Lwimbo lwa Debora nu Baraka.
5
1 Debora nu Baraka mwana wa Abinoamu, beimbile lwimbo luluno mu bubo busi: 2 “Kubuno basondelezia basondelezizie Israeli,
Kubuno bantu beikasenne na mutima umozi,
Ganunazi Yehowa.
3 Bakota, ungwililazi; basikila ba bakota, tegazi matuzi;
Nne nimbile Yehowa;
Nimbe lwimbo ku Yehowa, u Kalaga wa Israeli.
4 Ee, Yehowa, ga watukide ku Seiri,
Ga watukide ku kisi kya Edomu
Kisi kyatengiletengile,
Nu meigulu malokezye, ee, bimpa byalokezye mbula.
5 Miduko zatengiletengile lwabusio lwa Yehowa,
Uwe Sinai, lwabusio lwa Yehowa, u Kalaga wa Israeli.
6 Mu bindi bya Samugari, mwana wa Anati,
Mu bindi bya Yaeli, nzila nnene tazatingilwe muzo,
Nu bendaga lugendo babembukile mu nzila nkeke.
7 Takwabede lingo bangati mu Israeli,
Takwabede aaba nu kwemana kwane, nne Debora,
Nemenne anga mubuti mu Israeli.
8 Gabasombwede tulaga tuto,
Bita byabede ku masula,
Takwamonekaga aba ngabo aba isumo ku tununu makumi manazi (40.000) twa Israeli.
9 Mutima wane guli gamozi na basondelezia ba Israeli,
Na babo beikasenne na mutima umozi mu bantu,
Ganunazi Yehowa.
10 Inyuwe bakubakama gantata ga mpunda zenga,
Inyuwe bakwikala ga bitanda bya bukunza bukali,
Inyuwe bakwenda na magulu mu nzila,
Imbazi bubo.
11 Na moki mabo balasi ba misungu munkatini mwa biziki bya kutaga mazi,
Baganwine makitilo meisanana ma Yehowa,
Makitilo meisanana ma basondelezia bage mu Israeli.
Nu bantu ba Yehowa bagelile ku masula.
12 Yuka. Yuka Debora.
Yuka. Yuka. Imba lwimbo.
Zanzuka, Baraka. Enda na bakobe bobe,
Uwe mwana wa Abinoamu.
13 Nu basigede ku bemanizi bagelile,
Yehowa ankasizie kukinda bemanizi ba bantu.
14 Kibuti kya Amaleki kyabasile kutukila ku Efuraimu,
Benjamina kumbusa kwobe munkatini mwa bantu bobe,
Basondelezia bagelile kutuka ku Makiri,
Nu ku Zebuluni kwatukile beli na tulolesio twa bwangato.
15 Basikila ba bakota ba Isakari babezaga gamozi na Debora,
Nu Isakari muyangi wa Baraka ku binsania,
Bayangile lubilo kumbusa kwage mu kibitabita.
Mu bikanga bya Rubeni mwabede myango minene mu mitima,
16 Kubuni kuwikede munkatini mwa mikumba za mikoko?
Ndi kungwilila kulaka kwa mikoko?
Mu bikalo bya Rubeni mwabede myango minene mu mutima.
17 Gileadi asigede ku lisilya lya Yordani,
Nu kubuni Dani asigede na maato mage?
Aseri nteitengezietengezie ku mutili wa kitatenge,
Eikede ku masokelo mage.
18 BaZebuluni bakasenne tulamo twabo ku kukua,
Aba Nafutali, mu tukililo twa kibitabita.
19 Bakota bavule, beitenne;
Nu bakota ba Kanana beitenne,
Ku Tanaki, bwigi na kanuabalongo ka Megido;
Tondo tabekile mutali wa feza.
20 Nkeninkeni za meigulu zeitenne,
Kutuka ku nzila zabo zeitenne na Sisera.
21 Musunsu wa Kisoni wabagezizie,
Musunsu, musunsu wa Kisoni.
Mutima wane, endelela na magala.
22 Byondo bya mpunda byazumenne bubibu,
Nkindo nnene za byondo byazo mu kutumatuma kwazo.
23 Swilila Merozi, u bwatendile mwanzelo wa Yehowa.
Swilila nunsania bakwikala mo,
Kubuno tabavule kukasia Yehowa,
Kukasia Yehowa ku beiya magala.
24 Yaeli abe na mponga kutinga bango bakikulu,
Mukazi wa Heberi muKeni,
Abe na mponga kutinga bango bakikulu,
Bakwikalaga mu numba za hema.
25 Asegede mazi nu amukasile mabele.
Amuvwilide na mabele mu kituma kisoga nunse.
26 Akatile lupiki lwa kwimika hema na kuboko,
Nu nondo za mukiti ku kuboko kwa seidume,
Alibwide Sisera,
Abotwede itoe lyage,
Alibotwede mu luzugu lwage.
27 Akumbaminne ku magulu ma Yaeli,
Agwede nu akule gago gaagwede,
28 Alolile g'idilisa,
Nina wa Sisera alolile g'idilisa,
Nu alilile bunee: ‘Kubuni kwizizia kayanga kage nkungu ndazi?
Kubuni nsyungwa ku byondo bya mpunda za kayanga kage?’
29 Beiya menge ku bakikulu bage bamwakwide,
Nu eiyakwide wenyene bunee:
30 ‘Ndi tabamonine ntiko nu tabakuzibegania?
Mukinga umozi aba babili ku muntu na muntu;
Ntiko za nsulu za malangi ku Sisera;
Ntiko za nsulu zalukwa na malebo ma malangi,
Nsulu ibili za malangi zalukwa na malebo mu ikosi lya mukindi.’
31 Ee, Yehowa, bubo u buzika beiti bobe banse!
Babo bakumutunda babe anga musi gagukusanuka mu bukali bwage.”
Nu kisi kyabobelede myaka makumi manazi.