Kuganza bantu limbizi lya mabili.
26
1 Kumbusa kwa lulo lusambo lukali, Yehowa abwide Musa nu Eleazari mwana wa Haruni sankoga bunee: 2 “Muganze baIsraeli bansania mu kikanga na kikanga kyabo, nu kulinga na babo beli na myaka makumi mabili nu kutinga, ganzazi bansania banavwama kuba bakoloboyo.” 3 Ukinsa Musa nu Eleazari sankoga bakundamanizie bansania ku kibitabita kya Moabu bwigi na luuzi lwa Yordani kulolana na mwino wa Yeriko, nu babakakizizie bunee: 4 “Ganzazi bamulume bansania beli na myaka makumi mabili nu kutinga, anga bwakakizizie Yehowa ku Musa.”
Babano beli baIsraeli batukile mu Misri:
5 Bana ba Rubeni, u nkula za Israeli babezaga:
Babutilwe na Hanoki, u ba kikanga kya baHanoki.
Babutilwe na Palu, u ba kikanga kya baPalu.
6 Babutilwe na Hezironi, u ba kikanga kya baHezironi.
Babutilwe na Karmi, u ba kikanga kya baKarmi.
7 Bibino bili bikanga bya baRubeni, nu baganzilwe tununu makumi manazi nu tusatu, nkama mutubakamo nu makumi masatu (43.730).
8 Mwana wabutilwe na Palu abezaga Eliabu, 9 nu bana baabutile, u Nemueli, Datani nu Abiramu. Babo babili, Datani nu Abiramu, babezaga basondelezia ba mwino wabo, babengile Musa nu Haruni nu babezaga gamozi na babo bayangile Kora nkungu zibabengile Yehowa. 10 Kisi kyabede muzinga kunsi kwabo nu kyabamenine gamozi na Kora, tondo bango bamuyangile bazikizibwe na keiya kagisizie bamulume nkama ibili nu makumi matano. Babezaga kalolesio ka kutonda bango. 11 Tondo bana bansania babutile Kora tabakule.
12 Bana ba Simeoni mu bikanga byabo babezaga:
Babutilwe na Nemueli, u ba kikanga kya baNemueli.
Babutilwe na Yamini, u kikanga kya baYamini.
Babutilwe na Yakini, u ba kikanga kya baYakini.
13 Babutilwe na Zera, u kikanga kya baZera.
Babutilwe na Sauli, u kikanga kya baSauli.
14 Bibino bili bikanga bya baSimeoni, nu baganzilwe tununu makumi mabili nu tubili, nkama ibili (22.200).
15 Bana ba Gadi mu bikanga byabo babezaga:
Babutilwe na Zefoni, u ba kikanga kya baZefoni.
Babutilwe na Hagi, u ba kikanga kya baHagi.
Babutilwe na Suni, u ba kikanga kya baSuni.
16 Babutilwe na Ozini, u ba kikanga kya baOzini.
Babutilwe na Eri, u ba kikanga kya baEri.
17 Babutilwe na Arodi, u ba kikanga kya baArodi.
Babutilwe na Areli, u ba kikanga kya baAreli.
18 Bibino u bikanga bya baGadi, nu baganzilwe bamulume tununu makumi manazi, nkama itano (40.500).
19 Yuda abutile Eri nu Onani, tondo bobabili bakule mu Kanana.
20 Bana ba Yuda mu bikanga byabo babezaga:
Babutilwe na Sela, u ba kikanga kya baSela.
Babutilwe na Perezi, u ba kikanga kya baPerezi.
Babutilwe na Zera, u ba kikanga kya baZera.
21 Bana ba Perezi babezaga:
Babutilwe na Hezironi, u ba kikanga kya baHezironi.
Babutilwe na Hamuli, u ba kikanga kya baHamuli.
