Samsoni eka nibi za Gaza.
16
1 Samsoni endile ku Gaza. Kuko, amonine ku kitazi kya mukikulu nu eiyombekile nage. 2 Bantu ba Gaza basambalidwe bunee: “Samsoni abasa muno.” Bamutimbile na numba, bamukobede kindi kinsania ga mwingilo wa mwino; nu beikede kibibi kindi kinsania, batendaga bunee: “Mu kukya kwa busi twamwite.” 3 Samsoni eiyombekile aaba nu nkungu mutuba za kindi. Ayukile mu kindi nu akatile nibi za mwingilo wa mwino, nu mango mazo amayulile gamozi na mpimbitoa nu abyekile binsania ga bituli. Abikizie gantata mwiduko guli butunganana na Hebroni.
4 Kusila kwa bubo, atundile mukikulu umozi mu kibitabita kya Soreki, izina lyage Delila. 5 Bakota ba baFilistini bendile kweli nu bamutendile bunee: “Mubotye tanga, umenye kukutukila magala mage manene, nu buni butunavwama kumukinda, buno tumukande nu kumusungia. Na muntu na muntu kutuli na wakukase byindi bya feza kanunu nu lukama lumozi (1.100).”
6 Delila abwide Samsoni bunee: “Ndi bwakulungana, ntende kuni kukutukila magala mobe manene nu kikizi kinakukanda buno usungibwe.”
7 Samsoni amwakwide bunee: “Ndi bankanda na mizigi mbisi mutubakamo za bunkanda, natambe nu nti nabe anga bango bantu.”
8 Ububo bakota ba baFilistini bamuvwilide na mizigi mbisi mutubakamo za bunkanda nu amukandile nazo. 9 Nu we abezaga abisa bantu mu busio. Amutendile bunee: “Samsoni, baFilistini bavwa kuguli!” Nu akalikizie mizigi anga lweku lwagia na keiya. Ububo magala mage tamamenyinwe.
10 Delila abwide Samsoni bunee: “Lola, wankita nguza nu kuneka buza; ndi wantananizie kano kaluma, mbule kikizi kinakukanda.”
11 Amwakwide bunee: “Ndi bankanda lebelebe na misinge zikili z'iyota, natambe nu nti nabe anga bango bantu.”
12 Delila akatile misinge z'iyota, amukandile nazo nu atendile Samsoni bunee: “Samsoni, baFilistini bavwa kuguli!” Nu kasi bantu babezaga bamubisamina ku busio. Akutwide zezo misinge zabezaga ku maboko mage anga ibulubunzi lya lukusa.
13 Delila abwide Samsoni bunee: “Aaba nu kano kaluma uki wankita nguza nu kunengelela. Ndolesie kyunakandwa nakyo.”
Nu Samsoni amwakwide bunee: “Luka bibombo mutubakamo bya nzwili za ku itoe lyane gamozi na misinge za kuluka.”
14 Nu we azikandile na manselo, nu amutendile bunee: “Samsoni, baFilistini bavwa kuguli!” Ayukile ku tulo, nu endile na nsinge nu misinge nu kasungu kansania.
15 Nu Delila amubwide bunee: “Buni bugunantenda buno nakutunda nu mutima wobe taguli na nne gamozi. Wankita nguza mamano mambizi masatu, nu ntukumbula kuni kukutuka magala mobe manene.”
16 Nu gabede amukutia na mbuzio zage busi na busi nu kumusindika, mutima wage wakutilwe nu kumusindika ku lukuo, 17 nu amukandulide mutima wage unsania nu amubwide bunee: “Kakengo taketingaga ku itoe lyane, kubuno nili muNaziri wa Kalaga kutukila kubutwa kwane. Ndi nabegwa, magala mane matuke kundi nu nti nabe anga bango bantu.”
18 Delila gaamonine buno Samsoni amukandulila mutima wage unsania, amanine bakota ba baFilistini. Abatendile bunee: “Mu luno, bakamazi kubuno ankandulila mutima nu kunsambalila binsania.” Nu baFilistini babakamine kweli na feza mu maboko mabo. 19 Delila amuyamikizie ku bilumbu byage. Amanine wamulume umozi, kwalula bibyo bibombo mutubakamo bya nzwili za ku itoe lyage. Kusila, alingile kumusungia. Magala mage matukile kweli. 20 Amutendile bunee: “Samsoni, baFilistini bavwa kuguli!”
Ayukile ku tulo nu atendile bunee: “Natuke nu kwiyonia anga bunkukitaga.” Tondo ntamenyine buno Yehowa amusiga.
21 Nu baFilistini bamukatile nu bamulungwide meiso; bakumbile nage ku Gaza nu bamukandile na bikando bya nsubi. Atimbagia ikozi lya kugoga mu numba za kikando. 22 Tondo nzwili zage zalingile kwasa lingo kumbusa kwa kwalulwa.
23 Kusila, bakota ba baFilistini bakundamenne kukasana kayulo kanene ku kalaga kabo Dagoni, nu kubogaboga. Batendile bunee: “Kalaga keitu kakasenne mwiti weitu Samsoni mu maboko meitu.”
24 Gamonine bantu kweli, baganwine kalaga kabo kubuno batendile bunee: “Kalaga keitu kakasenne mwiti weitu ku maboko meitu, mwiti wa kisi kyeitu, witile beingi kutuli.”
25 Nu gabezaga mitima zabo na mbogimbogi, batendile bunee: “Manazi Samsoni buno avwe kutuminina.” Ububo bamanine Samsoni ku numba za kikando nu abaminine. Bamwemanizie gasamba mango.
26 Samsoni atendile musikila wamukataga mu kuboko bunee: “Nsige nikatilizie ku mango meimika numba buno negamine kumo.” 27 Numba zabezaga ziyala na bamulume nu bakikulu nu bakota bansania ba baFilistini nu gantata g'itala kwabezaga bwigi ku tununu tusatu twa bamulume nu bakikulu balolaga ku mamina ma Samsoni.
28 Samsoni asegile ku Yehowa bunee: “Yehowa, Mwiya Bwangato Bunsania, nkengele, nkukusega. Nkase magala lilino limbizi limozi tugu, nisube ku baFilistini ku kabamba ka meiso mane mabili.” 29 Nu Samsoni akatile ku mango mabili ma munkatini mabezaga meimika numba, limozi ku kuboko kwa seikazi, lingo ku kuboko kwa seidume. 30 Samsoni atendile bunee: “Nikue gamozi na baFilistini.” Eikumbile namo bubibu. Numba zagwede gantata ga bakota nu bantu bansania babezaga muzo. Bantu beitile mu lukuo lwage, babede beingi kutinga babo beitile mu kalamo kage.
31 Mibuto zage nu z'isi insania bakumbile nu bekile kitumba. Gababakamine, bamuyikile gasamba Zora nu Estaoli mu nsinda z'isi Manoa. Abezaga ngatu mu Israeli myaka makumi mabili.