Kukakizia kwa Yosua ku babezaga lisilya lya Yordani.
22
1 Yosua amanine baRubeni nu baGadi nu kyindi kya kikanga kya Manase 2 nu ababwide bunee: “Muse mwakita bunsania anga bwamukakizizie Musa, mukiti wa Yehowa, nu muse mwanza iyuki lyane mu binsania binamukakizizie, 3 tamwasigile mibuto zeinyu bibino bindi bingi, aaba nu lelo, tondo mwidangile kukita ikakizio lya Yehowa, u Kalaga weinyu, na bulili. 4 Nu kano kaluma Yehowa, Kalaga weinyu, akasa mibuto zeinyu kyumuno anga bwabalagile; ububo mutimbuke nu mwende ku numba zeinyu mu kisi kili mu biziki byeinyu, byamukasile Musa, mukiti wa Yehowa, lisilya lya Yordani. 5 Umpanga mwidangazi busoga kukita makakizio nu milembe zamukakizizie Musa, mukiti wa Yehowa, buno mutunde Yehowa, Kalaga weinyu, nu kwenda mu nzila zage insania, nu kukita makakizio mage, nu kulibatila mweli, nu kumukitila na mutima umozi nu kalenganio kansania.” 6 Bubo Yosua abakasile mponga nu abasingile nu basubizie kwabo. 7 Musa alingile kukasa kyindi kya kikanga kya Manase kyabo kisi mu Basani; tondo Yosua akasile kikyo kingo kyindi kya kikanga kya Manase kyabo kisi bwigi na mibuto zabo mu kisi kya ku malinga na Yordani. Nu gabasubizie ku numba zabo nu kubakasa mponga, 8 ababwide bunee: “Musubye kweinyu na bikulo bingi, nu na nyama ningi, na feza, nu olo, nu nsubi, nu byuma, nu na nsulu ningi; mubeganie na mibuto zeinyu bikulo byabezaga bya beiti beinyu.”
9 Ububo baRubeni, nu baGadi, nu kyindi kya kikanga kya Manase basubizie kwabo, kulekanuka na bango baIsraeli ku Silo guli mu kisi kya Kanana, kwenda ku kisi kya Gileadi, kisi kyabo kibakatile ku ikakizio lya Yehowa ku kanua ka Musa.
Kasenga ka makozi ka kisansa ka kakengelezio.
10 Nu gababasile ku lulenge lwa Yordani, mu mutili gukili wa Kanana, baRubeni nu baGadi nu kyindi kya kikanga kya Manase bangile kasenga ka makozi ka kisansa bwigi na Yordani, u kasenga kanene nunse.
11 Nu baIsraeli bongule bunee: “Lola, baRubeni nu baGadi nu kyindi kya kikanga kya Manase bangile kasenga ka makozi ka kisansa bwigi na mwaga wa kisi kya Kanana, ku mutili wa Yordani mu kisi kya baIsraeli.” 12 Nu gongule bantu ba Israeli ku bubo, musanganano unsania wakundamenne ku Silo buno beitane nabo bita. 13 BaIsraeli basingile Finehasi, mwana wa Eleazari, sankoga, ku baRubeni nu baGadi nu kyindi kya kikanga kya Manase mu kisi kya Gileadi, 14 nu basondelezia ikumi gamozi nage, umozi wa mu kikanga na kikanga kya baIsraeli, nawe na wabezaga musondelezia wa kikanga mu bikanga bya Israeli.
15 Nu babasile ku baRubeni, baGadi, nu kyindi kya kikanga kya Manase mu kisi kya Gileadi nu bababwide bunee: 16 “Bubuno u bukubula musanganano unsania wa Yehowa: ‘Kwaga kukizi kumwagila Yehowa, Kalaga wa Israeli, nu kubuni kumwagaluka lelo nu kusiga Yehowa na kwiyangila kasenga ka makozi ka kisansa nu kuguna lelo Yehowa? 17 Ndi bwagi bwa ku Peori tabwatukuka nu aaba nu lelo tatusila kwiyengia kubo, tondo kwabede lusungio ku musanganano wa Yehowa? 18 Ndi mwagaluka nu kusiga Yehowa lelo? Ndi mwaguna Yehowa lelo, nti ongelwe musanganano unsania wa Israeli lubi. 19 Kano kaluma, ndi kisi kyeinyu takyaswagibwa, musoke ku kisi kya Yehowa geli hema zage, nu tolazi kibe kyeinyu munkatini mweitu; tugu tamugune Yehowa, aba tamutugune nu beiswe na kwiyangila kango kasenga ka makozi ka kisansa gantata ga kako kangidwe Yehowa, Kalaga weitu. 20 Ndi Akana, mwana wa Zera, ntagile mu kitondo kya bintu byaswilidwe nu bongoa bwabede ku musanganano unsania wa Israeli; nu we ntakule wenyene ku bwagi bwage?’”
