Davidi munkatini mwa beiti ba baIsraeli.
28
1 Mu busi bubo, baFilistini bakungikile mayombo mabo ku bita, kwitana na baIsraeli. Akisi abwide Davidi bunee: “Menya buno ukwenda gamozi na nne ku iyombo, uwe nu bantu bobe.” 2 Davidi akwide Akisi bunee: “Wizi buni bwakite mukambi wobe.” Akisi amutendile bunee: “Ububo nakubike mulangi w'itoe lyane nunse.”
3 Samweli akule wakalazi, nu baIsraeli bansania bamulilide, nu bamuyikile ku Rama, ku mwino wage.
Saulo atikizye beiya basumbu nu bagila mu kisi kinsania. 4 BaFilistini bakundamenne nu bakitile ido ku Sunemu. Saulo akundamanizie baIsraeli bansania nu bakitile ido ku Gilboa. 5 Gamonine Saulo ku iyombo lya baFilistini, akule boba. Mutima wage wagiliminne nunse. 6 Nu gabuzizie Saulo ku Yehowa, ntamwakwide, aba ku ndozi, aba ku Urimu, aba ku balengania. 7 Ububo Saulo abwide bakiti bage bunee: “Mundondele mukikulu mwiya basumbu buno nende kweli nu kumubuzia.” Bakiti bage bamubwide bunee: “Kuli mukikulu mwiya basumbu ku Endori.”
8 Saulo eigalukizye, avwalile lungo lukita lwa nsulu nu mu kindi endile, we nu bango bantu, ku wozo mukikulu, atendile bunee: “Nakusega kumbukila ku basumbu nu kunsakikila muntu u nakubule.”
9 Mukikulu abwide bunee: “Wizi buni bwakitile Saulo, kutikya beiya basumbu nu bagila mu kisi kikino. Kubuni wambikila itega ku kalamo kane buno nikue?”
10 Saulo amulumbilide ku Yehowa, atendile bunee: “Anga bukulamaga Yehowa ntwasungibwe ku kitondo kikino.”
11 Mukikulu amubuzizie bunee: “Nikuyukizie nazi?”
Amwakwide bunee: “Nyukizie Samweli.” 12 Nu gamonine mukikulu ku Samweli, alalukile n'iyuki inene bunee: “Kubuni kuwanengelela? Uwe u Saulo.”
13 Amwakwide bunee: “Ntukue boba; buni buwamonako?” Mukikulu abwide Saulo bunee: “Namona anga kalaga akubakama kutuka munsi.”
14 Abuzizie mukikulu bunee: “Buni buli kilungi kyage?”
Atendile bunee: “Mukungu u wabakama nu akukilwa na nsulu.” Saulo amenyine buno eli Samweli. Akumbile itoe lyage gansi. 15 Samweli abwide Saulo bunee: “Kubuni ukunzangiazangia nu kunyukya?”
Saulo amwakwide bunee: “Nababalwa nunse, kubuno baFilistini bankitila bita, nu Kalaga atuka kundi, ntakunakula lingo aba ku balengania, aba ku ndozi. Ububo nakumana buno ummenyesie buni bunikita.”
16 Samweli amwakwide bunee: “Kubuni ukumbuzia nu Yehowa akusiga nu kuba musombi wobe? 17 Yehowa akukitila anga bwatendile ku kanua kane; Yehowa atikizye bukota mu kuboko kwobe nu kubukasa ku munyobe, ku Davidi. 18 Kubuno ntwanzile iyuki lya Yehowa, aba ntwasililizizie bongoa bwage bukali ku Amaleki. Ububo Yehowa akukitila bubuno lelo. 19 Nu lingo Yehowa abike baIsraeli ku kuboko kwa baFilistini nu lubi, uwe nu bana bobe, mwabe gamozi na nne. Yehowa agabule iyombo lya baIsraeli ku kuboko kwa baFilistini.” 20 Kazanga kongo Saulo agwede bukukama ku bulazi bwage bunsania. Akule boba nunse ku bitondo byamubwide Samweli; aba magala tamabede mweli kubuno ntalide idia musi nu kindi kinsania. 21 Wozo mukikulu avule ku Saulo nu gaamonine buno atamba nunse, amubwide bunee: “Mukiti wobe ongule ku iyuki lyobe. Nabede anga mukuzi kubuno nungwilide lutundo lwobe. 22 Kano kaluma, ungwilila iyuki lyane. Nikukase kampampa kakeke, ulie nu kuba na magala ku nkungu ziwende.”
23 Tondo ananine nu atendile bunee: “Nsyalie.” Tondo bakiti bage, gamozi na mukikulu, bamusindikile nu ongwilide moki mabo. Azanzukile kwikala ga mugu. 24 Mukikulu abezaga na kyana kya ngombe kyanona mu numba, asasizie kukisesa nu atolile bunga bwa ngano nu kubuzuga na maboko. Abuyikile kampampa katagagibwa. 25 Abilusizie ku Saulo nu ku bakambi bage nu balide. Kumbusa bendile mu kindi kikyo.