Bilongo byasigede mu Kanana.
3
1 Bibino u bilongo byasigile Yehowa kulindika Israeli nabyo, u kutenda baIsraeli bansania batamenyine bita mu Kanana. 2 Abukitile buno bibuti bya Israeli bimenye bita, buno abeigisie bita, babo batabimenyine mu kulinga. 3 Bilongo byongo u bibino; bakota batano ba baFilistini nu baKanana bansania nu baSidoni, nu baHivi beikalaga mu mwiduko wa Lebanoni, kutukila ku mwiduko wa Baali-Hermoni aaba nu kuzindila ku mwingilo wa Hamati. 4 Nubyo byabikilwe kulindika Israeli, kumenya ndi Israeli anze makakizio ma Yehowa, maakakizizie beisibo ku kanua ka Musa. 5 Nu baIsraeli beikede munkatini mwa baKanana nu baHiti nu baAmori nu baPerizi nu baHivi nu baYebusi. 6 Nu basongile bakinga babo, nu basongizie bakinga babo ku basikila babo; nu bakitide tulaga twabo.
Otinieli.
7 Nu baIsraeli bakitile bwagi ku meiso ma Yehowa; beibilide Yehowa, Kalaga wabo, nu kukitila baBaali nu baAshera. 8 Ububo bongoa bwa Yehowa bwabede bukali ku Israeli, nu abakunzizie mu kuboko kwa Kusani-Risataimu, u mukota wa Mesopotamia. BaIsraeli bakitide Kusani-Risataimu myaka kinana.
9 Nu galilile baIsraeli ku Yehowa, Yehowa eimikide baIsraeli mukuluzi wabonezie, Otinieli, u mwana wa Kenazi, muto wa Kalebu. 10 Muuza wa Yehowa wamuvwilide nu abede ngatu mu Israeli; endile ku bita. Yehowa akasenne Kusani-Risataimu, mukota wa Mesopotamia, ku kuboko kwage; nu akindile Kusani-Risataimu. 11 Nu kisi kyabobelede myaka makumi manazi, aaba nu Otinieli mwana wa Kenazi akule.
Ehudu.
12 BaIsraeli bakitile lingo bwagi ku meiso ma Yehowa; nu Yehowa alindizie Eguloni, mukota wa Moabu buno asungie baIsraeli kubuno bagile ku meiso ma Yehowa. 13 Eguloni akundamanizie baAmoni nu baAmaleki gamozi nage, nu bendile nu beitile Israeli nu bakatile mwino wa bibila. 14 Ku bubo baIsraeli bakitide Eguloni, mukota wa Moabu, myaka ikumi nu kinana.
15 Tondo galilile baIsraeli ku Yehowa, Yehowa abeimikide mukuluzi, u Ehudu, mwana wa Gera muBenjamina, mwiya mbokoa. BaIsraeli bamusingile na mutulo ku Eguloni mukota wa Moabu. 16 Ehudu eitulide mwene gukutoa ntungo ibili wa bulazi bw'ibusu nu eiyanikile go mu lutungi lwa ku seidume munda mwa nsulu. 17 Akasile mutulo ku Eguloni mukota wa Moabu. Eguloni abezaga anona nunse.
18 Gasilile Ehudu kukasana mutulo, asubizie bantu bagwekaga. 19 Tondo asubanizie wenyene gago geimikilwe makozi mabazilwe, bwigi na Gilgali, nu atendile bunee: “Ee mukota, nili na musagu wa kukutenda ku kakungu.” Mukota akakizizie kibibi, nu bakiti bage banse babezaga bwigi nage babasile. 20 Nu Ehudu abasile bwigi nage gaabezaga eikala wenyene mu busio bwa kuntata bwa mpego. Nu Ehudu atendile bunee: “Nili na musagu wobe kutuka ku Kalaga.” Nu Eguloni emenne ga kiziki kyage. 21 Ehudu asigelezizie kuboko kwa seikazi nu kwiyanuna mwene ku lutungi lwage lwa seidume nu agwingizizie mu nda zage; 22 kini nukyo kyingide, nu manona makukide mwene kubuno ntatikizye mwene mu nda zage; nu ntonga zabaside ku mugongo. 23 Kumbusa Ehudu abasile ga kyage nu akandile nibi za busio bwa kuntata na mutandulwa.
24 Gabasile Ehudu kumbuga, bakiti ba mukota bavule; nu gabamonine nibi za busio bwa kuntata zakandwa na mutandulwa, batendile bunee: “Embe eikukila magulu mu busio bwa mpego.” 25 Balindide nkungu ndazi aaba nu bakule na nsoni. Tondo geizizizie nteikandula nibi za busio bwa kuntata, bakatile mutandulwa nu bagukandwide nu bangamine kusanga mukota wabo agoa gansi, akua.
26 Mu kulindila kwabo, Ehudu atinine nu atingile kiziki kya makozi mabazwa nu atinine ku Seira. 27 Gaabasile, idile monze mu kisi kya tukililo twa Efuraimu nu bantu bansania ba Israeli bakumbile nage kutuka mu kisi kya miduko nu abasondelezizie. 28 Abatendile bunee: “Munyange, kubuno Yehowa akasenne beiti beinyu, u baMoabu, mu maboko meinyu.” Ububo bamuyangile, nu bakatile masokelo ma Yordani butunganana na baMoabu nu tabazigile muntu aba umozi kusoka. 29 Nu beitile mu zezo nkungu bwigi na tununu ikumi (10.000) twa baMoabu, bansania babezaga babibu nu mapuka, ta umozi watinine. 30 Bubo u bwakindilwe Moabu mu bubo busi na bwangato bwa Israeli. Nu kisi kyabede na bubobelelo myaka makumi kinana.
31 Kumbusa kwage kwabezaga Samugari, mwana wa Anati, witile baFilistini nkama mutuba na musumbo wa kasengwa ka kusindika ngombe, onezie nu we Israeli.