Balama itila kukasa baIsraeli mponga.
24
1 Balama amonine buno bwatananizia Yehowa kukasa baIsraeli mponga, nu ntendile lingo kubukya anga bwakitile, tondo atambizie meiso mage ku kalula. 2 Nkungu zalolaga nu kumona ku baIsraeli beikalaga mu ido lyabo, kikanga na kikanga, Muuza wa Kalaga wavwilide Balama, 3 nu atendile musumo wage bunee: “Musumo wa Balama mwana wa Beori,
U musumo wa muntu wabezaga waziba meiso mage.
4 Nu kulengania kwa wozo ukungwa moki ma Kalaga,
Nu wamona kalolesio kakaswa na Mwiya Mayombo,
Nu agwede bukukama tondo meiso mage mazibwidwe.
5 Yakobo, numba zobe za hema zili nsoga nunse!
Ee baIsraeli, biziki byeinyu bili bisoga!
6 Bibitabita byeinu bili binene,
Bili anga masoa mayikwa mu ntungo mwa luuzi.
Bili na biyikanwa byayikwa na Yehowa,
Anga mierezi zayikwa bwigi na luuzi.
7 Basongolozia mazi mu malega mabo,
Nu mbuto zabo zabe mu mazi mengi.
Mukota wabo abe munene kutinga Agagi,
Nu bukota bwage bwalumbibwe.
8 Kalaga abatikizye mu Misri;
Nu beli na magala anga mamo ma mbogo.
Bakukinda babo beli basombi babo,
Nu kubelekya makwa mabo byindi byindi;
Ee, bakubasumita na misungu zabo.
9 Bakwikumba nu kuyama anga bukuyama mulume wa nsimba,
Anga ibuti lya nsimba, nu nazi wamuyukie?
Babo bakase baIsraeli mponga, bakaswe mponga,
Nu babo baswilile baIsraeli, baswililwe.”
10 Nkungu zezo bongoa bwa Balaka bwabede bukali nunse, nu eidibwide makasa mage, ikasa ku ikasa, nu abwide Balama bunee: “Nakumanine kuswilila beiti bane, nu wabakasile mponga nunse mamano mambizi masatu. 11 Kano kaluma tuka bulazi na nne. Enda kwobe! Nakulagile kukukalila lukalilo lusoga nunse, tondo Yehowa akukandide nzila za kulumona.”
12 Balama amwakwide bunee: “Ndi nsyabwide migenzi zobe bunee: 13 ‘Aba Balaka eizazia numba zage na feza nu olo nu kunkasa zo insania, nti nsinavwama kutinga ikakizio lya Yehowa mu bwangato bwane nnenyene, aba ku kitondo kisoga aba ku kitondo kibi. Natunganana kutenda tugu bitondo byatenda Yehowa.’ Ndi nsyabatendile bubo? 14 Kano kaluma nkusubya ku bantu bane, tondo tanga vwa nikutonde buni bwakite babo bantu ku bantu bobe mu bindi bikuvwa.”
Kulengania kwa manazi kwa Balama.
15 Nu Balama atendile musumo wage bunee:
“Musumo wa Balama, mwana wa Beori,
U musumo wa muntu wamona bwasi na meiso mage;
16 Nu kulengania kwa wozo ukungwa moki ma Kalaga,
Kwa wozo wamenya Wozo Wasakama Nunse,
Nu wamona kalolesio kakaswa na Mwiya Mayombo.
U wozo wagoa bukukama tondo azibula meiso mage.
17 Namumona ko, tondo ta kano kaluma;
Nkumulola, tondo ta bwigi.
Mukota munene wasane anga lukenikeni atuke
Mu kikanga kya Yakobo;
Musumbo wa bwangato wasakikwe mu Israeli.
Akalibula bakota ba baMoabu;
Akazikya bansania beli ba kikanga kya Seti.
18 Bukota bwa baEdomu bwabe bwiyani bwage,
Nu baSeiri beli beiti bage bakakindwa nage.
Tondo baIsraeli bakaba na magala.
19 Mwangati akatuka munkatini mwa baIsraeli,
Nu akazikya babo bakasigala mu mwino.”
20 Nu Balama alolile ku baAmaleki, nu eisile musumo wono:
“BaAmaleki babezaga batangi munkatini mwa bilongo,
Tondo bakakindwa nu kuzikibwa nunsania.”
21 Nu alolile ku baKeni, nu eisile musumo wono:
“Kiziki kyeinyu kili kisoga nu kya magala manene,
Anga kizumba kya kazoni kyabikwa ku lwanda lwa miduko;
22 Tondo inyuwe baKeni, mukazikibwa nunse
Gamwakindwe na baAsuri.”
23 Kusila eisile musumo wono:
“Kabebe kubeli! Nazi walame gakukita Kalaga bitondo bibino?
24 Bantu bakakundamana ku lulenge lwa kwikazi.
Bantu bakuvwa kutuka ntungo za Kitimu mu maato manene;
Bakakinda baAsuri nu baEberi,
Nu babo bobenyene bakazikibwa.”
25 Nu Balama ayukile nu endile kwage, nu Balaka endile kwage.