Tuyulo twa busi na busi.
28
1 Yehowa akakizizie Musa bunee: 2 “Kakizia baIsraeli bunee: ‘Mwidange buno mukasane idia lya tuyulo twa kugisibwa kundi mu nkungu zato. Tuto tuyulo tuli nsunu nsoga kundi.’ 3 Babule lingo bunee: ‘Tutuno tuli tuyulo tumukasane ku Yehowa mu nzila za kutugisia mu keiya: Byana bibili bya mikoko bya mwaka umozi geteli kabalibango byili tuyulo twa kugisibwa na busi na busi. 4 Mukasane kyana kya mukoko kimozi mu nindunindu, nu kingo mwigolo. 5 Na kyo na kyo, kasanazi kyindi ky'ikumi kya kyanzi kinene a kya bunga busoga bwasambikwa na makiti makuka ku idega b Makiti mamo mabe mamo matuka ku kiguma zeituni. 6 Kayulo kakano keli kayulo ka kugisibwa mu keiya, kakakizizie Yehowa gamwabezagile kuko ku Mwiduko Sinai, nu keli nsunu nsoga kweli, u kayulo ka kugisibwa. 7 Nu kayulo ka kunua kakaswa gamozi nako, kabe maku ma biguma makuka ku idega limozi, nu makaswe na kyana na kyana kya mukoko. Mu Kiziki Kyasililila mwakubulile Yehowa kako kayulo ka kunua. 8 Mwigolo lya busi na busi, kasanazi kyana kya bibili kya mukoko, gamozi na kayulo ka bunga nu kayulo ka kunua, tuli bumozi nu tuto twa nindunindu. Tutuno tuli tuyulo twakasanwa ku Yehowa mu nzila za keiya, u nsunu nsoga zikutananizia Yehowa. Tuyulo twa Busi bwa Kumunwa, u Sabato.
9 Nu busi bwa Sabato, kasanazi byana bibili bya mikoko gamozi na byanzi bibili c bya bunga bwasambikwa na makiti ma zeituni nu kayulo ka kunua ka maku. 10 Kakano keli kayulo ka busi na busi bwa kumunwa, kutalikilwa ku tuyulo twa busi na busi twa kugisibwa nu twa kunua.
Tuyulo twa busi butangi bwa mwezi.
11 Ku busi butangi bwa mwezi na mwezi, kasanazi ku Yehowa kayulo ka byana bibili bya ngombe bya balume nu kilimba kimozi kya mukoko gamozi na bilimba mutubakamo bya mikoko bya mwaka umozi. Nyama zezo insania zibe nsoga nunse, geteli kabalibango. 12 Gamozi na kyana kya ngombe za mulume kasanazi byanzi bisatu d bya bunga busoga bwasambikwa na makiti ma zeituni. Gamozi na kilimba kya mukoko, kasanazi byanzi bibili bya bunga busoga bwasambikwa na makiti ma zeituni, buli tuyulo twa bunga bwa kugisibwa. 13 Gamozi na kyana na kyana kya mukoko, kasanazi kayulo ka bunga bwakuka ku kyanzi kimozi, na bunga bwasambikwa na makiti ma zeituni. Bubo bunga buli kayulo ka kugisibwa ku Yehowa, u nsunu nsoga nu kayulo kakaswa mu nzila za keiya. 14 Gamozi na mulume na mulume wa ngombe, kasanazi malega mabili e ma maku, nu gamozi na kilimba kya mukoko, kasanazi idega limozi nu kyindi kya maku, nu na byana bya bilimba bya mikoko kasanazi, na kilimba na kilimba, idega limozi lya maku. Tutuno tuli tuyulo twa kugisibwa twakaswe mu nzila za keiya ku busi butangi bwa mwezi na mwezi, u busi bwa mbalo. 15 Nu gamozi na tuyulo twa busi na busi nu tuyulo twa kunua, talikazi lingo kisansa kimozi kya bwagi kili kilimba kya mpene kyakasanwa ku Yehowa mu nzila zazo.
Tuyulo twa Kisagulo ky'Isuluko.
16 Ku kindi ky'ikumi nu binazi, kya mwezi mutangi, mwabe na kindi ky'Isuluko lya Yehowa, u kindi ky'Isuluko. 17 Nu kindi ky'ikumi nu bitano kili busi bunene bwa kubogaboga. Kulinga na busi bubo tamulie tumpampa twagaga. 18 Ku busi butangi bwa lilyo izinga, mukundamanie musanganano wasililila, nu tamukite mulimo unsania. 19 Mukasane kayulo mu nzila za keiya, u kayulo ka kugisibwa ku Yehowa. Kako kayulo keli mitoka ibili za balume ba ngombe nu kilimba kimozi kya mukoko nu bilimba mutubakamo bya mikoko bya mwaka umozi. Nyama zezo insania zibe geteli kabalibango aba kakeke. 20 Na ngombe, kasanazi na zo na zo byanzi bisatu bya bunga busoga bwasambikwa na makiti, nu na kilimba kya mukoko, kasanazi byanzi bibili bya bunga busoga bwasambikwa na makiti, 21 nu gamozi na kyana na kyana kya mukoko, kasanazi kyanzi kimozi kya bunga busoga bwasambikwa na makiti. 22 Gamozi na to tunsania, kasanazi kisansa kya bwagi kili kilimba kya mpene kya kumukulumania na Yehowa. 23 Mukasane bisansa bibino gamozi na kayulo ka kugisia ka nindunindu keli kayulo ka busi na busi. 24 Mu lukita luluno, mukase tuyulo nu bisansa busi na busi ku bindi mutubakamo. Bili bisansa bya kugisibwa bya nsunu nsoga zikutananizia Yehowa, nu byakaswe gamozi na kayulo kakugisibwa ka busi na busi nu kayulo ka kunua ka busi na busi. 25 Ku busi bwa mutubakamo mube na musanganano wasililila, nu tamukite mulimo unsania bubo busi.
Tuyulo twa kisagulo kya mazinga.
26 Busi bwa matubulo matangi, u busi bwa kukasana ku Yehowa kayulo ka matubulo matangi ma mbuto ku kisagulo kya mazinga, mube na musanganano wasililila nu tamukite mulimo unsania. 27 Mukasane ku Yehowa tuyulo twa mitoka ibili za balume ba ngombe nu kilimba kya mukoko nu bilimba mutubakamo bya mikoko bili na mwaka umozi tugu. Bibe tuyulo twa kugisibwa nu twa nsunu nsoga tukutananizia Yehowa. 28 Gamozi na mulume na mulume wa ngombe, kasanazi kayulo ka bunga busoga bwakuka ku byanzi bisatu nu bwasambikwa na makiti. Gamozi na kikyo kilimba kya mukoko kasanazi kayulo ka bunga busoga bwakuka ku byanzi bibili, 29 nu na kilimba na kilimba kya mukoko kya mwaka umozi, kasanazi bunga busoga bwakuka ku kyanzi kimozi. 30 Lingo mukasane kisansa kya kilimba kya mpene kya kumukulumania na Yehowa. 31 Longekazi bisansa bibino gamozi na tuyulo twa kunua twa kukasana nabyo, gamozi na kayulo ka kugisibwa ka busi na busi nu kayulo ka bunga busoga ka kukaswa nako. Nyama insania za tuyulo nu bisansa zatunganana kuba geteli kabalibango nunse.’