabo, nti babe na bwiyani munkatini mweinyu mu kisi kya Kanana.”
31 BaGadi nu baRubeni bakwide bunee: “Twakite anga bwatukakizizie Yehowa ku bakiti bobe. Ee, bubo u butwakite. 32 Twasoke na ngabo zeitu lwabusio lwa Yehowa kwingila mu kisi kya Kanana, tondo bwiyani bweitu bwabe ku lino isa lya Yordani.”
33 Ku baGadi nu baRubeni nu ku kyindi kimozi kya bibili kya baManase (isibo Manase abutilwe na Yosefu), Musa akasenne bukota bwa Sihoni mukota wa baAmori nu bukota bwa Ogi mukota wa Basani. Abakasile kisi kikyo na miino zabezaga mu myaga zakyo gamozi na miino zatimbile myaga za kisi. 34 BaGadi bobakile miino za Diboni nu Ataroti nu Aroeri 35 nu ungo Ataroti nu Sofani nu Yazeri nu Yogibea 36 nu Beti-Nimira nu Beti-Harani, u miino zabezaga na mikolo nu mikumba za mikoko.
37 BaRubeni bobakile Hesiboni nu Eleale nu Kiriataimu 38 nu Nebo nu Bali-Meoni (izina lya mwino wono lyagalukizibwe) nu Sibuma, nu beinikile miino zibobakile meina mato.
39 BaMakiri ba kikanga kya baManase, bendile ku Gileadi nu kukikinda. Bapumbizie baAmori babezaga ko. 40 Ukinsa Musa akasile baMakiri, u baManase, kisi kya Gileadi, nu beikede mukyo. 41 Nu Yairi mwana wa baManase endile nu akindile miino mikeke za kikyo kisi, nu azimanine Hawoti-Yairi. 42 Noba endile ku Kenati nu agukindile gamozi na miino mikeke zabezaga bwigi, nu agumanine Noba anga bwabezaga izina lyage.