Kulengania kutangi kwa Balama.
23
1 Balama abwide bunee: “Nkitile gano tusenga twa tuyulo mutubakamo, nu kundongekela balume ba ngombe mutubakamo nu bilimba bya mikoko.” 2 Balaka akitile anga bwatendile Balama, nu bobabili bakasenne ga kasenga na kasenga mulume wa ngombe nu kilimba kya mukoko. 3 Kusila Balama abwide Balaka bunee: “Emana gano bwigi na kasenga kobe ka kugisia kayulo, nu nne tondo, nende nimenye ndi Yehowa akulumana na nne, nu kinsania kyandolesie nakubule kyo.” Endile ku nkangamo za mwiduko kuteli kena. 4 Kalaga akulumenne nage, nu Balama abwide bunee: “Nalongekile tusenga twa tuyulo mutubakamo, nu ga kasenga na kasenga nakasenne ngombe za mulume nu kilimba kya mukoko.”
5 Yehowa akasile Balama kitondo kya kutenda ku Balaka, nu akakizizie bunee: “Subya ku Balaka, nu umutende kitondo kikino.”
6 Ububo Balama asubizie ku Balaka, nu amusangile es'emana bwigi na kasenga kage ka kayulo, nu bakulu bansania ba baMoabu gamozi nage. 7 Nu Balama atendile bulengania bunee:
“Balaka andusizie kutuka Aramu,
Wozo mukota wa baMoabu ammanine ku miduko za kukutukaga
Kisongo kya busi.
Ambuzizie bunee: ‘Vwa kunswililila Yakobo.
Vwa kuswilila baIsraeli.’
8 Buni buninaswilila babo batakuswililwa na Kalaga?
Buni buninatendela bubi babo batatendelwa bubi na Yehowa?
9 Kutukila ntonga za lwanda nkubamona ko,
Kutukila miduko nkubalola.
Nkumona buno beli bantu bakwikalaga bobenyene,
Nu tabakwiganza gamozi na bingo bilongo.
10 Nazi unavwama kuganza mukungu wa baYakobo?
Aba kuganza kyindi kimozi kya binazi kya baIsraeli?
Nikue na lukuo lwa beisanana,
Nu kuzinda kwane kube anga kuzinda kwabo.”
11 Balaka alilile ku Balama bunee: “Wankitide kikizi? Nakusegile kunswililila beiti bane, nu wabakasile mponga tugu! Ntwakitile kingo kimozi!”
12 Balama akwide bunee: “Ndi nsyatunganana kutenda bitondo byankasile Yehowa tugu?”
Kulengania kwa mabili kwa Balama.
13 Nu Balaka amubwide bunee: “Vwa na nne ku kingo kiziki, nu kutuka gago wavwame kubamona. Wamone bamozi ba bantu, nu ntwamone ku bansania. Gago unanswililila bo.” 14 Amwekile ku isoa lya Zofimu lili ga nkangamo za Pisiga, nu gago akitile tusenga twa tuyulo mutubakamo, nu kukasana ga ko na ko mulume umozi wa ngombe nu kilimba kimozi kya mukoko.
15 Balama abwide Balaka bunee: “Emana gano bwigi na kayulo kobe ka kugisibwa nu nne nakulumane na Yehowa gago.”
16 Yehowa akulumenne na Balama nu amukasile moki ma kutenda ku Balaka. Amubwide bunee: “Subya ku Balaka umutende moki mamo.”
17 Ukinsa endile kweli, nu amumonine ko es'emana bwigi na kayulo kage, gamozi na bakulu ba baMoabu. Balaka amubuzizie bunee: “Buni bwatendile Yehowa?”
18 Nu Balama alenganizie bunee:
“Balaka, vwa kunnungwilila.
Uwe mwana wa Sipori, nnungwilile.
19 Kalaga nteli muntu buno aneka buza.
Aaba mwana wa muntu buno agaluke mu makengelo mage.
Ndi atende nu kutakita bwatendile?
Ndi alage geteli kutazindilizia bwalagile?
20 Nakakizizibwe kukasa mponga.
Kalaga abakasile mponga, nu nne nsikuvwama kuzigalukya.
21 Kalaga ntamonine ku bubi mu Yakobo,
Aaba ntamonine ku kulubikana mu baIsraeli.
Yehowa, Kalaga wabo, eli gamozi nabo,
Nu kulaluka kwa mukota munene kuli munkatini mwabo.
22 Kalaga abatikizye mu Misri,
Nu eli na magala anga magala ma mbogo za mu lubanda.
23 Bugila nu buganga tabuli na bwangato ku baYakobo,
Nu takuli ungo unaloga baIsraeli.
Bango bantu banatendela Yakobo kano kaluma bunee:
‘Lolazi buni bwakitide Kalaga Israeli!’
24 Bantu bakuzanzuka anga ibuti lya nsimba.
Bakwizanzula anga bukwizanzula nsimba,
Nu kutayama lingo aaba nu zalia nyama ziitile,
Nu kunua mikila za zezo ziitile.”
25 Nu Balaka azugide Balama bunee: “Ntubaswilile nunse nu ntubakase mponga aba kakeke!”
26 Balama amwakwide bunee: “Ndi nsyakubwide buno natunganana kukita tugu byankakizia Yehowa?”
Kulengania kwa masatu kwa Balama.
27 Nu Balaka atendile ku Balama bunee: “Kano kaluma vwa na nne ku kingo kiziki. Embe bunatananizia Kalaga unswililile babo bantu kutuka kuko.” 28 Nu Balaka amwekile ku nkangamo za Peori, ku katangila ka kalula.