Mwanzelo wa Kalaga azugila baIsraeli
2
1 Mwanzelo wa Yehowa abakamine ku Bokimu kutuka ku Gilgali nu atendile bunee: “Namutikizye mu Misri nu kumwingizia mu kisi kinalumbilide basoinyuwe kubakasa. Natendile bunee: ‘Nsyite idagano lyane n'inyuwe ku milyalya. 2 Nu beinyuwe tamukite idagano na beiya kikino kisi; mwasambule tusenga twa tuyulo twabo.’ Tondo tamwanzile iyuki lyane. Kubuni kumwakitile bubo? 3 Ububo nkutenda kano kaluma bunee: ‘Nsyabapumbie lwabusio lweinyu, tondo babe tususu mu mpege zeinyu nu tulaga twabo twabe itega kumuli.”’ 4 Gatendile Mwanzelo wa Yehowa mamano moki ku bantu bansania baIsraeli, bantu balalukile nu balilile. 5 Nu beinikile kikyo kiziki Bokimu nu gago bakasenne tuyulo ku Yehowa. 6 Gabalanganizie Yosua bantu, baIsraeli bendile na muntu na muntu kwage kwikala mu bwiyani bwage. 7 Bantu bakitide Yehowa bindi binsania bya Yosua, nu bindi binsania bya bakulu balamine kumbusa kwa Yosua, babo bamonine ku makitilo manene mansania makitile Yehowa ku Israeli.
8 Yosua, mwana wa Nuni, mukiti wa Yehowa, akule eseli na myaka lukama nu ikumi. 9 Bamuyikile mu kisi kyage ku Timunati-Heresi, guli mu kisi kya miduko kya Efuraimu, ku lulenge lwa kwikazi kwa mwiduko wa Gaasi.
10 Nu kikyo kibuti kinsania nu kyo kyakule nu kwazanzukile kingo kibuti kitamenyine Yehowa aba makitilo maakitide Israeli. 11 BaIsraeli bakitile bwagi ku meiso ma Yehowa nu bakitide tulaga Baali. 12 Nu basigile Yehowa, u Kalaga wa beisibo, wabatikizye mu kisi kya Misri; bayangile tungo tulaga mu tulaga twa bantu babeikalaga nabo gamozi, nu batukumbaminne nu bongizie Yehowa. 13 Basigile Yehowa nu bakitide Baali nu Astaroti. 14 Ububo bongoa bwa Yehowa bwabede bukali ku Israeli. Abakasenne mu maboko ma banyagi babanyagile; abakunzizie ku maboko ma beiti babo mu ndenge insania, bubo tabavwamine kwemana lingo lwabusio lwa beiti babo. 15 Kunsania kubendaga, kuboko kwa Yehowa kwabezaga gantata gabo ku bubi, anga bwabatendile Yehowa, anga bwabalumbilide, nu bazangilezangile nunse.
16 Nu Yehowa azanzwide ngatu buno zibonie mu maboko ma babo babanyagaga. 17 Tondo tabongule aba kakeke ngatu zabo kubuno bakitile butazi mu mitima zabo na tungo tulaga. Batukumbaminne; basasizie kutuka mu nzila zendaga mu beisibo, babo banzaga makakizio ma Yehowa, nu tababukitile. 18 Gazanzwide Yehowa ngatu kubeli, Yehowa abezaga gamozi na ngatu, nu abonezie mu kuboko kwa beiti babo bindi binsania bya ngatu, kubuno Yehowa abede na kyombo ku kabamba ka miyabilo zabo ku bantu babababazagia nu kubasungia. 19 Nu gakule ngatu, basubizie kumbusa nu kukita bubi kutinga beisibo, mu kuyanga tungo tulaga, kutukitila nu kutukumbamina; tabalekede kukita bubi bwabo nu balimbanizie mitima.
20 Ku bubo bongoa bwa Yehowa bwabede bukali ku Israeli nu atendile bunee: “Kubuno kikino kilongo kitile idagano linakakizizie beisibo, nu kubuno tabanzile iyuki lyane, 21 nsyapumbie lingo lwabusio lwabo kilongo aba kimozi ku bilongo byasigile Yosua gaakule, 22 buno nilindike Israeli nabyo, ndi bakengele kutabanga mu nzila za Yehowa anga bwakitile beisibo aba kilo.” 23 Ububo Yehowa asigile bibyo bilongo byatakasenne mu kuboko kwa Yosua, ntasasizie kubipumbia.