Davidi asubya bakandwa ba Ziklagi.
30
1 Ku busi bw'isatu, gabasile Davidi nu bantu bage ku Ziklagi, basangile buno baAmaleki bavule ku Negevi nu bakindile Ziklagi nu kugugisia na keiya, 2 nu bendile na bakikulu nu bansania babezaga mugo, bakulu nu bana. Tabeitile wampa. 3 Gabasile Davidi na bantu bage ku mwino, bamonine wagia na keiya; bakazi babo bansania benda bakandwa. 4 Ububo Davidi nu bantu babezaga gamozi nage balilile bubibu nu kukutwa na kulila. 5 Bakikulu babili ba Davidi bekilwe bakandwa, Ahinoamu muYezereheli, nu Abigaili, musigala wa Nabali muKarmeli. 6 Davidi atambile nunse kubuno bantu bakalile lwango lwa kumwisila makozi kubuno mitima za bantu bansania zakonkedwe, na muntu na muntu ku kabamba ka bana bage, tondo Davidi akatile magala ku Yehowa, Kalaga wage. 7 Davidi amanine Abiatari sankoga, mwana wa Ahimeleki, bunee: “Mvwile na efodi.” Abiatari alusizie efodi ku Davidi. 8 Davidi abuzizie ku Yehowa bunee: “Ndi nitume lubilo kumbusa kw'iyombo lilino lya banyagi, ndi nabasange?”
Amwakwide bunee: “Itume lubilo kubuno lebelebe wabasange, aba ntwide konia bansania.”
9 Ububo Davidi endile, we nu bantu nkama mutuba gamozi nage. Bavule ku luuzi lwa Besori, gago gasigede nkama ibili bakutwa. 10 Tondo Davidi ayangile lubilo, we nu bantu nkama inazi. 11 Basangile muMisri umozi mu isoa, bamulusizie ku Davidi. Bamukasile idia nu mazi ma kunua; 12 bamukasile kyindi kya kinkwanga nu biguma bibili byakama bya figi. Gaalide, magala mage masubizie lingo, kubuno abezaga ntelia idia aba kunua mazi bindi bisatu, musi nu kindi.
13 Davidi amubuzizie bunee: “Uli muntu wa nazi, nu ukutuka kuni?” Amwakwide bunee: “Nne nili musikila wa Misri, mukiti wa muAmaleki. Mukota wane ansigile kubuno kutukila bindi bisatu, nili na lusambo. 14 Twasambula ku lulenge lwa baKereti nu ku Negevi za Yuda, nu Negevi za Kalebu. Twagisizie Ziklagi na keiya.” 15 Davidi amubwide bunee: “Ndi wansondelezie ku iyombo lilyo?”
Amwakwide bunee: “Ndumbilile ku Kalaga buno ntwanite aba ntwankasane ku maboko ma mukota wane, nu nne nakusondelezie ku iyombo lilyo.”
16 Nu gaasondelezagia Davidi, bamonine baAmaleki bakuka kisi kinsania. Balide nu banune nu kukita kisagulo, kubuno banyagile bikulo bingi mu kisi kya baFilistini, nu kya Yuda. 17 Davidi abeitile kutukila nindunindu aaba nu mwigolo lya bungo busi; ta wampa watinine tugu basikila nkama inazi batinine gantata ga ngamia. 18 Davidi onezie bansania babezaga bekwa na baAmaleki; bakikulu bage babili gamozi na bango. 19 Tabeidile kena, aba kakeke aba kanene, bana bamulume aba bakinga, aba ntiko insania zatolile baAmaleki. Davidi asubizie binsania. 20 Batolile mikoko insania nu ngombe zibenzagia lwabusio lwabo; batendaga bunee: “Zeno u ntiko za Davidi.”
21 Kusila, Davidi abasile ku bantu bage nkama ibili babezaga bakutwa nunse nu tabavwamaga lingo kumuyanga, babo basigilwe ku luuzi lwa Besori bendile bakulumania Davidi nu kukulumania bantu babezaga gamozi nage. Nu gabasile Davidi bwigi nabo, abasekede. 22 Tondo bantu babi bamozi ba bo bendile gamozi na Davidi bakwide bunee: “Kubuno tabendile gamozi n'iswe, tatwabakase ku ntiko zitwamwenne, tugu na muntu na muntu akaswe mukazi wage nu bana bage, babatole bende.”
23 Tondo Davidi ababwide bunee: “Mibuto zane, tamukite bubo ku zezo ntiko zatukasile Yehowa; nu We atulangile, nu kugabula iyombo lyatuvwilide mu maboko meitu. 24 Lingo, eli nazi wamungwilile ku kitondo kikino? Kubuno anga buli kibu kya wozo ukukumba kwenda ku bita kwitana, u bubo buli kibu kya wozo wasigede ukulanga mwino. Bibu byabo byabe bulingilingi.” 25 Nu kutukila bubo busi lyabede ikakizio ku baIsraeli aaba nu lelo.
26 Gabasile Davidi ku Ziklagi, asingile kibe ku bakulu ba Yuda, u beida bage. Abasingide musagu bunee: “Lolazi lukaso lweinyu ku ntiko za basombi ba Yehowa.” 27 Azisingile ku babo ba ku Beteli nu ba ku Ramoti nu ba ku Negevi za Yatiri, 28 nu ba ku Aroeri, nu ba ku Sifumote, nu ba ku Estemoa, 29 nu ba ku Rakali, nu ba ku miino za baYerameli nu za baKeni, 30 nu ku babo ba ku Horma nu ba ku Borasani nu ba ku Ataki, 31 nu ba ku Hebroni, nu kunsania kwendaga Davidi wenyene na bantu bage.