Miino z'itinino.
20
1 Yehowa abwide Yosua bunee: 2 “Tenda baIsraeli bunee: ‘Sombolazi miino z'itinino, zinamubwide ku kanua ka Musa, 3 buno mwiti uteita muntu n'isela aba kutamenya, atinine kuko. Zabe kumuli itinino ku musubi wa mikila. 4 Wozo watinage ku umozi mu zeno miino nu kwemana ku mwingilo wa mwino, nu kusambala bitondo byage ku matuzi ma bakulu ba wozo mwino, bamwitabizie mu mwino nu kumukasa kiziki, nu eikale nabo. 5 Nu ndi musubi wa mikila amuyanga, tabamukasane ku maboko mage; kubuno eitile munyage kukutamenya, ntabezaga amusomba lwabusio. 6 Nu eikale mu mwino wozo aaba nu gemane lwabusio lwa musanganano wa kusungibwa, aaba nu kukua kwa wozo sankoga munene wasangagwa, nu mwiti nti anasubya kwage ku mwino, ku numba zage, ku wozo mwino watinaga mugo.’”
7 Ububo basombwede Kedesi mu Galilaya mu kisi kya miduko kya Nafutali, nu Sekemu mu kisi kya miduko kya Efuraimu, nu Kiriati-Arba u Hebroni mu kisi kya miduko kya Yuda. 8 Nu ku lisilya lya Yordani, ku ntungo za kuntata kwa Yeriko, basombwede Bezeri mu kalula ka kibitabita mu kikanga kya Rubeni, nu Ramoti mu Gileadi mu kikanga kya Gadi, nu Golani mu Basani mu kikanga kya Manase. 9 Zeno u miino zasombwedwe ku baIsraeli bansania nu ku bageni bakwikala gamozi nabo, buno unsania uteita muntu ku isela anatinina kuko, buno ntakue na kuboko kwa musubi wa mikila aaba nu emana lwabusio lwa musanganano.