Makakizio ma bilumbilo.
30
1 Musa abwide bakota ba bikanga bya baIsraeli bunee: “Yehowa akukakizia kitondo kikino, bunee: 2 ‘Kungwa muntu akulumbila ku Yehowa kilumbilo aba kulumbila ungo muntu kilumbilo kya kumukitila, nti ntalumbile buliabulia tondo akite lebelebe binsania byalumbide. 3 Kungwa mukinga uki wikala mu numba z'isi alumbila ku Yehowa kilumbilo kya kukita kitondo kinsania kyakulaga kukikita, 4 nu isi akungwa kikyo kilumbilo kyage aba idagano lyage tondo ntakumuzugila aba kumutenda iyuki limozi, nti kilumbilo kyage kinsania nu malagano mage mansania maalumbide, matunganana kukitwa nunse. 5 Tondo ndi isi akungwa kilumbilo aba idagano lyage nu amuzugila nu kutamuzigila kulikita, nti kilumbilo kyage kinsania nu malagano mage mansania maalumbide, tamakitwe, nu Yehowa akamukandula kumo mansania kubuno isi ntamuzigile kumakita.
6 Nu ndi asongwa kumbusa kwa kulumbila kilumbilo aba kutenda lubilo idagano lya kukita kitondo kimozi, 7 nu iba wage akungwa kikyo kilumbilo aba lilyo idagano nu ntakutenda kena kweli, nti kilumbilo kyage kinsania nu malagano mage mansania maalumbide makitwe. 8 Tondo ndi iba wage amunania ku busi bwakungwa, nti akite malagano mage kuba bulia nu kutenda kwage kwasasizie kutenda na milomo zage geteli kukengela kwalumbide na mutima wage, nu Yehowa amusigilile. 9 Tondo idagano lya musigala aba wozo wasigwa, kitondo na kitondo kyalumbide na mutima wage kikale kweli. 10 Nu ndi akasa idagano mu numba z'iba wage, aba ndi akanda mutima wage ku kilumbilo aba n'idagano, 11 nu iba wage akungwa nu kwikala kibibi, nu ntamuzugila, nti malagano mage mansania meikale, nu kilumbilo na kilumbilo kyalumbide mu mutima kyakokomene. 12 Tondo ndi iba wage amakanda nu kumakita kuba bulia busi bwakungwa, nti kitondo na kitondo kyatukile mu milomo zage mu malagano mage, aba kilumbilo kya mutima wage takikale. Iba akikite kuba bulia, nu Yehowa amusigilile. 13 Idagano n'idagano, nu kilumbilo na kilumbilo kya kwikanda nakyo buno akuzie mutima wage na kabebe, iba wage anavwama kukikokomezia aba kukikita kuba bulia. 14 Tondo ndi iba wage eikala kibibi nunse busi na busi, nti akukokomezia malagano mage mansania nu bilumbilo byage binsania, nu nti bili kweli. Akubikokomezia kubuno amwikalide kibibi bubo busi bwabyungule. 15 Tondo ndi abikita kuba bulia busi bwabyungule, nti iba eeke bwagi bwa mukikulu wage.’”
16 Mamano meli makakizio makakizizie Yehowa ku Musa, u makakizio meli gasamba muntu nu mukikulu wage, nu meli gasamba mukinga nu isi mu bindi byeli mukinga mu numba z'isi.