Bakinga ba Zelofehadi.
27
1 Bakinga ba Zelofehadi babezaga ba kikanga kya Manase, mwana wa Yosefu, kubuno Manase abutile Makiri, nu we abutile Gileadi, wabutile Heferi, nu we abutile Zelofehadi, u isi wa babo bakinga. Meina mabo mabezaga Mala nu Noa nu Hogla nu Milka nu Tirza. 2 Bakundile mwingilo lwa Numba za Kukulumana nu bemanine lwabusio lwa Musa nu Eleazari sankoga nu bakulu nu musanganano unsania wa bantu, nu batendile bunee: 3 “Tateiswe akule mu kalula. Ntabezaga munkatini mwa babo bayangile Kora, bakundamenne kuguna Yehowa, tondo akule mu bwagi bwage wenyene, nu we ntabezaga na musikila, ta umozi. 4 Kubuni izina lya tateiswe lyatikibwe ku kikanga kyage kubuno ntabezaga na mwana wa mulume? Mutukase iswe bwiyani gamozi na mibuto za tateiswe.” 5 Musa alusizie kitondo kyabo ku Yehowa, 6 nu Yehowa amwakwide bunee: 7 “Bakinga ba Zelofehadi batenda bulili. Lebelebe bakase bwiyani gamozi na mibuto z'isibo, ee, mubakase bwiyani bw'isibo. 8 Kakizia baIsraeli bunee: Muntu ndi akua nu nteli na mwana wa mulume, tondo eli na mukinga, mwakase ntiko zage ku wozo mukinga. 9 Ndi nteli na mwana wampa, aba mukinga aba musikila, nti mwabegania ntiko zage ku mibuto zage. 10 Ndi nteli na mubuto, nti mwabegania bwiyani bwage na mibuto z'isi. 11 Ndi isi ntabezaga na mubuto, nti mwakasa bwiyani bwage ku ungo mubuto uli bwigi mu kikanga ky'isi, buno akeiyana bo. Kwabe ikakizio lya kwanzwa ku baIsraeli, anga bwakakizizie Yehowa ku Musa.”
Kusombolwa kwa Yosua.
12 Kusila Yehowa abwide Musa bunee: “Bakama mwiduko wono wa Abarimu, nu lola kisi kinakasile baIsraeli. 13 Kumbusa kwa kukimona ko wakundamanibwe na bantu bobe, anga bwakundamanizibwe Haruni solonzi, 14 kubuno inyuwe babili mwannanine mu kitondo kya mazi mu Kalula ka Zini. Bantu bambengile gago nu inyuwe tamwankasile lutanuno lwabusio lwabo.” (Mamano meli mazi ma Meriba meli ku Kadesi mu Kalula ka Sini).
15 Musa abwide Yehowa bunee: 16 “Yehowa, u Kalaga wa mitima za bantu bansania, asombole muntu mwangati wa musanganano wono, 17 unavwama kusondelezia bantu babano ku ngendo zabo, kubenzia nu kubasubya lingo mu mwino, buno bantu ba Yehowa tababe anga mikoko geteli mulangi.”
18 Ububo Yehowa abwide Musa bunee: “Tola Yosua, mwana wa Nuni, muntu uli na Muuza, nu bika maboko g'itoe lyage. 19 Mwemanie lwabusio lwa Eleazari sankoga nu lwabusio lwa musanganano unsania, nu kumukakizia bwasibwasi kubeli. 20 Mukase bwangato bumozi bwobe buno bansania ba musanganano bamwanze. 21 Nu we emane lwabusio lwa Eleazari sankoga, waamusegele kusombola kwa Yehowa, nkungu zabuzie Yehowa lwabusio lwa makozi mamo ma Urimu. Ku ikakizio lyage we nu bansania ba musanganano batuke, nu ku ikakizio lyage basubye kwingila kwabo.”