Samsoni nu baFilistini.
15
1 Kumbusa kwa bindi bimozi, mu bindi bya matubulo ma ngano, Samsoni endile na kyana kya mpene kulola mukazi wage. Abwide bunee: “Nkutunda kwingila ku busio kuli mukazi wane.” Tondo isibyala ntazigile eingila. 2 Nu isibyala atendile bunee: “Nakengede buno wamusombile nunse nu namukasenne ku kilemba kyobe. Muto wage ta mbangilwa kumutinga? Ndi bwakutananizia, musonge mu kiziki kyage.” 3 Samsoni ababwide bunee: “Nsyabe mubi ku baFilistini lingo ndi nabakita musumbia.” 4 Nu Samsoni endile, nu akatile mikala nkama isatu, nu atolile tusuku. Akandile mikala ibili ibili ku mikila na kasuku gazisamba. 5 Gaabangizie tusuku, alekede mikala kwenda mu ngano za baFilistini nu zagisizie ngano, za mikanda nu zitekalwa, aaba nu ku masoa ma miti za biguma bya makiti.
6 Nu baFilistini babuzizie bunee: “Nazi wakita bubuno?”
Babakwide bunee: “Samsoni, mukozi wa mu Timuna, kubuno isibyala akasenne mukazi wage ku munyage.” Ububo baFilistini babakamine nu bagisizie mukikulu nu isi na keiya.
7 Samsoni ababwide bunee: “Aba munakita bubo, nalekele nti nisuba kumuli.” 8 Asakile nabo bukali nu abeitile nunsania. Nu agelile ku lwanda lwa Etamu nu eikede mu kalimba.
9 Kumbusa baFilistini babakamine nu babikile ido ku Yuda nu bakukile mu Lehi. 10 BaYuda bababuzizie bunee: “Kubuni kumwavwa kutwitania?”
Bakwide bunee: “Twavwa kukanda Samsoni buno twisube ku bwatukitile.”
11 Bantu tununu tusatu (3.000) twa baYuda bagelile ku kalimba ka lwanda lwa Etamu nu babwide Samsoni bunee: “Ndi ntwizi buno baFilistini batwangata? Buni buwatukitide?”
Nu abakwide bunee: “Nabakitide anga bubankitide.”
12 Nu bamubwide bunee: “Twakumba kukukanda buno tukukasane ku maboko ma baFilistini.”
Samsoni abakwide bunee: “Ndumbilazi buno beinyuwe tamwanite.”
13 Bamwakwide bunee: “Kilo, lebelebe tatwakwite tondo tukukukanda tugu nu kukubika ku maboko mabo.” Bamukandile na mizigi ibili mibisi nu babakamine nage kutuka ku kalimba.
14 Gaabasile ku Lehi, baFilistini bamukulumanizie nu kumukugila. Muuza wa Yehowa wamuvwilide na magala nu mizigi zibamukandaga nazo ku maboko zabede anga lweku lwagia na keiya nu bikando byakolokile ku maboko. 15 Amonine mukwankete mubisi wa mpunda. Agusongizye nu eitile kanunu kamozi (1.000) ka bantu nago.
16 Nu Samsoni atendile bunee: “Na mukwankete wa mpunda, kalundo nu tulundo; na mukwankete wa mpunda, nita kanunu kamozi (1.000) ka bantu.” 17 Nu gaasilile kutenda, eisile wozo mukwankete wabezaga mu kuboko. Nu kikyo kiziki kyamaninwe Ramati-Lehi, bwisulilwa Kakililo ka mukwankete.
18 Samsoni akule na mpusia nunse nu asegile ku Yehowa bunee: “Ndi wakasile bukindi bubuno bunene ku kuboko kwa mukiti wobe buno kano kaluma nikue na mpusia nu kukindwa na babo batamonesibwa?” 19 Ububo Kalaga atile itengu lyabezaga mu lwanda lwa Lehi nu mwabasile mazi. Gaanune kumo, mutima wage wamuyukile lingo. Ububo izina lyako lyamaninwe Enihakore, u bwisulilwa buli kanuabalongo ka wozo wasegile, keli mu Lehi aaba nu lelo.
20 Samsoni abede ngatu mu Israeli mu bindi bya baFilistini myaka makumi mabili.