Lukuo lwa Musa.
34
1 Kusila kwa bubo Musa abakamine mwiduko wa Nebo kutukila kibitabita kya Moabu. Abakamine ku ntonga za Pisiga, mwiduko ukulolana na Yeriko. Gaabasile gago, Yehowa amulolesizie kisi kinsania, kutukila Gileadi aaba nu ku Dani, 2 kisi kinsania kya Nafutali nu kya Efuraimu nu Manase, nu kisi kinsania kya Yuda kuzindila ku Kitatenge Kinene kili ku kukwendaga kisongo kya busi, 3 nu Negevi nu kisi kinsania kya kibitabita kya Yeriko, u mwino wa bibila, aaba nu kuzinda ku Zoari. 4 Yehowa amubwide bunee: “Kikino kili kisi kinalagile ku Abrahamu nu ku Isaka nu ku Yakobo, ganabatendile bunee: ‘Nakikase ku bana beinyu.’ Nitabizia buno wakimona na meiso mobe, tondo ntwasoke kwingila mukyo.” 5 Bubo Musa mukiti wa Yehowa akule mu kisi kya Moabu, anga bwatendile Yehowa. 6 Ayikilwe mu kisi kya Moabu, mu kibitabita kikulolana na Beti-Peori, tondo takuli wampa wizi kiziki kya nsinda zage aaba nu lelo. 7 Musa abezaga na myaka lukama nu makumi mabili gaakule, tondo meiso mage tamakungukile, nu magala mage tamakokokile. 8 BaIsraeli balilide Musa bindi makumi masatu, aaba nu gasilile bindi bya kulila.
9 Nu Yosua mwana wa Nuni eiyalile na Muuza wa menge, kubuno Musa abikile maboko mage gantata gage. BaIsraeli bamwungwilide, anga bwakakizizie Yehowa ku Musa.
10 Kutukila busi bubo takwazanzukile ungo mulengania anga Musa munkatini mwa baIsraeli. Musa amenyine Yehowa meiso ku meiso, 11 nu akitile tuto tulolesio twa kuganiagania nu miganogano zasingilwe na Yehowa kukita mu kisi kya Misri, ku Farao nu ku mitonge zage insania nu ku kisi kyage kinsania. 12 Takwabezaga ungo mulengania wakitile tulolesio tuto tunsania nu miganogano minene insania zakitile Musa ku meiso ma baIsraeli bansania.