21 Nu baRubeni nu baGadi nu kyindi kya kikanga kya Manase bakwide basondelezia ba tununu twa baIsraeli bunee: 22 “Yehowa, Kalaga wa tulaga, Yehowa, Kalaga wa tulaga, We eizi, nu baIsraeli bamenye! Ndi bwabezaga mu kuguna aba mu bwagi ku Yehowa, tamutusigilile lelo. 23 Tatwangile kasenga ka makozi ka kisansa kya kugaluka nu kusiga Yehowa; aba ndi twangile buno tukasane tuyulo twa kugisia aba twa bunga, aba twa bubobelelo gako, Yehowa wenyene atusungie.
24 Tabubo! Twakaangile mu boba bwa buno mu bindi bya kumbusa bana beinyu banatenda ku bana beitu bunee: ‘Kikizi kimuli nakyo na Yehowa, Kalaga wa baIsraeli? 25 Kubuno Yehowa abikile Yordani mwaga gatusamba, nu inyuwe baRubeni nu baGadi, tamuli na kena mu Yehowa.’ Ububo bana beinyu banenzukania bana beitu na kumenka kukua Yehowa boba. 26 Ku kako kabamba twatendile bunee: ‘Twangazi kano kaluma kasenga ka makozi ka kisansa, ta ku tuyulo twa kugisia aba ku bisansa, 27 tondo kabe kakengelezio gatusamba nu gasamba bibuti bikuvwa kumbusa kweitu, bubo tukukitaga mulimo wa Yehowa lwabusio lwage na tuyulo tweitu twa kugisia nu bisansa byeitu nu tuyulo twa bubobelelo; buno bana beinyu banakivwa kutenda ku bana beitu mu bindi bikavwa bunee: “Tamuli na kena mu Yehowa.” 28 Nu twakengede bunee: “Ndi balitenda kutuli aba ku kibuti kyeitu mu bindi bikavwa, twabakule bunee: ‘Lola kisusania kya kasenga ka makozi ka kisansa kya Yehowa, kangile batateiswe, ta ka tuyulo twa kugisia aba ka bisansa, tondo kabe kakengelezio gatusamba.’” 29 Tabunakulungana kutuli buno tugune Yehowa, nu kugaluka lelo nu kumusiga mu kwanga kango kasenga ka bisansa ka tuyulo twa kugisia nu twa bugali nu twa bisansa gantata ga kako kasenga ka Yehowa, u Kalaga weitu, kemana lwabusio lwa hema zage.’”
30 Nu Finehasi, sankoga, nu basondelezia ba musanganano, basondelezia ba tununu twa baIsraeli babezaga nage gamozi, gabongule ku moki matendaga baRubeni, baGadi nu baManase, babogilebogile. 31 Nu Finehasi, mwana wa Eleazari, sankoga, akwide baRubeni, baGadi, nu baManase bunee: “Lelo twasongolola buno Yehowa eli munkatini mweitu, kubuno tamwagide Yehowa; kano kaluma mwonia baIsraeli ku kuboko kwa Yehowa.”
32 Nu Finehasi, mwana wa Eleazari sankoga, nu basondelezia basubizie kutuka ku baRubeni nu baGadi mu kisi kya Gileadi kubasa ku kisi kya Kanana, ku bantu ba Israeli kubasambalila musagu. 33 Nu musagu watananizizie baIsraeli; nu baIsraeli baganwine Kalaga nu tabatendile lingo kitondo kya kubeitania bita, kuzikya kisi kikalaga mu baRubeni nu baGadi. 34 BaRubeni nu baGadi bamanaga kasenga kakano mu izina lya Edi. a Babwide bunee: “Kubuno keli kakengelezio gatusamba buno Yehowa eli Kalaga.”