22 Bibino bili bikanga bya baYuda, nu baganzilwe tununu makumi mutubakamo nu mutuba, nkama itano (76.500).
23 Bana ba Isakari mu bikanga byabo babezaga:
Babutilwe na Tola, u kikanga kya baTola.
Babutilwe na Puwa, u ba kikanga kya baPuwa.
24 Babutilwe na Yasubu, u ba kikanga kya baYasubu.
Babutilwe na Simuroni, u ba kikanga kya baSimuroni.
25 Bibino bili bikanga bya baSimeoni, nu baganzilwe tununu makumi mutuba nu tunazi, nkama isatu (64.300).
26 Bana ba Zebuluni mu bikanga byabo babezaga:
Babutilwe na Seredi, u ba kikanga kya baSeredi.
Babutilwe na Eloni, u ba kikanga kya baEloni.
Babutilwe na Yaleli, u ba kikanga kya baYaleli.
27 Bibino bili bikanga bya baZebuluni, nu baganzilwe tununu makumi mutuba, nkama itano (60.500).
28 Bana ba Yosefu baabutile, u Manase nu Efuraimu.
29 Bana ba Manase mu bikanga byabo babezaga:
Babutilwe na Makiri, u ba kikanga kya baMakiri.
Babutilwe na Gileadi, u ba kikanga kya baGileadi.
30 Babano u babo ba bikanga bya baGileadi:
Babutilwe na Yezeri, u ba kikanga kya baYezeri.
Babutilwe na Heleki, u ba kikanga kya baHeleki.
31 Babutilwe na Asirieli, u ba kikanga kya baAsirieli.
Babutilwe na Sekemu, u ba kikanga kya baSekemu.
32 Babutilwe na Semida, u ba kikanga kya baSemida.
Babutilwe na Heferi, u ba kikanga kya baHeferi.
33 Zelofehadi mwana wa Heferi ntabezaga na basikila, tondo
bakinga tugu. Meina ma bakinga bage mabezaga Mala, nu Noa, nu Hogla, nu Milka, nu Tirza.
34 Bibino bili bikanga bya baManase, nu baganzilwe tununu makumi matano nu tubili, nkama mutubakamo (52.700).
35 Bana ba Efuraimu mu bikanga byabo babezaga:
Babutilwe na Sutela, u kikanga kya baSutela.
Babutilwe na Bekeri, u kikanga kya baBekeri.
Babutilwe na Tahani, u kikanga kya baTahani.
36 Babano u babo ba kikanga kya baSutela:
Babutilwe na Erani, u kikanga kya baErani.
37 Bibino bili bikanga bya baEfuraimu, nu baganzilwe tununu makumi masatu nu tubili, nkama itano (32.500).
Babano beli ba bikanga bya Yosefu.
38 Bana ba Benjamina mu bikanga byabo babezaga:
Babutilwe na Bela, u kikanga kya baBela.
Babutilwe na Asibeli, u kikanga kya baAsibeli.
Babutilwe na Ahiramu, u kikanga kya baAhiramu.
39 Babutilwe na Sufamu, u kikanga kya baSufamu.
Babutilwe na Hufamu, u kikanga kya baHufamu.
40 Bela abutile Aradi nu Namani. Bikanga byabo u:
Babutilwe na Aradi, u kikanga kya baAradi.
Babutilwe na Namani, u kikanga kya baNamani.
41 Bibino bili bikanga bya baBenjamina, nu baganzilwe tununu makumi manazi nu tutano, nkama mutuba (45.600).
42 Bana ba Dani mu kikanga kyabo babezaga:
Babutilwe na Suhamu, u kikanga kya baSuhamu.
Kikino kili kikanga kya baDani. 43 Babezaga bansania ba kikanga kimozi, u kikanga kya baSuhamu, nu baganzilwe tununu makumi mutuba nu tunazi, nkama inazi (64.400).
44 Bana ba Aseri mu bikanga byabo babezaga:
Babutilwe na Imuna, u kikanga kya baImuna.
Babutilwe na Isiwi, u kikanga kya baIsiwi.
