Lukuo lwa Samweli.
25
1 Nu Samweli akule. BaIsraeli bansania bakundamenne nu kumulilila, bamuyikile mu numba zage ku Rama. Davidi akumbile ku kalula ka Parani. Davidi nu Nabali.
2 Kwabezaga muntu umozi ku Maoni wa ku Karmeli. Muntu wozo abezaga mugumi nunse. Abezaga na mikoko tununu tusatu (3.000), nu mpene kanunu (1.000). Nu we abezaga akwalula myoza za mikoko zage ku Karmeli. 3 Izina lya muntu wozo lyabezaga Nabali, nu izina lya mukazi Abigaili. Nu mukikulu abezaga mwiya menge masoga nu mbangilwa tondo wamulume abezaga nteli na menge. Abezaga na kasungu nu misako mibi. Abezaga wa numba za Kalebu.
4 Davidi ongule mu kalula buno Nabali abezaga akwalula myoza za mikoko zage. 5 Davidi amanine bantu bage ikumi nu ababwide bunee: “Bakamazi ku Karmeli, mwende ku Nabali nu kumusekela ku izina lyane. 6 Sambalilazi wozo mugumi bunee: ‘Samba kuguli nu ku numba zobe nu ku bansania baguli nabo. 7 Kano kaluma nungule buno uli na basesi ba myoza za mikoko nu balangi ba mikoko bobe babezaga gamozi n'iswe. Tatwabababazizie aba tabeidile kena nkungu insania gababezaga ku Karmeli. 8 Buzia bakiti bobe nubo bakusambalile bubo buligo. Ububo itabizia bakiti bane kubuno bavwa kuguli ku busi bwa mbogimbogi. Ukase bakiti bane nu mwana wobe Davidi, kikyo kinsania kiguli nakyo.’”
9 Gavule bantu ba Davidi basambalide Nabali bibyo binsania ku izina lya Davidi nu beikede kibibi.
10 Nabali akwide bakiti ba Davidi bunee: “Davidi u nazi? Nu mwana wa Yese u nazi? Bakiti beli beingi kano kaluma bakutina ku mukota wabo. 11 Nitole tumpampa, nu mazi nu nyama zane zinasesede basesi ba myoza za mikoko zane, nu kukasa ku bantu bansizi kubakutuka?”
12 Ububo bakiti ba Davidi bagalukile ku nzila zabo, basubizie kumusambalila bitondo bibyo binsania.
13 Davidi abwide bantu bage bunee: “Mwikande myene, na muntu na muntu wage.” Nu Davidi eikandile nu we wage mwene. Bantu nkama inazi babakamine na Davidi. Nkama ibili basigede gamozi na bikagi.
14 Nu umozi wa bakiti ba Nabali abwide Abigaili mukazi wa Nabali bunee: “Davidi asingile migenzi kutuka ku kalula kusekela mukota weitu; nu we abasolobokede. 15 Tondo bantu babo batukitide busoga nunse. Tatwababedwe aba tatwalilide kena mu nkungu zitwabezaga nabo ku kalula. 16 Babezaga kitutu kutuli musi nu kindi nkungu insania zitwabezaga gamozi nabo kulanga mikoko. 17 Kasi menya lino nu kengela buni buwakite kubuno lusungio lwa longekelwa ku mukota weitu nu numba zage insania, kubuno we eli muntu mubi nunse. Muntu ntanavwama kutendana nage.”
18 Ububo Abigaili akitile lubilo. Atolile tumpampa nkama ibili nu malega mabili ma maku nu mikoko itano zabezaga zalongekwa kayikayika nu byanzi bitano
+ \fr 25:18 \ft KiEbrania, seah 5. Bigezye na litres 30. bya mabela mokibwa, bisala lukama lumozi lwa miti za biguma byakamibwa nu binkwanga nkama ibili bya biguma bya muti wa figi. Abikile binsania gantata ga mpunda. 19 Abwide bakiti bage bunee: “Mulinge kwenda nu namuyange kumbusa.” Tondo ntasambalide iba wage Nabali kena. 20 Endile gantata ga mpunda nu gabede akukumba mwiduko, akulumenne na Davidi nu bantu bage bakukumba mwiduko.
