BaIsraeli bakulila lwabusio lwa Kalaga.
21
1 Ku Misipa, baIsraeli balumbide bunee: “Ta umozi mutuli wagabe mukinga wage ku muBenjamina.” 2 Bantu babasile ku Beteli nu beikede gago lwabusio lwa Kalaga aaba nu mwigolo. Balalukile n'idilo inene, 3 nu batendile bunee: “Ee Yehowa, Kalaga wa Israeli! Kubuni kitondo kikino kyabasila Israeli buno Israeli es'eida kikanga kimozi lelo?” 4 Gayukile bantu lukesikesi, bangile kasenga ka kayulo gago, nu bakasenne bisansa bya kugisia nu bisansa bya bubobelelo. 5 BaIsraeli babuzizie bunee: “Nazi wozo utabakamine ku Yehowa munkatini mwa musanganano wa bikanga binsania bya Israeli?” Kubuno ku unsania utabakamage ku Yehowa ku Misipa, balumbide bunee: “Lebelebe wozo eitwe.”
6 BaIsraeli beiyanizie ku kabamba ka Benjamina mubuto wabo nu batendile bunee: “Kikanga kimozi kyazika mu Israeli lelo. 7 Kikizi kitubakitila kulondela babo basigala bakikulu, nu twasilile kulumbila mu Yehowa buno tatusongie bakinga beitu kubeli.”
8 Babuzizie bunee: “Nazi wozo mu bikanga bya Israeli utabakamine ku Yehowa ku Misipa?” Nu amonine buno, takwatukile wampa ku Yabesi wa Gileadi kubasa ku ido lya musanganano. 9 Kubuno baganzile bantu nu bamonine buno, takwabezaga wampa ku bantu ba ku Yabesi wa Gileadi. 10 Ububo, musanganano wasingile kuko bakoloboyo tununu ikumi nu tubili (12.000), nu wabakakizizie bunee: “Mwende kwita bantu ba ku Yabesi wa Gileadi na myene za nganda, gamozi na bakikulu nu bana. 11 Bubuno u bumwakite: wamulume unsania nu mukikulu unsania wamenywa na wamulume mubazikye.” 12 Nu basangile mu bantu ba ku Yabesi wa Gileadi bakinga batamenywa na wamulume nkama inazi nu bavule nabo ku ido ku Silo, guli mu kisi kya Kanana.
13 Musanganano unsania wasingile migenzi ku bantu ba Benjamina babezaga mu ikozi lya Rimoni, kubasambalila bubobelelo. 14 BaBenjamina basubizie mu zezo nkungu, nu bakasile bakikulu ku babo basigede ku Yabesi wa Gileadi, tondo tababakukile.
15 Bantu beiyanizie ku kitondo kya Benjamina kubuno Yehowa azikizye kimozi ku bikanga bya Israeli. 16 Bakulu ba musanganano batendile bunee: “Buni butukita kumona bakikulu ku babo basigede? Kubuno bakikulu bansania ba baBenjamina bazikile.” 17 Nu babwide bunee: “Kwatunganana kuba beiyani ba babo batinine mu baBenjamina, kikanga kimozi kinavwa kuzika mu Israeli. 18 Tondo lebelebe tatunavwama kubagabila bakinga beitu kubuno baIsraeli balumbide bunee: ‘Unsania wasongagie mukinga wage ku muBenjamina nti aswililwe.”’
19 Babwide bunee: “Ungwililazi, kuli kisagulo kya Yehowa na mwaka na mwaka ku Silo, guli ku lulenge lwa kwikazi kwa Beteli, kuntata kwa nzila zikutuka ku Beteli nu kubakama ku Sekemu, ku lulenge lwa kwidume kwa Lebona.”
20 Nu bakakizizie baBenjamina bunee: “Endazi mubisame mu masoa ma mizabibu. 21 Langazi, nu lolazi, gavwe bakinga ba Silo kumina mamina, bisukazi mu mizabibu nu nawe akate mukinga wa Silo kuba mukazi wage, kusila endazi ku kisi kya Benjamina. 22 Gavwe beisibo aba babitu babo kusongela kutuli, twabatende bunee: ‘Tusigilaz bo ku mponga kubuno tatwakatile bakikulu bakuka kubeli mu bita, kubuno tabeinyuwe u mwabakasabo songo munabede na katati.”’
23 Nu baBenjamina bakitile bubo, nu batolile bakikulu anga bwabezaga maganzo mabo mu bamini babakatile. Kusila basubizie kwabo ku bwiyani nu bobakile lingo miino nu beikede muzo. 24 Ububo baIsraeli babalangenne mu zezo nkungu; nawe na wasubizie kwage ku kikanga nu ku kikanga ky'isi. Batukile gago, nawe na wendile kwage ku bwiyani.
25 Mu zezo nkiko, takwabezaga mukota mu Israeli, nawe nawe na wakitaga bwamuswagila.