Misako mbi za bantu ba Gibea wa Benjamina.
19
1 Mu bibyo bindi bitabezaga mukota mu Israeli, muLawi umozi wikalaga lisa na miduko za Efuraimu akatile mukikulu umozi wa Betelehemu-Yuda anga kalemba. 2 Kalemba kage kamukitide butazi. Atukile kweli nu asubizie ku numba z'isi ku Betelehemu-Yuda. Eikede kuko myezi inazi migimagima. 3 Iba wage azanzukile nu amuyangile buno atendane nage nu kumusubya lingo. Endile na mukiti wage nu mpunda ibili. Wozo mukikulu amwingizizie mu numba z'isi. Isi wa mukikulu abogilebogile kumumona ko. 4 Isibyala amukatile nu eikede nage bindi bisatu. Balide nu banune nu beiyombekile gago. 5 Ku kindi kya binazi, bayukile lukesikesi nu azanzukile kwenda. Isi wa wozo mukikulu atendile mukozi wage bunee: “Lindia mutima wobe n'idia ikeke kusila nti mwenda.” 6 Beikede nu balide nu banune bobabili gamozi. Isi wa mukikulu abwide wozo muntu bunee: “Tingia lingo kindi kimozi nu mutima wobe ubogeboge.” 7 Wozo muntu azanzukile buno ende, tondo mu kumusindika kw'isibyala, atingizie lingo kikyo kindi gago. 8 Ayukile lukesikesi buno ende ku kindi kya bitano. Isi wa mukikulu amubwide bunee: “Lindia mutima wobe, nkukusega.” Nu beikede gago aaba nu mwigolo. Balide bobabili.
9 Wozo muntu azanzukile kwenda gamozi na kalemba kage nu mukiti wage. Tondo isibyala, isi wa mukikulu, amubwide bunee: “Lola, busi bwida. Ikala lingo kindi kikino, nkukusega. Busi bwida. Ikala kuno, mutima wobe ubogeboge nu mu nindunindu, mwayuke kwenda kweinyu ku numba.”
10 Tondo wozo muntu ntazigile kutingia kikyo kindi. Azanzukile nu endile na mpunda zage ibili zanzoa nu kalemba kage gamozi nage, nu abasile butunganana na Yebusi, u Yerusalema. 11 Gababasile bwigi na Yebusi, busi bwabezaga bwigi na kwida, mukiti abwide mukota wage bunee: “Vwa, nkukusega, twingile mu mwino wono wa baYebusi, twiyombeke mugo.”
12 Mukota wage amwakwide bunee: “Tatwingile mu mwino wa babilongo guteli wa baIsraeli, tondo twatinge ku Gibea.” 13 Atendile ku mukiti wage bunee: “Twende, tusigelele bwigi na kimozi kya bibyo biziki, Gibea aba Rama, u kutwiyombekele lelo.” 14 Ububo bendile nu busi bwabeidide bwigi na Gibea wa Benjamina. 15 Begetile kuko kwingila mu mwino nu kwiyombeka mu Gibea. Nu wozo wamulume eikede ga mulungu wa mwino, kubuno ta wampa wabeingizizie kwage ku numba kwiyombeka.
16 Mukungu umozi wa wamulume abezaga akutuka ku mulimo wa ku isoa lyage mwigolo. Abezaga muntu wa kisi kya tukililo kya Efuraimu nu eikalaga mu Gibea. Bantu ba mwino babezaga baBenjamina. 17 Alambwide meiso mage nu amonine ku mugeni ga mulungu wa mwino. Wozo mukungu amubuzizie bunee: “Ukwenda kuni? Nu ukutuka kuni?”
18 Amwakwide bunee: “Tukutuka ku Betelehemu-Yuda nu tukutinga ku lisa lya kisi kya tukililo kya Efuraimu, kunkubezaga. Nendile ku Betelehemu-Yuda nu nkusubya ku numba za Yehowa. Tondo takuli muntu ukunsekela kwage ku numba. 19 Tuli na mampempe nu idia lya mpunda zeitu nu tumpampa nu maku kundi nu ku mukiti wobe wa mukikulu nu ku musikila uli gamozi na bakiti bobe; tatukwiyanina kena.”
20 Wozo mukungu abwide bunee: “Bubobelelo kuguli; namukase binse bimukwiyanina, tugu tamwiyombeke ga mulungu.” 21 Abeingizizie mu numba zage. Akasile mpunda idia, nu abogezie ku magulu nu balide nu banune.
22 Gababezaga bakubogaboga, bamonine ku bamulume ba mwino, migazanga, batimbile numba nu balibwide ku lwibi. Babwide mukungu nyene numba bunee: “Basia wozo muntu wingide mu numba zobe buno tukite butazi nage.”
23 Nyene numba abasile kubeli nu ababwide bunee: “Kilo, mibuto zane. Tamukite bubi bwigezye gago, nkumusega. Kubuno wozo muntu eingide mu numba zane, tamukite bubo bwagi. 24 Lola, nili na mukinga wane utemenywa na wamulume, nu kalemba kage. Ndi mwatunda, nkumubasiziabo kumbuga mubakitile butazi nu kubakitila anga buli busoga ku meiso meinyu; tondo tamukite bubo bwagi ku wono muntu.”
25 Tondo babo bamulume tabazigile kumungwa. Bubo wozo muntu akatile kalemba kage nu ababasizizie ko kumbuga. Bakalimbizie kindi kinsania aaba nu ku kukya kwa busi. Mu kukya kwa busi, bamusigile. 26 Mu nindunindu, mukikulu avule nu agwede ga mwingilo wa numba za wozo muntu mwabezaga iba wage, eikede gago aaba nu ku kusanuka kwa busi.
27 Mu nindunindu, gayukile nyene mukikulu, eigwide nibi za numba buno atuke nu kwiyendela nu, eitangede ku kalemba kage kagwede bukukama ga mwingilo wa numba nu maboko mage mabezaga gantata ga kitiko. 28 Amubwide bunee: “Zanzuka, twendazi.” Tondo ntamwakwide. Amubikile gantata ga mpunda. Wozo muntu alingile lugendo nu endile kwage.
29 Geingide kwage ku numba, atolile mwene nu abagile kalemba kage nu abeganizie biganza byage byindi ikumi nu bibili. Abisingile ku myaga insania za Israeli. 30 Bansania bamonine ku bubo babwide bunee: “Tabukitagwa aba tabumonekagako na gatukide bantu ba Israeli ku kisi kya Misri aaba nu lelo. Lolazi, kengelazi butukita nu tendazi.”