Davidi asigilila lingo Saulo.
26
1 Nu baZifu bavule ku Saulo ku Gibea kumubula bunee: “Ndi Davidi ntabisama ku mwiduko wa Hakila, guli bwigi na kalula?” 2 Ububo Saulo azanzukile, nu endile ku kalula ka Zifu. Asombwede baIsraeli tununu tusatu (3.000) gamozi nage, nu endile nabo kulonda Davidi mu kalula ka Zifu. 3 Saulo eiyombekile mu ido mu nzila za mwiduko wa Hakila guli bwigi na kalula. Tondo Davidi abezaga eikili mu kalula. Amonine Saulo akuvwa kumbusa kwage. 4 Davidi asingile batitiki nu amenyininne buno Saulo avwa lebelebe. 5 Davidi emanukile nu endile ku ido lya Saulo. Amonine kiziki kwiyombekile Saulo, nu Abeneri mwana wa Neri, mukota w'iyombo lyage. Saulo abezaga eiyombeka munkatini mu ido nu bantu bamutimbikania. 6 Nu Davidi abwide Ahimeleki muHiti nu Abisai mwana wa Zeruya nu muto wa Yoabu bunee: “Nazi wagele gamozi na nne ku Saulo mu ido?” Abisai atendile bunee: “Nagele gamozi nobe.” 7 Davidi nu Abisai bavule ku bantu mu kindi, nu Saulo abezaga eiyombeka mu ido, nu isumo lyage lyabezaga lyakomwa munsi bwigi na Abeneri, nu bantu bage beiyombeka bamutimbikania. 8 Nu Abisai abwide Davidi bunee: “Kalaga akasana mwiti wobe mu kuboko kwobe lelo. Ububo nimwite kano kaluma. Namusumite limbizi limozi tugu, nsyamusumite limbizi lya mabili.”
9 Davidi akwide Abisai bunee: “Ntumwite, kubuno nazi unavwama kubika kuboko kwage ku mubongibwa wa Yehowa geteli bubi?” 10 Davidi atendile bunee: “Lebelebe Yehowa amwite. Embe akue anga bubo bukukua bango, aba akue ku bita. 11 Yehowa anane buno nsyite mubongibwa wa Yehowa. Kasi tola isumo lili ku itoe lyage kano kaluma, nu idega lya mazi nu iswe twiyendele.”
12 Davidi atolile isumo nu idega lya mazi lyabezaga bwigi n'itoe lya Saulo. Batukile, nu muntu ntabamonineko aba kumenya aba takwabezaga muntu umozi wayukile; bobansania beiyombekile tulo kubuno Kalaga abasingile kabwebwe kanene.
13 Kusila kwa bubo, Davidi asokile ku ungo mutili wa mpinga. Emenne gantata ga mwiduko bulazi nunse. 14 Alalukile ku bantu nu ku Abeneri mwana wa Neri bunee: “Abeneri, ndi ntukwakula?” Abeneri akwide bunee: “Uwe u nazi ukulaluka na kazege ku mukota?” 15 Davidi amwakwide bunee: “Ndi uwe ntuli ipuka? Nazi wigezye nobe mu Israeli? Kubuni ntukulanga mukota wobe? Kubuno umozi wa bantu eingide kwita mukota wobe. 16 Bubuno buwakita ta busoga; anga bukulama Yehowa, mwatunganana kukua kubuno tamwalangile mukota weinyu, mubongibwa wa Yehowa. Kano kaluma, kuni kuli isumo lya mukota nu idega lyage?”
17 Nu Saulo amenyine iyuki lya Davidi. Atendile bunee: “Mwana wane Davidi, ndi lili iyuki lyobe?”
Davidi amwakwide bunee: “Mukota wane, lili iyuki lyane.” 18 Atendile lingo bunee: “Kubuni mukota wane akuyanga mukiti wage. Buni bunakitile? Ndi bubi buli mu kuboko kwane? 19 Mukota wane, ungwilila kano kaluma bitondo bya mukiti wobe. Ndi Yehowa u gukukusindika kunyanga, kasi anakaswa kisansa; tondo ndi bantu, baswililwe lwabusio lwa Yehowa kubuno bampumbia lelo buno nsiyane mu bwiyani bwa Yehowa. Bakutenda bunee: ‘Enda ukambile tungo tulaga.’ 20 Mikila zane tazikoloke gansi bulazi na Yehowa. Mukota wa baIsraeli avule kulonda kalamo kane anga muntu ukulonda sela, anga muntu ukutegela kazoni mu miduko.”
21 Ububo Saulo abwide bunee: “Mwana wane Davidi, nagile. Subya. Nsikakubabazia lingo, kubuno wandangile lelo. Nakitile bukongolo, nagile nunse.”
22 Davidi akwide bunee: “Ee, mukota, lola isumo lyobe. Umozi wa basikila avwe kulitola. 23 Yehowa akaliga muntu na muntu anga buli kusililila kwage nu kwisanana kwage; Yehowa akukasenne mu maboko mane lelo, nu nne nasombile kwita mubongibwa wa Yehowa. 24 Nu anga bunakulangile lelo, ububo Yehowa andange nu anonie mu mbabazio nu nsungio insania.”
25 Saulo abwide Davidi bunee: “Mwana wane Davidi, ukaswe mponga. Ukakita bitondo bingi nu lebelebe ukakinda mu binsania.” Davidi endile nu Saulo asubizie ku kiziki kyage.