Samsoni eita kimbwe.
14
1 Samsoni agelile ku Timuna. Amonine mukikulu ku Timuna wa bakinga ba baFilistini. 2 Abakamine nu atendile isi nu nina bunee: “Namonine mukikulu umozi ku Timuna wa bakinga ba baFilistini. Wozo u umunsongela.” 3 Isi nu nina bamwakwide bunee: “Ndi takuli mukikulu munkatini mwa bakinga ba mibuto zobe aba ba kilongo kyeitu buno wende kusonga mukikulu wa baFilistini batamonesibwa?”
Tondo Samsoni akwide isi bunee: “Nsongele wozo kubuno u wantananizia.” 4 Isi nu nina tabamenyine buno bwatukile ku Yehowa, buno alonde kwitana na baFilistini. Mu bibyo bindi, baFilistini bangataga baIsraeli.
5 Samsoni agelile gamozi n'isi nu nina ku Timuna. Gababasile ku masoa ma mizabibu ma Timuna, kyana kya kimbwe kyamuzugide mu kwitangala kweli. 6 Muuza wa Yehowa wamuvwilide na magala nu akyatile anga bunatwa kyana kya mpene. Ntabezaga na kena mu kuboko kwage. Nu ntasambalide isi aba nina bubo bwakitile. 7 Agelile nu atendenne na wozo mukikulu, nu atananizizie Samsoni nunse.
8 Kusila kwa bindi bimozi, asubizie kumutola, nu egetile kulola kitumba kya kimbwe. Nu amonine munkunya wa mizunzu nu buuki buseli mu kitumba kya kimbwe. 9 Abutagile na maboko nu endile abulia mu nzila. Gaabasile ku isi nu nina, abakasile kubo nu balide. Tondo ntabatendile buno abutikizye mu kitumba kya kimbwe.
10 Isi agelile kumonana na wozo mukikulu nu Samsoni akitile kisagulo kuko, kubuno u bwakitaga basikila. 11 Gabamumonineko, bamukasile banyage makumi masatu, nu babede gamozi nage. 12 Samsoni ababwide bunee: “Nimwise musumo umozi. Ndi mwanisulilago mu bindi bibino mutubakamo bya kisagulo nu mwagumenya, nti namukase nsulu makumi masatu za munda nu za gantata makumi masatu. 13 Tondo ndi tamwavwama kunisulilago, nti beinyuwe u mwankase nsulu makumi masatu za munda nu makumi masatu za gantata.”
Nu bamwakwide bunee: “Isa musumo wobe, tungwe kugo.”
14 Nu abatendile bunee: “Mu mulizi mwatukile idia nu mu mwiya magala mwatukile nse.”
Ku bindi bisatu tabavwamine kwisula wozo musumo. 15 Ku kindi kya binazi, batendile mukazi wa Samsoni bunee: “Luta iba wobe na mponga buno atwisulile musumo. Ndi ntwakita bubo, nti tukukugisia na keiya gamozi na numba za so. Kasi mwatumanine kuno kutuzambia. Ta bubo?”
16 Mukazi wa Samsoni alilile kweli nu amutendile bunee: “Wansomba! Ntukuntunda. Wisile musumo ku bantu ba kilongo kyane tondo ntwanisulilago.”
Nu amwakwide bunee: “Lola, nsyaguswilide tatane aba mmane, ndi uwe u gunisulilago?” 17 Alilile kweli bindi mutubakamo bya kisagulo. Ku kindi kya mutubakamo, amwisulide go kubuno amukutizie. Nu mukikulu eiswide musumo ku bantu ba kilongo kyage.
18 Ku kindi kya mutubakamo, busi tabwida, bantu ba mwino babwide Samsoni bunee: “Kikizi kili nse kutinga buuki? Nu kikizi kili na magala kutinga kimbwe?”
Ababwide bunee: “Songo tamwambotezie na mukikulu wane songo tamwamenya bwisulilwa bwa musumo wane.” 19 Nu Muuza wa Yehowa wamuvwilide, akumbile ku Askeloni, nu eitile bantu ba kuko makumi masatu, nu akatile nsulu zabo. Akasile nsulu zabo ku babo beiswide musumo wage nu bongoa bwage bwabede bukali. Abakamine ku numba z'isi. 20 Mukikulu wa Samsoni akasilwe ku munyage na Samsoni waabezaga agomia nage.