Kusubwa kwa baIsraeli ku baMidiani.
31
1 Yehowa abwide Musa bunee: 2 “Suba musubo wa baIsraeli ku baMidiani. Kumbusa kwa kukita bubo wakundamanibwe na baso.” 3 Musa atendile ku bantu bunee: “Sombolazi gamusamba, bantu bamozi buno batole ngabo nu kwenda kwitana na baMidiani, kusuba musubo wa Yehowa ku baMidiani. 4 Mu kikanga na kikanga ku bikanga binsania bya baIsraeli, sombolazi bantu kanunu kamozi nu kubasinga ku bita bibino.”
5 Ukinsa basombwede ku bakoloboyo bansania ba baIsraeli kanunu kamozi ka kikanga na kikanga, u bantu tununu ikumi nu tubili (12.000) beiya ngabo. 6 Musa abasingile ku bita, babo bantu kanunu kamozi ka kikanga na kikanga kya baIsraeli. Abasingile gamozi na Finehasi, mwana wa Eleazari sankoga, na bintu byasililila nu monze wa bita ku maboko mage. 7 Nu beitenne na baMidiani anga bwakakizizie Yehowa ku Musa, nu beitile bamulume bansania. 8 Gamozi na bango beitilwe, beitile bakota ba baMidiani, u Evi nu Rekemu nu Zuri nu Huri nu Reba. Babo batano babezaga bakota ba baMidiani, nu bakoloboyo ba baIsraeli babeitile gamozi na Balama, mwana wa Beori. Bamwitile na mwene wa nganda.
9 Bantu ba baIsraeli bakandile bakikulu ba baMidiani gamozi na bana babo, nu ngombe zabo insania nu mikoko zabo insania, nu binsania byabo. 10 Bagisizie miino insania za baMidiani nu biziki bibeikalaga mubyo nu matinino mabo, 11 nu banyagile binsania byasigede, nu nyama nu bantu. 12 Balusizie ku Musa nu ku Eleazari sankoga nu ku baIsraeli bansania basigede mu ido lyabo, babo bantu nu nyama nu bintu. Ido lya baIsraeli lyabezaga mu kisi kya baMoabu, bwigi na luuzi lwa Yordani, kulolana na mwino wa Yeriko.
13 Musa, nu sankoga Eleazari, gamozi na mitonge za musanganano, bendile ku isula ly'ido, kukulumana na bakoloboyo. 14 Musa ongedwe bakota ba bakoloboyo, u bakota ba tununu, nu bakota ba lukama gabasubizie kutuka ku bita. 15 Musa ababwide bunee: “Kubuni mwitabizizie bakikulu bansania kulama? 16 Kengelazi buno babano bayangile lwango lwa Balama, nu kuluta baIsraeli kwagila Yehowa ku kitondo kya Peori, nu kyabede nsungio mu musanganano wa Yehowa 17 Ku kabamba kakano itazi bana bamulume bansania ba munkatini mwabo, nu itazi mukikulu na mukikulu wizi wamulume mu kwiyombeka nage, 18 tondo mulange ku kabamba keinyu bakinga bansania bateizi bamulume kwiyombeka nabo. 19 Nu inyuwe, mwikale ku isula lya mwino bindi mutubakamo. Muntu unsania witile muntu, nu muntu unsania witubizie ku mukuzi aba kitumba, nti eiyengie busi bw'isatu nu lingo busi bwa mutubakamo. 20 Engiazi nsulu insania, ndi zakitwa na kikoba kya nyama, aba ndi zalukwa na myoza za mpene, nu engiazi binsania byakitilwe na muti.”
21 Nu sankoga Eleazari atendile ku bantu babo bendile ku bita bunee: “Lilino lili ikakizio lyakakizizie Yehowa ku Musa bunee: 22 ‘Olo nu feza, nsubi nu kyuma, bati nu risasi, 23 u bibyo byasigala mu keiya, nti mwabyengie mu kubibika mu keiya, nu byengibwe, nu kumbusa mwabisuge na mazi ma kwengia. Binsania byagisibwe mu keiya, nti mwabisuge na mazi. 24 Nu inyuwe mwasuge nsulu zeinyu busi bwa mutubakamo, nu kuzivwala, nu mwengibwe. Kusila mwingile mu mwino.’”
Kubeganibwa kwa bantu nu bintu byanyagilwe.
