Davidi eikala gamozi na baFilistini.
27
1 Davidi atendile mu mutima wage bunee: “Bungo busi nakue na Saulo. Buli busoga nitinine ku kisi kya baFilistini buno Saulo amenke kundonda mu myaga insania za baIsraeli; bubo u bwatanannita.” 2 Davidi atukile na bantu nkama mutuba gamozi nage. Bendile kwa Akisi, mwana wa Maoki, mukota wa Gati. 3 Davidi nu bantu bage beikede ku Gati bwigi na Akisi, nawe na kikanga kyage. Davidi abezaga na bakikulu bage babili, Ahinoamu muYezereheli nu Abigaili muKarmeli, musigala wa Nabali. 4 Saulo asambalidwe buno Davidi atinina ku Gati; ububo ntamuyangile lingo.
5 Davidi abwide Akisi bunee: “Kano kaluma ndi wanitabizia, nkase mwino umozi ku miino mu kisi kyobe buno nikale mugo, kubuno buni bunikale mu mwino wobe?”
6 Ububo Akisi amukasile Ziklagi busi bubo. Ububo Ziklagi wabede mwino wa bakota ba Yuda aaba nu lelo. 7 Davidi eikede mu kisi kya baFilistini mwaka umozi nu myezi inazi. 8 Davidi nu bantu bage bendile kwitana na baGesuri nu baGirzi nu baAmaleki. Kutukila wakalazi babano bantu beikede mu kisi aaba nu ku Suri nu Misri. 9 Davidi eitile kisi kikyo, ntasigile wampa na kalamo, aba wamulume aba mukikulu. Anyagile mikoko nu ngombe nu mpunda nu ngamia nu nsulu. 10 Akisi abuzizie bunee: “Mwitana kuni lelo?” Davidi amwakwide bunee: “Kuntata kwa Yuda” aba “Ku Negevi za baYerameli” aba “Ku Negevi za baKeni.” 11 Davidi ntasigile mulami aba wamulume aba mukikulu, kubalusia ku Gati kubuno akengede bunee: “Tabasambale misagu zeitu bunee: ‘Bubuno u bwakitile Davidi.’” Nu lulo u lwabezaga lukita lwage mu nkungu insania geikalaga mu kisi kya baFilistini.
12 Akisi akatizizie Davidi. Akengede bunee: “Davidi akwibigia ku bantu bage baIsraeli, nu abe mukiti wane bindi binsania.”