BaBenjamina basungibwa ku bwagi bwabo.
20
1 BaIsraeli bansania babasile kutukila ku Dani aaba nu ku Beri-Seba, nu kisi kya Gileadi, nu musanganano wakundamenne anga muntu umozi lwabusio lwa Yehowa ku Misipa. 2 Bakulu ba bantu bansania ba bikanga binsania bya Israeli babasile mu musanganano wa bantu ba Kalaga, u bakoloboyo bakwenda na magulu beli na myene za nganda tununu nkama inazi (400.000). 3 BaBenjamina bongule buno bantu ba Israeli babakamine ku Misipa. Bantu ba Israeli batendile bunee: “Tusambalile buni bwabede bubuno bwagi.” 4 MuLawi, iba wa wozo mukikulu witilwe, akwide bunee: “Nabasile na kalemba kane ku Gibea wa Benjamina kwiyombeka. 5 Bantu ba ku Gibea bavule kundi nu batimbile numba zinabezaga muzo mu kindi; bakengede kunita. Bakitile butazi na kalemba kane nu akule. 6 Natolile kalemba kane, nakabagile nu nasingile biganza byage mu myaga insania za Israeli kubuno bakitile butazi nu butaswaga ku Israeli. 7 Inyuwe baIsraeli bansania, lolesiazi makengelo meinyu nu kalazi lwango.”
8 Bantu bansania bazanzukile anga muntu umozi nu babwide bunee: “Tatwasubye aba muntu umozi kwage ku hema, aba ta umozi wasubye kwage ku numba. 9 Tondo kano kaluma, twakite bubuno ku Gibea: Twabakame ko mu kwesa mbale. 10 Twakate bantu ikumi mu lukama ku bikanga binsania bya baIsraeli, bantu lukama mu kanunu (1.000), nu kanunu kamozi (1.000) mu tununu ikumi (10.000), balonde idia lya bantu buno gababase ku Gibea wa Benjamina, basube bwagi bunsania bubakitile mu Israeli.” 11 Ububo baIsraeli bakundamenne, nu babilingenne mpilingi emozi kwitania wozo mwino bita.
12 Bikanga bya Israeli byasingile bantu ku kikanga kinsania kya Benjamina, bababwide bunee: “Bwagi bukizi bubuno bwakitilwe munkatini mweinyu? 13 Kano kaluma gabulazi babo bantu, migazanga zili mu Gibea, buno tubeite nu kutikya bwagi mu Israeli.”
Tondo baBenjamina tabazigile kungwa iyuki lya mibuto zabo, bantu ba Israeli. 14 Tondo baBenjamina bakundamenne ku Gibea kutuka ku miino zabo, beitane bita na baIsraeli. 15 Mu bubo busi baBenjamina baganzilwe bamulume tununu makumi mabili nu mutuba (26.000), babezaga na myene za nganda batukile ku miino zabo nu bamulume nkama mutubakamo basombwedwe ku Gibea. 16 Munkatini mwa babano bansania mwabezaga bantu nkama mutubakamo, beiya mbokoa, basombwedwe. Nawe nawe nawavwamine kulasa luzwili n'ikozi geteli kuluusa. 17 Nu baIsraeli, geteli baBenjamina, baganzilwe bantu tununu nkama inazi (400.000) beli na myene za nganda; babano bansania babezaga bantu ba bita.
18 BaIsraeli bazanzukile nu babakamine ku Beteli nu basegile ku Kalaga bunee: “Nazi mutuli alinge kubakama ku baBenjamina?”
Nu Yehowa akwide bunee: “Yuda alinge kubakama.”
19 BaIsraeli balingile lugendo mu nindunindu nu babikile ido bwigi na Gibea. 20 BaIsraeli babasile kwitania baBenjamina, nu baIsraeli beidongekile lwabusio lwa Gibea kwitana nabo. 21 BaBenjamina batukile ku Gibea, nu beitile mu bubo busi tununu makumi mabili nu tubili (22.000) twa baIsraeli.
22 Nu bantu, bamulume ba Israeli, beikokomezizie nu beidongekile lingo kwitana bita gago ga beidongekaga mu kindi kitangi. 23 Nu baIsraeli babakamine nu balilile lwabusio lwa Yehowa aaba nu mwigolo. Babuzizie Yehowa bunee: “Ndi twitane lingo na mibuto zeitu, baBenjamina?”
Nu Yehowa akwide bunee: “Bakamazi kwitana nabo.”
24 Ububo baIsraeli bavule bwigi kwitana na baBenjamina ku kindi kya bibili. 25 Mu bubo busi, baBenjamina batukile ku Gibea kubakulumania nu bazikizye lingo bamulume tununu ikumi nu kinana (18.000) twa bantu ba Israeli, bansania babezaga na myene.
