Baraka nu Debora bakinda Yabini.
4
1 BaIsraeli bagile lingo ku meiso ma Yehowa kumbusa kwa lukuo lwa Ehudu. 2 Nu Yehowa abakunzizie ku kuboko kwa Yabini, mukota wa Kanana, wangataga ku Hazori. Mukota w'iyombo lyage abezaga Sisera, wikalaga ku Haroseti wa bilongo. 3 Bana ba Israeli balilile ku Yehowa, kubuno Sisera abezaga na tuyanga nkama mubula twa byuma nu asungizie Israeli bubibu myaka makumi mabili. 4 Debora, mulengania, mukazi wa Lapidoti, abezaga ngatu ku Israeli mu nkungu zezo. 5 Eikalaga gansina kibila kya Debora gasamba Rama nu Beteli mu kisi kya miduko kya Efuraimu nu baIsraeli bamubakamine kwatula milondo.
6 Asingile kumana Baraka, mwana wa Abinoamu, kutuka Kedesi wa Nafutali, nu amutendile bunee: “Yehowa, Kalaga wa Israeli, akukukakizia bunee: ‘Enda ku mwiduko wa Tabori ukundamanie bantu tununu ikumi (10.000) twa baNafutali nu baZebuluni. 7 Nu nalute kuguli ku luuzi lwa Kisoni, Sisera, mukota w'iyombo lya Yabini, gamozi na tuyanga twage nu iyombo lyage; nu nakukase we mu kuboko kwobe.”’
8 Baraka amutendile bunee: “Ndi wavwa gamozi na nne, nti nende, tondo ndi ntwavwa gamozi na nne nti nsyende.”
9 Nu amwakwide bunee: “Lebelebe nende gamozi nobe, tondo ntwamone lutanuno mu nzila ziukwenda muzo, kubuno Yehowa akasane Sisera mu kuboko kwa mukikulu.” Nu Debora azanzukile nu endile gamozi na Baraka ku Kedesi. 10 Nu Baraka akundamanizie Zebuluni, nu Nafutali, nu Kedesi, tununu ikumi (10.000) twa bantu twamuyangile, nu Debora abakamine nage gamozi.
11 Nu Heberi, muKeni, abezaga eidekanukia na baKeni, ibuta lya Hobabu isibyala wa Musa, nu akomine hema zage gansina muti munene wa Zananimu bwigi na Kedesi.
12 Basambalide Sisera buno Baraka mwana wa Abinoamu abakamine ku mwiduko wa Tabori. 13 Nu kutukila Haroseti wa bilongo, Sisera akundamanizie ku luuzi lwa Kisoni, tuyanga twage nkama mubula twa byuma nu bantu bage bansania baabezaga nabo gamozi.
14 Nu Debora atendile bunee: “Zanzuka! Busi buno Yehowa akasana Sisera mu kuboko kwobe. Ndi Yehowa ntakwenda lwabusio lwobe?” Ububo Baraka akumbile ku mwiduko wa Tabori gamozi na tununu ikumi (10.000) twa bantu kumbusa kwage. 15 Yehowa azangiziezangizie Sisera bubibu, nu tuyanga twage nu iyombo lyage linsania, lwabusio lwa Baraka na mwene. Nu Sisera akumbile ga kayanga kage nu atinine na magulu. 16 Baraka ayangile tuyanga nu iyombo aaba nu kubasa ku Haroseti wa bilongo, nu azikizye iyombo linsania lya Sisera na mwene; ta umozi wasigede.
17 Tondo Sisera atinine na magulu mu hema za Yaeli, mukazi wa Heberi muKeni, kubuno kwabezaga bubobelelo gasamba Yabini mukota wa Hazori nu numba za Heberi muKeni. 18 Yaeli abasile kukulumania Sisera, amutendile bunee: “Mukota wane eingile, ee ingila kwane. Ntukue boba.” Ububo eingide kwage mu hema, nu mukikulu amukukide na kikwembe ga kitanda.
19 Amutendile bunee: “Nkase mazi makeke ma kunua. Nkukua na mpusia.” Mukikulu akandwide kituma kya mabele nu amukasile mo nu amukukide lingo. 20 Atendile mukikulu bunee: “Emana ga mwingilo wa hema nu ndi muntu avwa nu kubuzia bunee: ‘Geli muntu gano?’ Nti wamubula bunee: ‘Kilo.”’
21 Yaeli, mukazi wa Heberi, akatile lupiki lwa kwimika hema nu nondo mu kuboko kwage nu eingide bukebuke kweli nu eingizizie lupiki mu luzugu na nondo aaba nu lupiki lwingide munsi, kubuno Sisera abezaga eiyombeka nunsania na kukutwa. U bwakule.
22 Nu lola, Baraka ayangile Sisera. Yaeli endile kumukulumania nu amutendile bunee: “Vwa kuno nu nakulolesie wozo u ukulonda.” Ububo eingide mu hema zage. Amonine ku Sisera gago, akua na lupiki lwa kwimika hema mu luzugu lwage. 23 Bubo u bwakindile Kalaga Yabini, mukota wa Kanana, lwabusio lwa baIsraeli. 24 Nu magala ma Israeli mitide kuba mabibu ku Yabini, mukota wa Kanana, aaba nu bamuzikizye.