BaMoabu baluta baIsraeli kwaga.
25
1 Mu bindi bibeikalaga ku Sitimu, bamulume ba baIsraeli balingile kukita butazi na bakikulu ba baMoabu. 2 Babo bakikulu bamanine bamulume ba baIsraeli kwenda ku tuyulo twabo tubakasanaga ku tulaga twabo. Bantu balide nu bakumbaminne lwabusio lwa tulaga tuto. 3 Bubo baIsraeli bagomanizie na baMoabu gabakumbaminaga Bali-Peori, nu bongoa bwa Yehowa bwabede bukali ku baIsraeli, 4 nu abwide Musa bunee: “Kundamania basondelezia ba bantu babano, nu kubeita lwabusio lwa Yehowa mu musi, buno bongoa bukali bwa Yehowa butukile baIsraeli.” 5 Ukinsa Musa atendile ku ngatu za baIsraeli bunee: “Itazi babo bagomanizie na kukumbamina Bali-Peori, na muntu na muntu eite bage bantu babukitile.”
6 Mu nkungu zezo, wamulume umozi wa baIsraeli avule, ku numba zage na mukikulu wa baMidiani, bwasi bwasi ku Musa nu ku musanganano wa baIsraeli bansania, gababasagia bisozi ku mwingilo wa Numba za Kukulumana na Yehowa. 7 Nkungu zamonine bubo, Finehasi, mwana wa Eleazari nu muyukulu wa Haruni, akatile isumo lyage na kuboko kwage, 8 nu ayangile wozo muIsraeli mu numba zage za hema. Abasumitile babo babili, kulitingia mu mubili wa muIsraeli nu kulingizia mu mubili wa mukikulu. Kazanga kongo lusambo lukali lwa baIsraeli lwasilile, 9 tondo bantu bakuka ku maganzo ma tununu makumi mabili nu tunazi (24.000) babezaga bakule kalazi nalo.
10 Yehowa abwide Musa bunee: 11 “Finehasi, mwana wa Eleazari, muyukulu wa Haruni sankoga, agalukizye bongoa bwane ku baIsraeli, kubuno abezaga na lugi anga bunili na lugi lwa lutanuno lwane, buno nsyazikizye baIsraeli. 12 Ukinsa umubule buno nkumulaga idagano lyane lya bubobelelo. 13 We nu kibuti kyage beli n'idagano lya busankoga bwa milyalya, kubuno abezaga na lugi lwakulanga lutanuno lwa Kalaga wage, nu akitide baIsraeli bukulumania.”
14 Izina lya wamulume muIsraeli, witilwe gamozi na mukikulu muMidiani lyabezaga Zimuri, mwana wa Salu, u mutonge umozi wa kikanga kya baSimeoni. 15 Izina lya muMidiani, mukikulu wozo witilwe, lyabezaga Kozibi, mukinga wa Zuri, mukota wa kikanga kimozi kya baMidiani. 16 Yehowa akakizizie Musa bunee: 17 “Sunazi baMidiani nu kubeita, 18 kubuno bamukitide anga beiti babo nkungu zibamwengelede mu kitondo kya Peori, nu mu kitondo kya mubitu wabo Kozibi, u mukinga wa mukota umozi wa baMidiani, u wozo mukikulu witilwe nkungu zavule lusambo lukali lwamubaside ku kabamba ka kitondo kya Peori.”