26 BaIsraeli bansania babakamine, u kutenda iyombo linsania nu bavule ku Beteli nu balilile. Beikede gago lwabusio lwa Yehowa nu bagilile idia mu bubo busi aaba nu mwigolo, nu bakasenne kisansa kya kugisia nu bisansa bya bubobelelo lwabusio lwa Yehowa. 27 BaIsraeli babuzizie ku Yehowa, kubuno Sanduku z'Idagano lya Kalaga zabezaga gago mu bibyo bindi, 28 nu Finehasi, mwana wa Eleazari, mwana wa Haruni, emenne lwabusio lwazo mu bibyo bindi, nu babuzizie bunee: “Ndi twende lingo kwitana na bantu ba Benjamina, mibuto zeitu aba ndi tusige?”
Nu Yehowa akwide bunee: “Bakamazi, kubuno lubi nabakasane mu maboko meinyu.”
29 BaIsraeli bakobile mu ntungo insania za Gibea. 30 Nu baIsraeli babakamine kwitana na baBenjamina, ku kindi kya bisatu, nu beidongekile lingo ku bita bwigi na Gibea, anga bubakitaga. 31 BaBenjamina batukile kwitana na bantu, nu balutilwe bulazi na mwino. Balingile kwita ku bantu anga bubalingaga kubeita, mu nzila emozi zabakama ku Beteli nu zengo za ku Gibea mu isoa, bwigi ku bamulume makumi masatu ma baIsraeli.
32 BaBenjamina batendile bunee: “Bakua lingo anga butukubeitaga.”
Tondo baIsraeli batendile bunee: “Tutinazi nu kubaluta bulazi na mwino ku nzila nnene.”
33 Bamulume bansania ba Israeli batukile ku biziki bibabezaga mubyo nu beidongekile ku bita ku Baali-Tamari. Nu baIsraeli, bakobi, babisukile ku biziki bibabezaga mubyo mu isoa lili bwigi na Gibea. 34 Bamulume tununu ikumi (10.000) basombwedwe mu baIsraeli bansania beitenne nu bita byabede bibibu, tondo baBenjamina tabamenyine buno lukuo lwabezaga bwigi nabo. 35 Yehowa akindile baBenjamina lwabusio lwa baIsraeli, nu bamulume ba Israeli beitile tununu makumi mabili nu tutano nu lukama lumozi (25.100) lwa bamulume ba baBenjamina mu bubo busi; banse babezaga na myene za nganda.
36 BaBenjamina bamonine buno bakindwa, kubuno bamulume ba Israeli beiyenzizie lumbusambusa lwabusio lwa baBenjamina kubuno babezaga na kilemanizio kya babo bakobile ku Gibea. 37 Nu bakobi basasizie kusolobokela mwino nu beitile mwino unsania na myene za nganda. 38 Kamenyikilo kalongekilwe gasamba bamulume ba Israeli nu bakobi buno babakamie muuki mwingi mu mwino. 39 Bamulume ba Israeli bagalukile mu bita.
BaBenjamina balingile kwita bamozi ku baIsraeli, bwigi ku bamulume makumi masatu. Kubuno batendile bunee: “Lebelebe bakindwa lwabusio lweitu anga mu bita bitangi.” 40 Nu muuki mwingi wabakamine mu mwino. BaBenjamina bakebetukile nu bamonine mwino unsania ukubakama muuki mu mpena. 41 Bamulume ba Israeli bagalukile, nu bamulume ba Benjamina bazangilezangile kubuno bamonine buno bubi bwababasila. 42 Ububo bagalukile lwabusio lwa bamulume ba Israeli nu batinine mu nzila za ku kalula, tondo bita byabasangile nu babo batukile mu mwino babeitile munkatini mwabo. 43 Batimbikanizie baBenjamina nu babayangile geteli kumunwa. Babeitile aaba nu babasile butunganana na Gibea ku lulenge lwa kuntata. 44 Bamulume tununu ikumi nu kinana (18.000) twa baBenjamina bakule, banse mapuka. 45 Nu bagalukile nu batinine mu kalula ku ikozi lya Rimoni. Beitile kubo tununu tutano (5.000) mu nzila. Babasangile ku Gidomu nu beitile tununu tubili (2.000) kubeli.
46 Bansania bakule mu bubo busi ku baBenjamina babezaga bamulume tununu makumi mabili nu tutano (25.000) beiya myene za nganda, banse mapuka. 47 Nu bamulume nkama mutuba batinine ku ikozi lya Rimoni mu kalula, nu beikede mulyo myezi inazi. 48 Bamulume ba Israeli bagalukide bantu ba Benjamina nu babeitile na myene za nganda, bantu nu bituganwa, bansania basangagwa mu mwino. Nu bagisizie miino insania zibasangile.