Tuyulo twa kisagulo kya myonze.
29
1 Nu atendile lingo bunee: ‘Busi butangi bwa mwezi wa mutubakamo mube na musanganano wasililila, nu tamukite mulimo unsania bubo busi. Buli busi bwa kwida myonze kumuli. 2 Mukase kayulo kakutananizia Yehowa na nsunu nsoga, u kayulo ka kugisia nunse mutoka wa mulume wa ngombe, nu kilimba kya mukoko nu bilimba mutubakamo bya mikoko bya mwaka umozi. Nyama insania zibe nsoga nunse geteli kabalibango. 3 Gamozi na mulume wa ngombe, kasanazi kayulo ka bunga busoga bwakuka ku byanzi bisatu bwasambikwa na makiti. Gamozi na kilimba kya mukoko mukase kayulo ka bunga busoga bwakuka ku byanzi bibili bwasambikwa na makiti, 4 nu gamozi na bilimba bya mikoko, ku kilimba na kilimba mukase kayulo ka bunga bwakuka ku kyanzi kimozi bwasambikwa na makiti. 5 Lingo mukasane kilimba kya mpene kili kisansa kya bwagi kumukitila bukulumania. 6 Tuyulo tuto nu kisansa kikyo byakaswe gamozi na kayulo ka busi butangi bwa mwezi nu kayulo ka busi na busi nu tuyulo twato twa bunga busoga nu tuto twa kunua, anga bunakakizizie kalazi. Tuyulo tuto tunsania, tuto twa busi na busi, tuto twa busi butangi bwa mwezi na mwezi, nu tuto twa busi butangi bwa mwezi wa mutubakamo, tukaswe ku Yehowa mu keiya. Tugisibwe nunse, nu twabe nsunu nsoga zikutananizia Yehowa. Tuyulo twa busi bwa kukulumania.
7 Mu busi bwa kindi ky'ikumi kya mwezi wono wa mutubakamo mube na musanganano wasililila nunse; tamulie idia, nu tamukite mulimo unsania. 8 Kasanazi ku Yehowa kayulo ka nsunu nsoga, u kayulo ka kugisibwa ka mutoka wa mulume wa ngombe nu kilimba kya mukoko gamozi na bilimba mutubakamo bya mikoko za mwaka umozi. Bibyo binsania bibe bisoga nunse geteli kabalibango. 9 Gamozi na mulume wa ngombe, kasanazi kayulo ka bunga busoga bwakuka ku byanzi bisatu bwasambikwa na makiti, nu gamozi na kilimba kya mukoko, kasanazi bunga busoga bwakuka ku byanzi bibili bwasambikwa na makiti, 10 nu gamozi na kilimba na kilimba kya mikoko, kasanazi bunga busoga bwakuka ku kyanzi kimozi bwasambikwa na makiti. 11 Lingo kasanazi kilimba kya mpene u kisansa kya bwagi, gamozi na kisansa kya bwagi kya bubo busi bwa kukulumania bantu, nu kayulo kakugisibwa ka busi na busi, gamozi na tuyulo twa kugisibwa twa bunga busoga nu tuyulo twa kunua.
Tuyulo twa bindi bya kwikala ga nusu.
12 Ku busi bwa kindi ky'ikumi nu bitano kya mwezi wa mutubakamo mukundamane mu musanganano wasililila, nu tamukite mulimo unsania. Musanganano wabe wa bindi mutubakamo, u bindi binene bya Yehowa. 13 Ku busi butangi bwago, mukasane kayulo kagisibwe mu keiya u nsunu nsoga ku Yehowa, keli kayulo ka balume ba ngombe beteli bakulu ikumi nu basatu, nu bilimba bibili bya mikoko nu byana ikumi nu binazi bya mikoko bya mwaka umozi. Bibino binsania bibe bisoga nunse, geteli kabalibango. 14 Gamozi na mulume na mulume wa babo balume ikumi nu basatu ba ngombe, kasanazi kayulo ka bunga busoga bwakuka ku byanzi bisatu bwasambika na makiti, nu na kilimba na kilimba kya mukoko, kasanazi kayulo ka bunga busoga bwakuka ku byanzi bibili bwasambikwa na makiti, 15 nu gamozi na kilimba na kilimba kya mikoko kya mwaka umozi, kasanazi bunga busoga bwakuka ku kyanzi kimozi bwasambikwa na makiti. 16 Lingo mwakasane kilimba kya mpene kili kisansa kya bwagi, nu gamozi nakyo kayulo kakugisibwa ka busi na busi nu kayulo ka kunua.
17 Ku busi bw'ibili bwa bindi bibyo mukasane balume ikumi nu babili ba ngombe beteli bakulu nu bilimba bibili bya mikoko nu byana ikumi nu binazi bya mikoko bya mwaka umozi. Bibyo binsania bibe bisoga nunse geteli kabalibango. 18 Gamozi na balume ba ngombe nu bilimba bya mikoko, bibyo bikulu nu bibyo bya mwaka umozi, kasanazi kayulo ka bunga busoga nu kayulo ka kunua kaswaga ku zezo nyama anga bwakakizizibwe kalazi. 19 Lingo mukasane kisansa kya bwagi kya kilimba kya mpene, nu kayulo ka busi na busi gamozi na kayulo ka bunga busoga nu ka kunua.