Babutilwe na Beria, u kikanga kya baBeria.
45 Babano u babo ba bikanga bya baBeria:
Babutilwe na Heberi, u kikanga kya baHeberi.
Babutilwe na Malkieli, u kikanga kya baMalkieli.
46 Nu Aseri abutile mukinga winikilwe Sera.
47 Bibino bili bikanga bya baAseri, nu baganzilwe tununu makumi matano nu tusatu, nkama inazi (53.400).
48 Bana ba Nafutali mu bikanga byabo babezaga:
Babutilwe na Yazeli, u kikanga kya baYazeli.
Babutilwe na Guni, u kikanga kya baGuni.
49 Babutilwe na Yezeri, u kikanga kya baYezeri.
Babutilwe na Silemu, u kikanga kya baSilemu.
50 Bibino bili bikanga bya baNafutali, nu baganzilwe tununu makumi manazi nu tutano, nkama inazi (45.400).
51 Maganzo mansania ma bamulume bansania ba baIsraeli mabezaga tununu nkama mutuba nu kamozi, nkama mutubakamo nu makumi masatu (601.730).
52 Yehowa akakizizie Musa bunee: 53 “Bantu babano babeganie kisi, kibe bwiyani bwabo anga buli maganzo ma meina. 54 Ku kikanga kili kinene kutinga, bakase kibe kya kisi kinene, nu ku kikanga kili kikeke kutinga, bakase kibe kya kisi kili kikeke. Ku kikanga na kikanga bakase kibe kya kisi kyakuka ku maganzo ma meina makyo masanzilwe. 55 Babeganie kisi mu kwesa mbale. Kibe kikeiyana kikanga na kikanga kibe bulingilingi n'iganzo lya meina ma kikanga. 56 Anga bweswe mbale, bubo u bubo bwiyani bwabo bwabeganibwe munkatini mwabo, ku bikanga binene nu ku bikanga bikeke.”
57 Bana ba Lawi baganzilwe mu bikanga byabo babezaga:
Babutilwe na Gersoni, u kikanga kya baGersoni.
Babutilwe na Kohati, u kikanga kya baKohati.
Babutilwe na Merari, u kikanga kya baMerari.
58 Bibino bili bingo bikanga bya baLawi:
Kikanga kya baLibuni, nu kikanga kya baHebroni, nu
Kikanga kya baMali, nu kikanga kya baMusi, nu kikanga kya baKora.
Kohati abezaga isi wa Amramu. 59 Nu izina lya mukazi wa Amramu lyabezaga Yokebedi, mukinga wa Lawi wabutilwe ku Lawi mu Misri. Wozo Yokebedi abutide Amramu Haruni nu Musa nu Miriamu mubitu wabo. 60 Haruni abutile Nadabu, Abihu, Eleazari, nu Itamari. 61 Tondo Nadabu nu Abihu bakule nkungu zibekile keiya kageni kukakasana na bulago ku Yehowa.
62 Bamulume bansania ba kikanga kya baLawi kutinga babo ba mwezi umozi babezaga maganzo ma tununu makumi mabili nu tusatu, nkama isatu (23.300). Tabaganzilwe na bango baIsraeli ba bingo bikanga, kubuno tababezaga na bwiyani munkatini mwa babo bango.
63 Babano beli babo baganzilwe na Musa nu Eleazari sankoga, mu bindi bibaganzile baIsraeli mu kibitabita kya Moabu bwigi na Yordani, kulolana na Yeriko. 64 Tondo ku babo baganzilwe limbizi lilino, takwabezaga umozi waganzilwe ku bindi byaganzile Musa nu Haruni baIsraeli mu Kalula ka Sinai, 65 kubuno Yehowa atendile babo baIsraeli buno bakue lebelebe mu kalula, nu takwabezaga umozi wasigede, tugu Kalebu, mwana wa Yefune, nu Yosua, mwana wa Nuni.