Ikakizio lya Yosua ku Sekemu.
24
1 Nu Yosua akundamanizie bikanga binsania bya Israeli ku Sekemu, bakulu nu basondelezia nu ngatu nu bemanizi ba baIsraeli; nu babasile lwabusio lwa Yehowa. 2 Nu Yosua abwide bantu bunee: “Bubuno u bukutenda Yehowa, Kalaga wa Israeli, bunee: ‘Basoinyuwe beikede wakalazi lisilya lya Luuzi Furati, Tera, isi wa Abrahamu nu wa Nahori: nu bakitide tungo tulaga. 3 Nu natikizye soinyuwe Abrahamu ku lisilya lya Luuzi nu namusondelezizie mu kisi kinsania kya Kanana, nu namukasile ibuta lya bantu beingi. Namukasile Isaka; 4 nu nakasile Isaka Yakobo nu Esau. Nu nakasile Esau mwiduko wa kisi kya Seiri kuba kyage, tondo Yakobo nu bana bage bagelile ku Misri.
5 Nu nasingile Musa nu Haruni, nu nalibwide baMisri na bibyo binakitile mu kikyo kisi; nu kumbusa namutikizye mukyo. 6 Ganatikizye basoinyuwe mu Misri, mwabasile ku kitatenge; nu baMisri bayangile basoinyuwe na tuyanga nu beiya farasi aaba nu ku Kitatenge Kyakisimana. 7 Tondo gabalilile ku Yehowa, abikile kapilo gamusamba na baMisri, nu abalusizizie kitatenge nu kyabakukide. Meiso meinyu mamonine bunakitide baMisri. Nu mwikede mu kalula bindi bingi.
8 Namusondelezizie ku kisi kya baAmori, beikalaga lisilya lya Yordani. Beitenne n'inyu bita, nu nabakasenne mu maboko meinyu. Mwiyanine kisi kyabo. Nabazikizye lwabusio lweinyu. 9 Balaka, mwana wa Sipori, mukota wa Moabu, azanzukile nu kulwania Israeli. Amanine Balama, mwana wa Beori, kumuswilila, 10 tondo nsyazigile kungwilila Balama. Ububo amukasile mponga, nu bubo u bunamwonezie mu kuboko kwa Balaka.
11 Mwasokile Yordani nu mwabasile ku Yeriko. Bantu ba Yeriko beitenne bita n'inyu, nu baAmori nu baPerizi, nu baKanana nu baHiti, nu baGirgasi nu baHivi nu baYebusi; nabakasenne mu maboko meinyu. 12 Nasingile lusungu lwabusio lweinyu, lwabapumbizie, na bakota babili ba baAmori, ku meiso meinyu; takwabezaga ku kabamba ka mwene wa nganda weinyu aba musungu weinyu. 13 Namukasile kisi kimutakitide bwampa, nu miino zimutobakile, nu mwikede muzo; mukuliaga biguma bimutayikile.
Sombolazi lelo.
14 Nu kano kazanga mukue Yehowa boba nu mumukitile na mutima umozi nu na bukatizio; mutikye tulaga twakitide basoinyuwe lisilya lya Luuzi Furati nu mu Misri, nu mukitile Yehowa. 15 Nu ndi tamukutunda kukitila Yehowa, sombolazi lelo wozo u mwakitile, ndi tulaga twakitilaga basoinyuwe mu kisi lisilya lya Luuzi Furati, aba ndi tulaga twa baAmori babezaga beiya kisi kimuseli mukyo; tugu nne nu numba zane twakitilage Yehowa.’”
Idagano lya baIsraeli kukitila Yehowa.
16 Nu bantu bakwide bunee: “Kube bulazi na beiswe kusiga Yehowa nu kukitila tungo tulaga! 17 Kubuno Yehowa, u Kalaga weitu watusondelezizie, iswe nu batateiswe, kutuka mu kisi kya Misri, kutuka mu numba zezo za bukobe, u wakitile tuto tulolesio tunene ku meiso meitu, nu watulangile mu nzila kunsania kutwendaga nu ku bantu bansania kutwatingaga. 18 Yehowa atupumbizizie bantu bansania lwabusio lweitu, baAmori beikalaga mu kisi; ku bubo nu beiswe twakitilage Yehowa kubuno We eli Kalaga weitu.”
19 Tondo Yosua atendile bantu bunee: “Tamunavwama kukitila Yehowa. Eli Kalaga Wasililila. Eli Kalaga uli na lugi; ntanasigilila mibi zeinyu aba bwagi bweinyu. 20 Ndi mwasiga Yehowa nu kukitila tulaga tugeni, agaluke nu kumukitila bubi nu kumuzikya, nu alingile kumukitila busoga.”
21 Nu bantu bakwide Yosua bunee: “Tabubo! Tugu twakitilage Yehowa.”
22 Ububo Yosua atendile bantu bunee: “Mukwidongekela lelo buno mwasombola Yehowa kumukitila.”
Nu bakwide bunee: “Tuli balongeki.”
23 Abatendile bunee: “Kasi mutikye tulaga tugeni tuli munkatini mweinyu, nu egamiziazi mitima zeinyu ku Yehowa, u Kalaga wa Israeli.”
24 Nu bantu bakwide Yosua bunee: “Twakitilage Yehowa, Kalaga weitu, nu twanzage iyuki lyage.”
25 Bubo u bwakitile Yosua idagano na bantu mu bubo busi, nu abalongekede milembe nu makakizio ku Sekemu. 26 Nu Yosua asanzile moki mamano mu mukanda wa mulembe wa Kalaga; nu akatile ikozi inene nu alyimikile gago gansina muti wa mwalo bwigi na kiziki kyaswagibwa kya Yehowa.
27 Nu Yosua atendile bantu bansania bunee: “Lolazi, ikozi lilino lyabe idongeki lyeitu, kubuno lyungule moki mansania matwatendile ku Yehowa; ububo lyabe idongeki kumuli, munakivwa kwengelela Kalaga weinyu.” 28 Kusila Yosua asubizie bantu, nawe nawe kwage.
Lukuo lwa basondelezia.
29 Kumbusa kwa bitondo bibino Yosua, mwana wa Nuni, mukiti wa Yehowa, akule. Myaka zage zabezaga lukama nu ikumi. 30 Bamuyikile mu kisi kyage ku Timunati-Sera, guli mu kisi kya miduko kya Efuraimu, ku lulenge lwa kwikazi kwa mwiduko wa Gaasi.
31 Israeli akitide Yehowa bindi binsania bya Yosua, nu bindi binsania bya bakulu balamine kumbusa kwa Yosua, nu bamenyine mulimo unsania wakitile Yehowa ku Israeli.
32 makwa ma Yosefu matolile baIsraeli gabatukile ku Misri mayikilwe ku Sekemu, mu kibe kya kisi kyakunzile Yakobo ku bana ba Hamori, isi wa Sekemu, na byindi lukama bya feza. Kyabede bwiyani bw'ibuta lya Yosefu.
33 Eleazari, mwana wa Haruni, akule nu bamuyikile ku Gibea, mwino wakasilwe ku mwana wage Finehasi mu kisi kya miduko kya Efuraimu.