Nkusako za Yosua.
23
1 Kumbusa kwa bindi bingi, gasilile Yehowa kukasa Israeli kyumuno ku beiti babo mu ndenge insania, nu Yosua abezaga ese mukungu wa myaka mingi, 2 Yosua amanine baIsraeli bansania, bakulu babo nu basondelezia babo, ngatu zabo nu bemanizi, nu ababwide bunee: “Nise mukungu wa myaka mingi. 3 Muse mwamona bunsania bwakitide Yehowa, u Kalaga weinyu, bibino bilongo binsania ku kabamba keinyu, kubuno Yehowa, u Kalaga weinyu, wamwitaninne bita. 4 Lolazi, namubeganizia bibino bilongo byasigede, kuba bwiyani bweinyu, gamozi na bibyo bilongo binsania binisenazikya kalazi kutukila Yordani aaba nu ku Kitatenge Kinene mu ntungo za kunsi. 5 Yehowa, u Kalaga weinyu, abasindike lwabusio lweinyu nu kubapumbia kutuka ku meiso meinyu, nu mwakate kisi kyabo anga bwamulagile Yehowa, uli Kalaga weinyu. 6 Ububo mulinde kulanga nu kukita bunsania bwasanzwa mu mukanda wa mulembe wa Musa, tamugaluke muzo aba ku seidume aba ku seikazi, 7 buno tamusambikane na bibino bilongo bikili gano munkatini mweinyu, aba tamutekule meina ma tulaga twabo, aba tamulumbile aba tamutukitile, aba tamutukumbamine, 8 tondo mwikokomezie mu Yehowa, Kalaga weinyu, anga bumuse mwakita aaba nu lelo.
9 Kubuno Yehowa apumbizie lwabusio lweinyu bilongo binene nu bya magala, nu takuli muntu aba umozi wavwamine kwemana lwabusio lweinyu aaba nu lelo. 10 Muntu umozi kumuli akupumbagia kanunu ka bantu kubuno Yehowa, u Kalaga weinyu, u gukumwitaninaga bita anga bwamulagile. 11 Kasi mwidange bubibu mu mitima zeinyu buno mwelame Yehowa, Kalaga weinyu.
12 Kubuno ndi mwagaluka nu kusambikana na bilongo bikili gano munkatini mweinyu nu kusongana nabo, buno mwasonge bakinga babo nu bo beinyu, 13 mumenye lebelebe Yehowa, Kalaga weinyu, ntendelele kupumbia bibino bilongo lwabusio lweinyu; tondo babe kumuli matega, nu tususu mu mpege zeinyu nu mikele mu meiso meinyu aaba nu mwazikibwa ku kikino kisi kisoga kyamukasile Yehowa, Kalaga weinyu.
14 Nu kano kaluma nkwenda mu nzila za kisi kinsania, nu beinyuwe bansania mwizi mu mitima zeinyu buno takwidile limozi ku malagano masoga mansania malagile Yehowa, Kalaga weinyu, kumuli; mansania mazindilizibwa kumuli, takwidile limozi litasililide. 15 Tondo bubo bwazindilizibwa malagano mansania masoga kumuli, ububo Yehowa amubasie ku bitondo bibi aaba nu mwazika mu kisi kikino kisoga kyamukasile Yehowa, Kalaga weinyu. 16 Ndi mwaga mu idagano lya Yehowa, Kalaga weinyu, lyamukakizizie, nu mwenda kukitila tungo tulaga nu kutukumbamina, bongoa bwa Yehowa bwabe kumuli nu mwazike yiliyili mu kisi kisoga kyamukasile.”