Mika akita nkisi.
17
1 Kwabezaga muntu umozi mu kisi kya tukililo twa Efuraimu, izina lyage Mika. 2 Abwide nina bunee: “Byindi bya feza kanunu nu lukama lumozi (1.100) byibilwe kuguli, nu waswilide ku matuzi mane, lola, zezo feza nili nazo. Nne u wazitolile.” Nina atendile bunee: “Mwana wane, mponga za Yehowa zibe kuguli.”
3 Asubizie byindi kanunu nu lukama lumozi (1.100) bya feza ku nina. Nu nina abwide bunee: “Nakasana zeno feza mu maboko mane ku Yehowa ku kabamba ka mwana wane buno zikitwe nkisi zabazwa nu za kyuma kya kunyengula. Ububo nakusubizie zo lingo.”
4 Tondo mwana wage asubizie feza ku nina, nu akatile byindi nkama ibili bya feza nu azikasile ku mutumbi. Azikitile nkisi za kubaza nu nkisi za kyuma kya kunyengula. Nu zabede ku numba za Mika.
5 Wozo muntu Mika abezaga na numba za tulaga. Akitile efodi, u nsulu za busankoga, nu terafi.a Nu akasenne umozi ku basikila bage kuba sankoga wage. 6 Mu bibyo bindi takwabezaga mukota mu Israeli; nawe na wakitaga bwamuswagila.
7 Kwabezaga musikila umozi mu Betelehemu wa Yuda. Abezaga muLawi, nu eikalaga mu mwino wa kikanga kya Yuda. 8 Wozo muntu atukile mu mwino wa Betelehemu-Yuda kulonda kiziki kya kwikala mukyo nu abasile ku kisi kya tukililo kya Efuraimu ku numba za Mika. 9 Mika amubuzizie bunee: “Ukutuka kuni?”
Amwakwide bunee: “Nili muLawi wa Betelehemu-Yuda nu nkulonda kiziki kya kwikala.”
10 Mika amubwide bunee: “Ikala na nne nu wabe tatane nu sankoga wane. Nakukase byindi ikumi bya feza mwaka na mwaka, nu nsulu nu idia.” Bubo muLawi eingide. 11 MuLawi abogilebogile kwikala na wozo muntu nu musikila muLawi abede anga umozi wa bana bage. 12 Mika eimikile muLawi. Wozo musikila abede sankoga wage nu eikede mu numba za Mika. 13 Mika abwide bunee: “Kano kaluma nizi buno Yehowa ankitile busoga kubuno muLawi eli sankoga wane.”