BaFilistini basubya Davidi.
29
1 BaFilistini bakungikile mayombo mabo mansania ku Afeki nu baIsraeli bakitile ido bwigi na kanuabalongo kabezaga ku Yezereheli. 2 Bakota ba baFilistini batingile mu bibombo bya lukama nu bibombo bya kanunu. Davidi nu bantu bage bayangile kumbusa kwa bantu ba Akisi. 3 Ububo bakota ba baFilistini babuzizie bunee: “BaEbrania babano bakukita kikizi gano?” Akisi abakwide bunee: “Wono u Davidi, mukiti wa Saulo mukota wa baIsraeli, wabezaga gamozi na nne mwaka umozi aba ibili. Nsimonaga ku bubi kweli kutukila gaabasile kundi aaba nu lelo.” 4 Tondo bakota ba baFilistini bamongedwe; bamubwide bunee: “Wono asubye ku kiziki kyage kiwamukakizizie. Ntuzige akumba gamozi n'iswe ku bita, anakivwa kutugalukila mwiti weitu ku bita. Buni bwaneikulumania na mukota wage ndi nteli na matoe ma bantu babano? 5 Ndi ta Davidi wono u beimbaga mu meiya bunee: ‘Saulo eitile twage tununu, nu Davidi tununu tutanaganzwa?’”
6 Ububo Akisi amanine Davidi, nu amubwide bunee: “Lebelebe wakitile bwisanana kutukila busi buwamvwilide. Buli busoga kundi buno wende n'iswe ku bita kubuno nsyakumona na bubi kutukila busi buwamvwilide aaba nu lelo; tondo bango bakota ba baFilistini tabakukutunda. 7 Kasi, enda mu bubobelelo. Ntukite bubi ku meiso ma bakota ba baFilistini.”
8 Davidi abwide Akisi bunee: “Tondo nakitile buni? Wasanga kikizi ku mukiti wobe nkungu insania ganabezaga nobe aaba nu lelo buno nsyende kwitana na beiti ba mukota wane?”
9 Akisi akwide Davidi bunee: “Nizi buno uli musoga kundi anga mwanzelo wa Kalaga, tondo bakota ba baFilistini bakutenda bunee: ‘Ntabakame gamozi n'iswe ku bita.’ 10 Ububo subya nindunindu mukesi gamozi na bakiti bobe bavule gamozi nobe.” 11 Ububo Davidi nu bantu bage bazanzukile mukesi, nu basubizie ku kisi kya baFilistini. BaFilistini nu bo bendile ku Yezereheli.