21 Davidi akengede mu mutima wage bunee: “Bulili nalangile binsania bya muntu wono byabezaga nabyo mu kalula bulia geteli kwida kena ku bikulo byage, nu ansubizia bubi ku busoga. 22 Ndi wamulume umozi wa ku babo asigala aaba nu kukukya kwa busi, nti Kalaga anita.”
23 Gamonine Abigaili ku Davidi agelile lubilo ga mpunda zage nu akomine malanga gansi lwabusio lwa Davidi, 24 nu atendile bunee: “Tatane, nnungwilile tanga bunkutenda. Bubo bubi bube kundi. 25 Ntulole ku wozo muntu wa Beliali, ku Nabali; kubuno eli bulingilingi n'izina lyage. Nabali u izina lyage nu eli kikongolo; tondo nne nsyamonine ku bantu ba mukota wane bawasingaga. 26 Kano kaluma, mukota wane, anga bukulama Yehowa nu anga buukulama, kubuno Yehowa u wakunanizie kutakubula mikila nu kuteisuba uwenyene, beiti bobe nu bansania bakulondela mukota wane bubi, babe anga Nabali. 27 Nu kano kaluma wansigililila ku lukaso luluno lwakwekede mukiti wobe, lukaswe ku bakiti bobe. 28 Lebelebe Yehowa alindie numba za mukota wane nu kukaswa magala ma kwitana mu bita bya Yehowa, nu bubi tabwamoneke muguli bindi binsania. 29 Ndi muntu akulonda kukwita, nti Yehowa, Kalaga wobe, akulange anga bukulanga muntu bikulo byage. Beiti bobe babe anga ikozi liswa na nkumbi. 30 Kungwa Yehowa es'akitila mukota wane binsania byakutendile nu kukubika mukota wa baIsraeli, 31 nti ntabe na mpipi ku kabamba ka kukubula mikila bulia nu kwisuba wenyene. Nu gakukitile Yehowa busoga, nti wakengela mukiti wobe.” 32 Davidi akwide Abigaili bunee: “Yehowa, Kalaga wa Israeli, aganunwe, wakusingile kunkulumania. 33 Kalaga akukase mponga gamozi na menge mobe kubuno wandanga buno nsyite muntu lelo nu kwisuba nnenyene. 34 Nkukubula buligo buno songo Yehowa, Kalaga wa Israeli, ntannanizie gawavule kundi, songo wababazibwa, nu Nabali na bamulume bage bansania banakule lwabusio lwa kukya kwa busi.”
35 Ububo Davidi akatile bibyo byamuvwilide nabyo. Abwide Abigaili bunee: “Bakama na bubobelelo ku numba zobe. Lola, nungwa iyuki lyobe nu nitabizia bunsania buwatenda.”
36 Abigaili abasile ku Nabali. Abezaga na kisagulo mu numba zage, anga kisagulo kya mukota. Nu mutima wa Nabali wabogilebogile nunse kubuno abezaga alebwa nunse. Ububo ntamusambalide bwampa aaba nu gakede busi. 37 Gakangukile maku mu Nabali, mukazi wage amusambalide bibino bitondo. Mutima wage watambile nunse nu abede anga ikozi. 38 Nu kumbusa kwa bindi ikumi, Yehowa eitile Nabali nu akule. 39 Gongule Davidi buno Nabali akua, atendile bunee: “Yehowa aganunwe kubuno ongule bitondo bya tubebe twane ku Nabali nu kunania mukiti wage buno ntakite bubi. Kasi bubi bwa Nabali bwasubibwa kweli na Yehowa.” Kusila kwa bubo, Davidi asingile bantu kuli Abigaili buno amutole kuba mukazi wage. 40 Gabasile bakiti ba Davidi ku Abigaili ku Karmeli, bamubwide bunee: “Davidi atusinga kuguli kukutola buno ube mukazi wage.” 41 Emenne, nu akumbile itoe lyage gansi nu abakwide bunee: “ Nne mukiti weinyu nabe mukobe kogia magulu ma bakiti ba mukota wane.”
42 Ububo Abigaili azanzukile lubilo nu endile gantata mpunda gamozi na bakiti bage batano. Bayangile basingwa ba Davidi nu abede mukazi wage. 43 Davidi atolile ungo mukikulu, Ahinoamu; bobabili babede bakikulu bage. 44 Nu Saulo atolile Mikali, mukinga wage wabezaga mukazi wa Davidi nu amukasile ku Palti, mwana wa Laisi uli wa ku Galimu.