Miino za baLawi.
21
1 Basondelezia ba bikanga bya baLawi bavule ku Eleazari sankoga nu ku Yosua, mwana wa Nuni, nu ku basondelezia ba bikanga bya baIsraeli. 2 Bababwide ku Silo mu kisi kya Kanana bunee: “Yehowa akakizizie ku kanua ka Musa buno tukaswe miino za kwikala muzo, gamozi na biziki bya kulisizia lusumba lweitu.” 3 Ububo ku ikakizio lya Yehowa, baIsraeli bakasile baLawi miino zeno ku bwiyani, miino zeno gamozi na biziki bya kulisizia lusumba lwabo. 4 Kweswa kwa mbale kutangi kwabezaga ku bikanga bya baKohati. Ububo baLawi babezaga bana ba Haruni sankoga, bakasilwe mu kulasa miino ikumi nu isatu za bikanga bya Yuda nu Simeoni nu Benjamina. 5 Nu bango baKohati bakasilwe mu kulasa miino ikumi za bikanga bya kikanga kya Efuraimu, nu kikanga kya Dani nu kyindi kya kikanga kya Manase.
6 Nu baGersoni bakasilwe mu kulasa miino ikumi nu isatu za kikanga kya Isakari, nu kikanga kya Aseri nu kikanga kya Nafutali nu kyindi kya kikanga kya Manase mu Basani.
7 Nu baMerari anga bwabezaga mitula zabo bakasilwe mu kulasa, miino ikumi nu ibili za kikanga kya Rubeni nu kikanga kya Gadi nu kikanga kya Zebuluni.
8 Mu kulasa, baIsraeli bakasile baLawi zeno miino gamozi na biziki bya kulisizia lusumba anga bwakakizizie Yehowa ku kanua ka Musa.
9 Mu kikanga kya Yuda nu mu kikanga kya Simeoni bakasenne miino zeno zikutekulwa meina mazo gagano, 10 nu zabede ku mutula wa bana ba Haruni wa baKohati wa baLawi, kubuno kulasa kutangi kwabezaga kwabo. 11 Babakasile Kiriati-Arba (Arba abezaga isi wa baAnaki), u Hebroni mu miduko za Yuda, gamozi na biziki bya kulisizia lusumba mu ntungo insania. 12 Tondo masoa ma mwino nu miino zage mikeke zakasilwe ku Kalebu, mwana wa Yefune kuba zage.
13 Nu bakasenne Hebroni ku bana ba Haruni, sankoga, mwino w'itinino ku mwiti, nu Libuna, 14 nu Yatiri, nu Estemoa, 15 nu Holoni, nu Debiri, 16 nu Aini, nu Yuta, nu Beti-Semesi, gamozi na biziki byazo bya kulisizia lusumba: miino mubula mu bikanga bibino bibili, 17 nu mu kikanga kya Benjamina, Gibeoni, nu Geba, 18 nu Anatoti, nu Almoni, gamozi na biziki byazo bya kulisizia lusumba: miino inazi. 19 Miino za bana ba Haruni, basankoga, zabezaga ikumi nu isatu gamozi na biziki byazo bya kulisizia lusumba.
20 Nu ku bingo bikanga bya Kohati bya baLawi, miino zakasenne kubeli mu kulasa zatukile ku kikanga kya Efuraimu, 21 Bakasilwe Sekemu gamozi na masoa mago ma kulisia nyama mu kisi kya miduko za Efuraimu, mwino w'itinino ku mwiti nu Gezeri gamozi na masoa mago ma kulisia nyama zage, 22 nu Kibuzaimu, nu Beti-Horoni, gamozi na biziki bya kulisizia lusumba: miino inazi.
23 Nu mu kikanga kya Dani, Elteke, nu Gibetoni, 24 nu Ayaloni, nu Gati-Rimoni, gamozi na biziki bya kulisizia lusumba: miino inazi.
25 Nu mu kyindi kya kikanga kya Manase, Tanaki nu Gati-Rimoni, gamozi na biziki bya kulisizia lusumba: miino ibili. 26 Miino za zengo mitula za baKohati zabezaga ikumi gamozi na biziki bya kulisizia lusumba.
27 Nu ku baGersoni, kikanga kimozi kya baLawi, kwakasilwe mu kyindi kya kikanga kya Manase, Golani mu Basani, mwino w'itinino lya mwiti, nu Be-Estera, gamozi na biziki bya kulisizia lusumba: miino ibili.
28 Nu mu kikanga kya Isakari, Kisioni, nu Daberati, 29 nu Yarmuti, nu Eniganimu, gamozi na biziki byazo bya kulisizia lusumba: miino inazi.
30 Nu mu kikanga kya Aseri, Misali, nu Abudoni, 31 nu Helkati, nu Rehobu, gamozi na biziki byazo bya kulisizia lusumba: miino inazi.
32 Nu mu kikanga kya Nafutali, Kedesi mu Galilaya, mwino w'itinino lya mwiti, nu Hamoti-Dori, nu Kartani, gamozi na biziki byzo bya kulisizia lusumba: miino isatu.
33 Miino za mitula za baGersoni zabezaga ikumi nu isatu, gamozi na biziki byazo bya kulisizia lusumba.
34 Nu ku bango baLawi, u mitula za baMerari, kwakasilwe mu kikanga kya Zebuluni, Yokinamu, nu Karta, 35 nu Dimuna, nu Nahalali, gamozi na biziki byazo bya kulisizia lusumba: miino inazi.
36 Nu mu kikanga kya Rubeni, Bezeri, nu Yahazi, 37 nu Kedemoti, nu Mefati, gamozi na biziki byazo bya kulisia lusumba: miino inazi.
38 Nu mu kikanga kya Gadi, Ramoti mu Gileadi, mwino w'itinino lya mwiti, nu Mahanaimu, 39 nu Hesiboni, nu Yazeri, gamozi na biziki byazo bya kulisizia lusumba: miino inazi. 40 Nu miino za mitula za baMerari, u bango ba kikanga kya baLawi, zakasilwe kubeli mu kulasa zabezaga miino ikumi nu ibili.
41 Miino zakasilwe baLawi munkatini mwa kisi kya baIsraeli zabezaga inse miino makumi manazi nu kinana, gamozi na biziki byazo bya kulisizia lusumba. 42 Na mwino na mwino na wabezaga na biziki byago bya kulisizia lusumba, u bwabezaga ku zeno miino insania.
43 Ububo Yehowa akasile Israeli kisi kinsania kyalumbilide beisibo buno abakase kyo; nu kumbusa kwa kukyangata, beikede mukyo. 44 Nu Yehowa abakasile kyumuno mu ndenge insania anga bwalagile beisibo; lwabusio lwabo takwemenne aba umozi wa beiti babo, kubuno Yehowa akasenne beiti babo bansania ku maboko mabo. 45 Ku malagano masoga mansania malagile Yehowa ku kilongo kya Israeli takwidile limozi; mansania mazindilizizibwe.