25 Nu Yehowa abwide Musa bunee: 26 “Ganza byanyagilwe, u bantu nu nyama. Uwe nu Eleazari sankoga nu banene ba bikanga bya musanganano unsania, mubaganze, 27 nu mubeganie bansania banyagilwe nu nyama insania zanyagilwe ku bibombo bibili, kimozi kya babo bendile ku bita nu kingo kimozi ku bantu ba musanganano. 28 Tikya kyindi kya Yehowa ku kibombo kya babo bendile ku bita anga bubuno: ku bantu nkama itano tikya muntu umozi, nu ku nyama anga bubo: ku nyama nkama itano, nyama emozi ndi ku ngombe, aba mpunda, aba mikoko. 29 Tola kyindi kikyo nu kukikasana ku Eleazari sankoga buno kibe kayulo ka kusakikwa ku Yehowa. 30 Ku kibombo kikyo kili kya musanganano, tikya anga bubuno: ku bantu makumi matano tikya umozi, ku bantu nu ku bituganwa. Bakasanwe gamozi na bituganwa ku baLawi bakulangaga Numba za Hema za Yehowa.” 31 Musa nu sankoga Eleazari bakitile anga bwababwide Yehowa.
32 Bibyo byanyagilwe, byanyagile babo bendile ku bita, byabezaga mikoko tununu nkama mutuba, makumi mutubakamo nu tutano (675.000), 33 nu ngombe tununu makumi mutubakamo nu tubili (72.000), 34 nu mpunda tununu makumi mutuba nu kamozi (61.000), 35 nu lingo, bakikulu tununu makumi masatu nu tubili (32.000) batamenyine wamulume ku kuyama nage. 36 Kyindi kya babo bendile ku bita kyabezaga mikoko tununu makumi masatu nu mutubakamo, nkama itano (37.500), 37 nu kyindi kya Yehowa kya kibombo kikino kyabezaga mikoko nkama mutuba, makumi mutubakamo nu itano. 38 Ngombe za kibombo kikino zabezaga tununu makumi masatu nu mutuba (36.000), nu kyindi kya Yehowa kyabezaga ngombe makumi mutubakamo nu ibili. 39 Mpunda zakyo zabezaga tununu makumi masatu, nkama itano (30.500), nu kyindi kya Yehowa kyabezaga makumi mutuba nu emozi. 40 Bantu bakyo babezaga bakikulu tununu ikumi nu mutuba (16.000), nu kyindi kya Yehowa kyabezaga bakikulu makumi masatu nu babili. 41 Musa akasile Eleazari kyindi kya Yehowa, anga lukalilo lwage, bakikulu nu bituganwa bibino binsania bibe kayulo ka kusakikwa ku Yehowa, anga bwakakizizie Yehowa ku Musa.
42 Ku kibombo kikyo kya musanganano wa baIsraeli kyabeganizie Musa ku binyagile bantu ba bita, 43 u kibombo kya mikoko tununu makumi masatu nu mutubakamo, nkama itano (37.500), 44 nu kya ngombe tununu makumi masatu nu mutuba (36.000), 45 nu kya mpunda tununu makumi masatu, nkama itano (30.500), 46 nu kya bantu tununu ikumi nu mutuba (16.000); 47 Musa atikizye ku kibombo kikyo muntu umozi munkatini mwa makumi matano, nu ku bituganwa lingo, ku makumi matano atikizye kimozi, nu akasile bituganwa nu bantu ku baLawi bakulangaga Numba za Yehowa, anga bwakakizizie Yehowa ku Musa.
48 Bakota banene ba babo bendile ku bita, u basondelezia ba mayombo, bakota ba tununu twa bantu nu ba nkama za bantu, bakundile Musa, 49 nu bamubwide bunee: “Bakiti bobe baganzile bantu bendile n'iswe babezaga ku makakizio meitu, nu tuli gano bansania, takuli umozi wida kusubya. 50 Ukinsa twavwa na kayulo ka Yehowa, u bibyo bitwamonine na muntu na muntu, bintu bya olo nu bitali nu bikuku nu tukomu twa kakengelezio nu byakuvwala ku matuzi nu miyololo za byakuvwala ku makosi, buno bitukulumanie na Yehowa.”
51 Ububo Musa nu Eleazari sankoga bakatile bikagi bibyo bibavule nabyo, u mamo malebo ma olo. 52 Bukunza bwa malebo mamo ma olo makasenne bakota ba beiya bita ku Yehowa, babo basondelezia ba tununu nu babo ba nkama, bwabezaga shekeli tununu ikumi nu mutuba, nkama mutubakamo nu makumi matano (16.750).a 53 Bakoloboyo banyagile bintu, nawe nawe na byage. 54 Musa nu sankoga Eleazari bakatile malebo mamo ma olo mabakasilwe na bakota ba beiya bita, u basondelezia ba tununu nu ba nkama, nu bamabikile mu Numba za Kukulumana na Yehowa, mabe kakengelezio ku baIsraeli lwabusio lwa Yehowa.