BaDani beka nkisi za Mika nu muLawi wage.
18
1 Mu bibyo bindi takwabezaga mukota mu Israeli. Nu mu bibyo bindi kikanga kya Dani kyalondaga ntiko za kwikala muzo, kubuno aaba nu bubo busi babezaga tabekata bwiyani bwabo munkatini mwa bikanga bya Israeli. 2 BaDani basingile bamulume batano ba kikanga kyabo, mapuka, kutuka ku Zora nu ku Estaoli kutambula kisi nu kukititika. Bababwide bunee: “Endazi kutitika kisi.” Nu babasile ku kisi kya tukililo kya Efuraimu ku numba za Mika nu beiyombekile ko. 3 Gababezaga bwigi na numba za Mika, bamenyine iyuki lya wozo musikila muLawi. Bakebetukile ko nu bamubuzizie bunee: “Nazi wakulusizie kuno? Ukukita kikizi muno? Uli na kikizi kuno?” 4 Abakwide bunee: “Bubuno nu bubuno u bunkukitila Mika. Akunkasaga lukalilo nu niseli sankoga wage.”
5 Bamubwide bunee: “Tukukubuzia kusega ku Kalaga buno tumenyinine ndi lugendo lweitu lwabe na mutali.”
6 Sankoga ababwide bunee: “Endazi mu bubobelelo. Lugendo lweinyu lukumoneka na Kalaga.”
7 Babo bantu batano bendile nu babasile ku Laisi. Bamonine bantu ba kuko bubeikede mu bubobelelo mu lukita lwa baSidoni mu kibibi nu geteli boba, nu buno mu kikyo kisi tamwabezaga mwangati wa kubasuna mu bitondo binsania, nu bubeikede bulazi na baSidoni nu tababezaga na nango na bango.
8 Basubizie ku mibuto zabo ku Zora nu Estaoli nu zababuzizie bunee: “Musagu mukizi?”
9 Nu bakwide bunee: “Zanzukazi, twendazi kwitana nabo kubuno twamonine kisi; nu lola, kili kisoga nunse. Inyuwe mwikala kibibi? Muuzingezinge kwenda kwingila mu kikyo kisi kukyangata. 10 Gamwende, mwabase ku bantu beli mu bubobelelo. Kisi kili kinene nu Kalaga akikasenne ku maboko meinyu, kiziki kitakwida kena kili mu kisi.”
11 Bamulume nkama mutuba ba kikanga kya Dani batukile ku Zora nu Estaoli na ngabo. 12 Babakamine nu babikile ido ku Kiriati-Yearimu mu Yuda. Ukinsa kikyo kiziki kyamaninwe Mahane-Dani aaba nu lelo; kili ku lulenge lwa kunsi kwa Kiriati-Yearimu. 13 Kutuka kuko, batingile ku kisi kya tukililo kya Efuraimu nu babasile ku numba za Mika.
14 Babo batitiki batano ba kisi kya Laisi babwide mibuto zabo bunee: “Ndi tamwizi buno mu zeno numba muli efodi nu terafi nu nkisi zabazwa nu nkisi za kyuma kyanyengulwa? Menyazi lino bumukita.” 15 Bagalukile kuko nu beingide mu numba za wozo musikila muLawi, ga kiziki kya Mika nu bamubuzizie misagu zage. 16 Bantu nkama mutuba ba kikanga kya Dani na ngabo mu maboko bemenne ga mwingilo wa kikyo kiziki. 17 Gabezaga sankoga emana ga mwingilo wa kiziki gamozi na babo bantu nkama mutuba beikeite ngabo mu maboko, babo batitiki ba kisi batano beingide mumo nu bakatile nkisi zabazwa nu efodi nu terafi nu nkisi za kyuma kyanyengulwa.
18 Gabeingide mu numba za Mika nu kutola nkisi zabazwa nu efodi nu terafi nu nkisi za kyuma kyanyengulwa, sankoga ababuzizie bunee: “Buni bumukukita?”
19 Bamubwide bunee: “Ikala kibibi. Limba kwanwa kobe nu vwa n'iswe ube tateiswe nu sankoga weitu. Ndi busoga kuba sankoga mu numba za muntu umozi aba kuba sankoga wa kikanga nu kikanga kinene mu Israeli?” 20 Mutima wa sankoga wabogilebogile, atolile efodi nu tulimu nu nkisi zabazwa nu eingide mu kibombo kya babo bantu. 21 Bagalukile nu bendile. Babikile bana nu bituganwa nu bikulo byabo ga lwabusio.
22 Gababezaga bese bulazi na numba za Mika, bamulume ba numba zabezaga bwigi na numba za Mika bakundamenne. Bayangile baDani nu babasangile. 23 Bamanine baDani. Bakebetukile nu batendile Mika bunee: “Musagu mukizi buwavwa na wono musanganano?”
24 Abakwide bunee: “Mwekile tulaga twane tunakitile nu sankoga nu mwendile. Kikizi kinasigala nakyo. Nu buni bumunambuzia, musagu mukizi?”
25 BaDani bamubwide bunee: “Ntutungusie ku iyuki lyobe, beiya kasungu banakivwa kukusolobokela nu nti wazimizia kalamo kobe nu ka numba zobe.” 26 Kusila baDani bendelede, nu Mika, gaamonine buno bamutinga magala, agalukile nu asubizie kwage ku numba.
27 Bekile bibyo byakitile Mika nu sankoga waabezaga nage, nu babasile ku Laisi, ku bantu beli kibibi nu mu bubobelelo. Babasolobokede nu babeitile na mwene wa nganda nu bagisizie mwino. 28 Takwabede wakubonia kubuno wabezaga bulazi na Sidoni nu bantu bago tababezaga na nango na bango. Wabezaga mu kibitabita kili ku ntungo za Beti-Rehobu.
BaDani bobakile mwino nu beikede mugo. 29 Bagumanine Dani izina ly'isibo Dani, wabutilwe na Israeli. Tondo mu kulinga mwino wamanagwa Laisi.