20 Ku busi bw'isatu, mukasane balume ikumi nu umozi ba ngombe beteli bakulu, nu bilimba bibili bya mikoko, nu byana ikumi nu binazi bya mikoko bya mwaka umozi, nu bibyo binsania bibe bisoga nunse geteli kabalibango. 21 Gamozi nabyo, ku nyama na nyama, mukasane kayulo ka byanzi bya bunga busoga nu kayulo ka kunua ku malega mazo anga bwakakizizibwe kalazi. 22 Lingo kutalika kubyo, mukasane kayulo ka kilimba kya mpene kili kisansa kya bwagi, nu anga bumwakasanaga busi na busi, kasanazi kayulo ka busi na busi gamozi na kayulo ka bunga nu kayulo ka kunua.
23 Ku busi bw'inazi bwa bindi bibyo, mukasane balume ikumi ba ngombe beteli bakulu, nu bilimba bibili bya mikoko, nu byana ikumi nu binazi bya mikoko byili bya mwaka umozi. Binsania bibe bisoga nunse geteli kabalibango. 24 Gamozi nabyo mukasane tuyulo twa bunga busoga bwasambikwa na makiti, ku nyama na nyama byanzi byazo, nu malega anga bwakakizizibwe kalazi. 25 Ku busi bubo lingo mukasane kisansa kya bwagi, u kilimba kya mpene, nu tuyulo twa busi na busi, kako ka kugisibwa mu nindunindu nu mwigolo, gamozi na tuyulo twato twa bunga nu twa kunua.
26 Ku busi bw'itano, mukasane balume mubula ba ngombe beteli bakulu, nu bilimba bibili bya mikoko, nu byana ikumi nu binazi bya mikoko byili bya mwaka umozi. Bibyo binsania bibe bisoga nunse nu geteli kabalibango. 27 Gamozi nabyo, mukasane tuyulo twa bunga busoga nu kayulo ka kunua, ku nyama na nyama byanzi byazo na malega anga bwakakizizibwe kalazi. 28 Ku busi bubo lingo mukasane kisansa kya bwagi, u kilimba kya mpene, nu tuyulo twa busi na busi gamozi na tuyulo twato twa bunga nu twa kunua.
29 Ku busi bwa mutuba, mukasane balume kinana ba ngombe beteli bakulu, nu bilimba bibili bya mikoko, nu byana ikumi nu binazi bya mikoko byili bya mwaka umozi. Bibyo binsania bibe bisoga nunse geteli kabalibango. 30 Gamozi nabyo mukasane tuyulo twa bunga nu twa kunua, ku nyama na nyama byanzi byazo na malega anga bwakakizizibwe kalazi. 31 Ku busi bubo lingo mukasane kisansa kya bwagi, u kilimba kya mpene, nu tuyulo twa busi na busi gamozi na tuyulo twato twa bunga nu twa kunua.
32 Ku busi bwa mutubakamo, mukasane balume mutubakamo ba ngombe beteli bakulu, nu bilimba bibili bya mikoko, nu byana ikumi nu binazi bya mikoko byili bya mwaka umozi. Bibyo binsania bibe bisoga nunse geteli kabalibango. 33 Gamozi nabyo mukasane tuyulo twa bunga nu twa kunua, ku nyama na nyama byanzi byazo bya bunga, nu malega ma bya kunua anga bwakakizizibwe kalazi. 34 Ku busi bubo lingo mukasane kisansa ku bwagi, u kilimba kya mpene, nu tuyulo twa busi na busi, gamozi na tuyulo twato twa bunga nu twa kunua.
35 Ku busi bwa kinana mube na musanganano wasililila, nu tamukite mulimo unsania, 36 tondo mukasane kayulo kakugisibwa nunsania mu keiya, kabe nsunu nsoga za kutananizia Yehowa. Kabe kayulo ka mutoka wa mulume umozi wa ngombe, nu kilimba kya mukoko, nu bilimba mutubakamo bya mikoko bya mwaka umozi. Bibyo binsania bibe bisoga nunse geteli kabalibango. 37 Gamozi nabyo, ku nyama na nyama, mukasane kayulo ka bunga nu ka kunua ku byanzi nu malega makakizizibwe kalazi. 38 Ku busi bubo lingo, mukasane kisansa kya bwagi, u kilimba kya mpene nu tuyulo twa busi na busi gamozi na tuyulo twato twa bunga nu twa kunua.
39 Gantata ga tuyulo tweinyu twa malagano meinyu, nu twa mitima zeinyu, mukasane ku Yehowa tutuno tuyulo ku bindi byeinu binene, u tuyulo twa kugisibwa nu twa bunga nu twa kunua nu twa bubobelelo.’”
40 Musa asolede baIsraeli binsania byamukakizizie Yehowa.